De Sjter 2 klop koplouper; Rick Kostons flùt, zingk en voetbalt; Belsj eert Jan

de Weijer.

Wát un resultaten behoalden os seniorenteams dit weekend! ’T woar un woare punten- én

doelpuntenraege veur gael zjwart. Op zoaterdig revancheerden de veteranen zich, via un

euverwinning op Catsop, veur de nederlaag van veurige waek. En op zondig woort ’t allein

maar baeter. Ut driede leed weliswoar un nederlaag, maar de mannen van 2 klopten

koplouper Budel, en de mannen van vief wisten un zjwoarbevochten punt euver de sjtreep

te trekke. En sjmiddigs keerde os eesjte mit unne 0-3 tusjesjtandj terugk van un hauf uurke

voetballe taege SHH in Herten. Un blessure van de sjeidsrechter veurkoom dat de punten

definitief biegesjreve mochte waere. De dames houwe niks te voetballe dit weekend, maar

desondanks in dit versjlaag fotomateriaal van ein van de Sjteinder ladies. Én al dat voetballe

houw natuurlijk waer neit kenne plaatsjvinje zonger al die clubluuj die alles d’r om bie

regele. Wat denk geer beveurbeeld van Marco Vaassen, dae veurige waek al is geëerd in ’t

versjlaag, vanwaege zien grote verdeinsten, en dae op zoaterdigmiddig doodleuk waer de

wedsjtried van de B2 sjting te fluiten.

En auch Rick Kostons deig op dat gebied van zich sjpraeke dees waek. Hae floot de

wedsjtried van de veteranen en wis dem tot ’n goud einde te brenge zonger

noemenswaardige discussies of ruzies. Wonoa Rick un paar uurkes later auch nog veur un

toegift zurgde door mit zien gouwe sjtrotje in de kantine twee leidjes ten geheure te brenge

van de volkszanger, wiens naam ein derde van ’t Mavo-eindexamen-pakket van Rick bevat…

(Frans Duijts). En daezelfde Rick sjpeelde op zondigmurge in ut viefde geweun effe 90

minute langk de beste sjpeler van de taegepartie oet de wedsjtried. Dát zeen de clubluuj wo

veer ’t van motte hubbe. Klasse Rick!

Genog te besjpraeke dus. En loate veer dees waek maar ens beginne bie ’t team dat niks te

voetballe houw: ozze dames. Rene Gooren spamde namelijk aan ’t begin van de waek al

geliek ’n leuk appke de wereld in:

Dat “sjnapse ‘m?” van Randy is euveriges un verwiezing noa de vroag die Rene ummer sjtelt

es hae waer ens un möpke haet verteld.

Van de Action van Siri Vroemen goan veer door noa ’t driede. Ut team dat sinds dit sezoen

door Rene Gooren wurt getraind. Ut driede moosj ’t vandaag in de derby der derby’s

opnumme taege Sjtein Zuid 3. Unne clash wo beide plouge al waeke noatoe aan ut wirke

woare. Helaas veur Sjtein eindigde dae wedsjtried in ‘n 1-3 nederlaag. Mike Schippers redde

de eer veur gael-zjwart.

Noa de wedsjtried woar coach Gooren té teleurgesjteld om op de persconferentie te

versjiene. Ziene woordveurder, Ralph Doek, noom de honneurs woar:

Unne sjtroeve sjtart veur ut driede. Maar tóch zeen complimenten op hun plaatsj. Rene haet

d’r veur gezurg dat ut driede veur ’t eesj in tig joare waer traint doordewaeks en dat is

geweun al ’n hele verbaetering. Es geer dat volhaut mannen, dan geit ’t helemoal

goudkomme dit sezoen mit De Beesten van 3.

Van ut driede make veer effe un oetsjtepke noa unne man dae dit weekend ernstig gemis

woort op de velje van ’t Hetjen. Unne man, zo wie ze d’r bie jeder vereiniging eine hubbe

rondjloupe. Bie anger vereiniginge nuime ze zo emes vaak ‘unne sjtille krach’. Bie De Sjter

nuime veer ‘m geweun Jan de Weijer. Want sjtil is ‘r neit ech.

Maar dat houf auch neit. Want hae verzet ontzettend voal werk en haet mit zien sjat aan

ervaring genog wijsheden te deile mit de jonger generatie.

Dáe Jan woar aafgeloupe vriedig veur ’n waekske welverdeinde vakantie vertrokke mit zien

vruike. Jan houw doordewaeks al jederein op ’t Hetjen perseunlijk drie kere verteld dat hae

op vakansie ging. Én toch besjloot hae op de groepsapp van de jeugdleiders auch nog effe

un appke te gooien om ’n reactie oet te lokken. Die reactie leet neit lang op zich wachten:

Jan zoch zich de rust op in Belsj. Un joarlijks terugkkerend fenomeen, want Jan kump d’r al

sinds zien jonge, wilje joare. Hae vertelt auch ummer dat, es ‘r aan ’t eind van zo’n waek

waer weggeit, dat de luuj ‘m doa dan sjmeke om waer terugk te komme. Luuj die Jan dat

heure vertelle plaatsje doa hun vroagteikes bie. Tén ónrechte, zo bleek dit joar oet un foto

die dit weekend is gesjoate door DJ Stan “The Man” Ortmans. In Belsj zeen ze zo gek van Jan

én zien vrouw, dat ze ter ere van hun tweeje unne speciale feestdaag hubbe oetgeroupe:

Unne daag noa ’t numme van die foto moosj Stan alwaer aantraeje bie de mannen van 5.

Versjtek loate goan woar gein optie want d’r woare maar leifs 12 aafmeljinge. Veur un

normaal leger elftal beteiktent 12 aafmeljinge un zekere aaflasjing. Maar neit veur De Sjter 5

dit sezoen. Dat besjik euver un fantastisch breije selectie.

De mannen van vief moosjten ut in Zitterd opnumme taege OVCS. Veur de wedsjtried, in ’t

kleidlokaal woort mandekker Rick Kostons oetgebreid aan de tandj gevuild euver zien

avontuur es sjeidsrechter bie de veteranen. Rick reageerde, wie ummer, koeltjes.

Medesjpelers: “En Rick, wie woar ’t gegange bie de veteranen?”

Rick: “Ja, goot. Eigenlijk heel goot zelfs. Ze hubbe mich neet weggejaag. Math Haagmans

jage ze waal weg. Dus wat dat betruf ging ’t boave verwachting.”

Medesjpeler: “Niks bezunjers gebeurd?”

Rick: “Ja, eine woar un bietje kwoad op mich. Dae zei: sjeids, doe mos un besjlissing numme.

Is ut noe doorsjpele of neit? Dus ich zegk: ja, ich hub neet gefloate dus doorsjpele, he.”

Medesjpeler: “Dat vult mit. Wiejer niks taege dich gezag?”

Rick: “Ja, op un gegaeve moment zei eine van Catsop taege mich: wat bés doe veur eine

sjeids?”

Medesjpeler: “Dat is neit leuk. Wat zeisse dan terugk?”

Rick: “Ja, jong, ich hub vanteveure al taege uch gezag dat ich geine goeie ben.”

En ’t mot gezag waere: Rick reageerde onger de wedsjtried uitermate koeltjes op reacties

die hae kreeg op zien fluiten. En doabie: zonger ’t zelf te beseffen, deig hae es sjeidsrechter

zelfs un geweldig veursjtel veur de wijziging van unne eeuwen-ouwe sjpelregel. Un wijziging

die zeker euvergenomme geit waere door Marco van Basten zodra dae zitting geit numme

in de sjpelregelcommissie van de FIFA. Dat ging es volgt:

Unne sjpeler van Catsop haet ruum op eige helf de bal. Hae zuut op de anger helf unne

medesjpeler deipgoan, maar haet nog effe tied neudig om de bal goud te legke. Vervolges

kump de pass pas op ’t moment dat de deipgoande medesjpeler ruum boetesjpel sjteit.

Willie de Worm, de eerlijkste grensrechter van Zuid-Limburg, sjtik de vlag omhoog. Un

fluitsignaal kump d’r echter neit. De sjpeler van Catsop is zelfs zo verbouwereerd dat hae de

kans mis. Terwiel Willie langs de lien al vlokend mit zien vlag sjting te sjmiete, goof

sjeidsrechter Rick tekst en oetlegk: “De pass kump van eige helf, dus dan kent ’t nooit

boetesjpel zeen…” Briljant.

Maar goud, veer woare gebleve bie de wedsjtried van Rick’s team, ut viefde, op zondig. D’r

woare dus unne hele houp aafwezigen, maar desondanks zote d’r nog twee wisselsjpelers

op de reservebank. Al woare de heren Habets en Doek auch neit helemoal fit oet bed

gesjtap zondigmurge. Nae, geine koppie van ’t zoepe, pien in de rugk en in de voot. Un

oplossing veur die pienkes woar echter sjnel gevonje door dees twee klasbek:

Mit die inspirerende opofferingsgezindheid, én noa un veurtreffelijke veurbesjpraeking van

Mark Janssen (“zelfs ziene broor Tom sjnapte ‘m”, aldus Doekie), renden de mannen van 5

de wei op. Aangezeen dit team doorgoans allein maar zoepfoto’s insjtuurt, maar noe

warempel un actiefoto deilde, num ich die auch maar geliek in ’t versjlaag op:

De Sjter koom twee kere op achtersjtandj maar de mentaal sjterke helden van 5 wisten

sjteeds waer op psychologisch belangrieke momenten op gelieke hoogte te komme. Eesj

woar ’t Brahim dae vlak veur rus de 1-1 scoorde. En vlak veur tied woar ’t good old Ivo van

den Bergh dae de 2-2 scoorde. Ontzettend sjterk van Ivo dae effe doaveur nog unne prima

geplaatsjte penalty gesjtop zoog waere door de boumlange keeper van OVCS.

Jederein houw 110% inzet vandaag. Roger Caubo sjpeelde unne solide wedsjtried es letste

man, won al zien duels en plaatsjte dit keer sjlechs ein “sliding des doods”. Rick Kostons

houw de beste voetballer van OVCS 90 minute in de tesj. Noud sjpeelde veur rus iezersjterk

maar taaide in de rus doodleuk aaf om mit zien vrunj van De Sjter 2 in Budel ’n breudje bal

te goan aete. Veurin lepe de pas op 12-joarige laeftied vanein gesjeije siamese

tweelingsbreurs, Devon en Michel, zich, net zo wie ze dat de eesjte 12 joar van hun laeve

gedoan houwe, 90 minute ongerein veur de vuit. Noel Maessen maakte in eine wedsjtried

meer minuten dan in de ganse tweede sezoenshelf van veurig joar: 55! En op de vleugels

woar Johnny Pantus waer goud veur 33,4 geloupe kilomaeters.

En noa 90 minute knokken mochten de mannen un dikverdeind punt mitnumme noa ’t

Hetjen. Dat zjwoar bevochten punt woort op ’t terras veur de kantine nog effe lekker

gevierd mit un paar pinten.

Es Theo Reitsman die mannen houw zeen zitten vanmiddag, houw hae ongetwiefeld ziene

klassieker oet 1988 d’r oet gesjmete: “Jaaaaa, dit is een goed stel hoor!”

Van ’t viefde goan veer door noa de mannen van 2. Die houwe op veurhandj unne zjwoare

zondig verwach. Joep Nacken koosj neit mitdoon vanwaege zien werk, Pascal Conjour

vanwaege un blessure, Bartje Linders woar geblesseerd en bie ut eesjte koosjte ze

vanwaege un krappe selectie auch nemes missen. En dan moosj d’r auch nog gesjpeeld

waere taege de koplouper in dit prille sezoen, want Budel 2 houw heur veurige 3 partieje

gewonne.

Coach Crutzen houfde door de krappe selectie neit zo heel lang te puzzelen en koom tot de

volgende opsjtelling:

Kis: Esat

Achter: Sjoerd, Frusj, Cyrill en Jari

Midden: Timo, Luc en Zoubair

Veur: Youri, Marko en Steve

Bank: Eliandro, Frank, Jesse (A-jeugd) en Mitchel (A-jeugd)

Ozze jonges begoosjten goud aan de wedsjtried. Coach Crutzen houw zien ploug opgedrage

om, net zo wie ummer, vol te pressen op de taegesjtenjer. Dat houw al sjnel effect. De

eesjte terugksjpeelbal op de keeper woort aafgejaag, wodoor dae de bal verkeerd

wegtrapte. Zoubair ving de bal op en sjoot van aafsjtandj op goal. De keeper wirkte de bal

via de kop van unne verdediger en de poal euver de achterlien. Dikke paniek dus geliek bie

Budel.

Noa 5 minute kreeg De Sjter unne vrieje trap op de houk van de 16. Youri Voesten ging

achter de bal sjtoan, de kabouter achter de goal begoosj al op de triangel te rammele, en

Youri krulde de bal, à la Rene Gooren, in de driehouk: 0-1!

Noa 10 minute sjpele kreeg De Sjter waer unne vrieje trap. Dit keer op 25 maeter, rech veur

de goal. De keeper van Budel dae, op zien zachs gezach neit gans wakker leek, zat un moer

in ’t midden en ging doa zelf rech achter sjtoan, zodat hae in jeder geval zich op de bal houw

es de sjpelers in de moer oeterein ginge (of zoget mot hae gedach hubbe). De moer ging

echter neit oeterein en Zoubair deponeerde de bal mit unne sjieke krul in ’t netje veur de

0-2!

De fase die volgde koom Budel get baeter in ’t sjpel en kreeg auch kansen, maar de attente

Esat keepte goud. De rust woort bereik mit unne 0-2 veursjprong veur os tweede.

Ut eesjte kwarteerke noa rus woar waer veur Budel. Ze sjpeelden un paar goeie kansen oet

maar Esat wis zien goal sjoon te haute. Vervolges bleek de koplouper oetgeraas en krege de

gael-zjwarten voal ruumte en dus kans op kans. Eesj passeerde Steve ziene taegesjtenjer en

sjpeelde de bal noa Marko dae baalde van zonne goeie veurzet en ’t zien eer te noa vonj om

zo’n mekkelijke kans aaf te ronje. Lever probeerde hae get wat nemes angesj op de

Limburgse amateurvelje ‘m noa zou kenne doon: de bal van unne hauve maeter veur de

goal euver ’t vangnet mikken. Effe later woar ’t esnog raak veur ozze Montenegrijnse

goalgetter. Opnuuj unne veurzet van Steve belanjde in de kluts bie Marko en dae knalde de

0-3 binne.

Doamit woar de wedsjtried besjlis en ginge de kupkes hange bie Budel. Steve sjtruijde nog

zout in de wonje en stiftte de 0-4 binne, wonoa Eliandro de 0-5 binnesjoot mit unne

prachtige volley, oet unne assist van keeper Esat.

Dikke complimenten woare d’r veur de invallers bie 2. Mit name veur de jonkies Jesse en

Mitchel van de A-jeugd die unne prima pot sjpeelden. Mitchel sjpeelde zelfs méér dan unne

goeie pot. Klasse mannen!

Volgende waek moage de mannen van 2 probere om de sjtijgende lien veurt te zette op ’t

beton in Baek. Succes mannen!

Dan resteert os nog maar eine wedsjtried van ozze zondig-teams, namelijk dae van De Sjter

1, oet taege SHH. Coach Czornyj kreeg dees waek unne taegevaller te verwirke wie bleek dat

captain Guido Cals neit koosj mitsjpele. Ronny wol ziene aanveurder per se fit aan de

aaftrap kriege en noom gein hauve maotregele. Want wie de helst masserende verzurger

van Zuid II, Wesly Wanten, de sjpiere van Guido neit geheeld kreeg, woort unne masseur

ingezat dae nog éns zo hel kent masseren:

Dankzij de koalesjuppe van Piet Vos vuilde Guido al heel sjnel de pien in zien kuutsjpiere neit

meer. Doa-en-taege leep hae, aan boavesjtoande foto te zeen, waal un flinke sjeur op in

zien rechter hamstring.

Doanaeve leek d’r gounsdig oavend nóg meer sjlech nuujts te komme. Willem Thewissen

ging noa unne wedsjtried van ziene zoon Ian kieke taege de F jeugd van Sjarn. Willem leep

doa ’t complex op en wae leep doa rondj? Notabene in un Sjarn-trainingspak….

Precies: de goedlachse Guillermo Kroon, dae in korte tied dit sezoen al de harten van gans

Sjtein haet veroverd. Gelukkig wis Willem Thewissen te melje dat Guillermo nog ummer de

jeugd van Sjarn traint, net zo wie ziene pap dat auch nog ummer deit. “Dus sjrief maar niks

al te lulligs euver ‘m, want ’t is unne leuke jong en ich ben blie dat ‘r in Sjtein voetbalt”,

aldus Willem. De sjriever van dit sjtuk antjwoordde dat Guillermo veurig sezoen bie de

aafsjleitende feestoavend nog houw verteld dat hae dees versjlage nooit houw gelaeze, dus

’t maak gein klote oet wat ich allemoal euver ‘m sjrief. Willem reep toch op tot

veurzichtigheid mit ’t volgende appje:

Bie de aafwezigheid van Guido, maar mít de terugkgekeerde Hassan, woar coach Czornyj tot

de volgende opsjtelling gekomme:

Goal: Geoffrey

Achter: Roel, Tim, Guido R., Paolo

Midden: Stan, Ricardo, Guillermo

Veur: Thijs, Bob, Hassan

Wie de mannen van 1 hun warming up aan ’t aafwirke woare, vele hun auge inens op twee

blonj maedjes langs de lien. Ronny mirkde dat zien sjpelers zich neit koosjten concentreren,

sjtapte op de dames aaf en zei: “Wat doen jullie hier? Wij gaan hier voetbal spelen. Ga

lekker shoppen ofzo!”

Every inch a gentleman, dae Ronny.

Ozze mannen van 1 houwe tot vandaag eine keer gewonne en twee kere verloare. De

taegesjtenjer oet Herten houw eine gewonne en twee kere geliek gesjpeeld, en woar dus

nog ongesjlage. De Sjter sjoot oet de sjtartblokken en al in de eesjte minuut lag Hassan de

bal goud terugk op Guillermo, dae de bal echter neit langs de keeper kreeg.

Noa 7 minute sjpele leek de joarige Bob (17 joar!) oet boetesjpelpositie weg te sjprinte. De

vlag bleef echter omleeg en de sjeids leet auch doorsjpele. Bob sjoot en scoorde de 0-1 veur

De Sjter binne. Dat wurt kommende waek alwaer twee keer tracteren op échte Dukers vlaai,

Bob. Eine keer veur diene verjoardaag en eine keer veur dien eesjte competitie-goal op 1.

In de 21e minuut dolde Thijs in zien eentje de ganse defensie van SHH en lag de bal perfect

aaf op Stan, dae de bal sjoon in de wieje houk binnesjoot veur de 0-2!

Nog gein vief minute later woar ’t waer Thijs mit un sjieke actie. Hae lag de bal terugk op

Hassan, dae ‘m achter zien sjtandjbein insjoot: 0-3. Welkom terugk, Hassan!

Ozze jonges zote in ’n geweldige flow en wie zoer is ’t dan dat de sjeidsrechter in de 33e

minuut un blessure oplup en de wedsjtried gesjtaak mot waere. Ontzettend joamer. Maar

desondanks geef dit hauf oer ongetwiefeld unne geweldige sjtimulans aan de jonges van 1.

Klasse gesjpeeld!

Noa aafloup woort unne keer neit un Sjteins café opgezoch, maar ’t café ’T Karreraet in

Meeswijk in Belsj. Dat café sjponsort un leuk bedraag sinds dit sezoen dus doa moosjte ozze

jonges auch zeker effe hun gezich loate zeen. Onger un sjtroalend zunke woorte doa ’n paar

glazen gedronke op de bienoa zekere 3 punten:

Wie de zon langzaam onger ging, houwe de jonges twee opties veur de terugkwaeg: de

sjnellere, maar waal aanzienlijk langere route euver de autosjnelwaeg, óf de korte maar

troage route mit ’t vaer. De meerderheid van de sjpelers verkoos de eesjte optie. Maar veur

de sjtudenten die te voel zeen veur ’n biebaantje, Youri Voesten en Bastiaan Muijtjens, zoot

d’r maar ein dingk op. Zie sjpeculeren jeder waek op de winstpremie om hun patserbakken

waer te kenne voltanken. Maar ja, dae premie koosj vandaag nog neit waere oetgedeild, en

dus zoot d’r niks angesj op veur Youri en Bastiaan om te wachten op ’t vaer. De gebroeders

Wantelic woare neit te beroerd om auch ’t vaer op te rieje, om dat ontnuchterende beeld

veur uch allemoal vas te legke:

Euveriges heel sjtijlvol van de gebroeders Wantelic, om dees foto van de wage van Bastiaan

door te sjture mit get lullige teksten d’r bie. Daezelfde Bastiaan woar dees waek immers neit

te beroerd om effe de gesjpierde hendjes oet de moewe te sjtaeke om, same mit elftalleider

van 1, Peter Janssen, te helpen bie un verboewing in hoeze Wanten:

Klasse Peter en Bastiaan! Geer zeet échte teamplayers!

En noe zit ich godverdomme alwaer op 14 pagina’s en ich hun nog gein woord gerep euver

de veteranen. Es geer dit versjlaag op op ’t werk op de wc aan ’t laeze zeet, dan adviseer ich

uch om uch de batse te vaege, op te sjtoan en effe de bein te sjtrekke. Want Ron Marschal

houw waer unne houp te melje en ich wul neit op mien geweite hubbe dat geer euver ’n

hauf oer door uch hoeven zak, omdat uch bein in sjloap zeen gevalle.

De veteranen krege doordewaeks un berichske van Ron op de groepsapp. Dat woar un

beeldfragment van ziene zoon Ken, dae mit Bocholt houw gesjpeeld taege eredivisie

koplouper Charleroi in de 2e runj van de Belsje Baeker. Ron sjreef daobie dat Ken ’t in dae

wedsjtried aanzienlijk baeter houw gedoan es bie zien letste optraeje (es keeper) bie de

veteranen. Marc Lacroix reageerde geliek, maar woort door Math Caanen al sjnel gedekseld

mit ’n verwiezing noa de baeker-oetsjakeling van Marc’s leifde Fortuna taege de amateurs

van Spakenburg:

De vets moosjten zoaterdig al om 16.00u aantraeje taege de vets van Catsop. Probleem van

dat vruige aanvangstiedsjtip woar dat Robert Kraus nog aan ’t werk woar en dus neit koosj

fluiten. Zo wie’t geer al hub gelaeze, haet Rick Kostons os oetgeholpe en de fluit opgepak.

Willem Thewissen goof aan dat hae auch nog geprobeerd houw om eine te vinje.

Gerard: “Ich houw eesj Rene Gooren gevroag, maar dae koosj neet.

Willem: “Weit ich. Ich vroog eesj Mark Habets. Dae zei dat ‘r neet koosj loupe. Toen zei ich

dat Kraus en Haagmans dat auch neet deige. Toen zei Marc dat hae unne verjoardaag houw.

Maar ja, dae kent toch nooit zo vruig beginne, zei ich.”

Gerard: “En toen?”

Willem: “Toen dach ich: vroag maar neet wiejer. Mesjiens wult ‘r gaar neet.”

De wedsjtried taege Catsop woar unne erg sjpannende. De Sjter leek de eesjte helf heer en

meister en koom via doelpunten van de sjriever van dit sjtuk (“schutter is keuning”) via de

rugk van unne taegesjtenjer, en unne benutte penalty van Stef Conjour op 2-0. D’r leek niks

aan de handj. Al woar d’r auch waal un wereldredding van keeper Roger d’n Doam veur

neudig om die 0 te haute. Maar daezelfde Doam ging bie de 2-1 van Catsop vlak veur rus

neit helemoal vriejoet.

Unne vrieje trap veur Catsop op 20 maeter van de goal. Unne sjpeler van Catsop reep al:

“Doam, kom maar neit oet de goal want doe kumps toch te laat.” De bal woort veur de pot

gesjmete, Doam reep “VEUR MICH!”, de verdediging maakte zich oet de veut, Doam reep

“SHIT, TOCH NEET” en de sjpeler van Catsop kupte de bal rustig euver Roger haer in ’t netje.

Mit unne 2-1 sjtandj ginge de plouge rusten. Noa de rus maakte Catsop de 2-2, wonoa Levi

Nelissen en opnuuj Stef de eindsjtandj op 4-2 bepaalden. Un dik compliment aan de

mannen van Catsop die op bezunjer sjportieve wieze omginge mit de af en toe

onnavolgbare acties van sjeidsrechter Rick. Gelukkig beseften zie net zo goud es ozze eigen

vets dat veer maar get blie kenne zeen mit unne clubman, dae un anger team oet de nood

deit helpe. Grote klasse Catsop! En grote klasse Rick!

Noa aafloup in ’t kleidlokaal noom Roger ’t woord. Hae richtte zich tot Willem Thewissen

dae alles rondjom de wedsjtrieje deit regele.

Roger: “Willem, dit kent toch neit. Sjiek dat Rick os kump oethelpe, maar veer betale toch

auch contributie? Dan mot de club auch maar unne sjeidsrechter regele.”

Willem: “Roger, woarom klaagse taege mich? Ich ben auch maar geweun unne sjpeler…

Mesjiens waal de beste sjpeler, maar dan nog…”

Steef van de Woude deig ongertusje zien toilettesj oape en zoog dat ziene shampoo houw

gelaek. Hae leet ’t tesjke mit unne flinke kwam shampoo d’r in zeen aan Ron.

Steef: “Ron, hubs diech d’r in gesjpoate?”

Ron: “Joa, dat woar ich joa.”

Steef: “Dat is unne flinke kwak gewaes.”

Ron: “Joa, en ich sjpoot de helluf auch nog d’r naeve.”

Mat Creemers woar op dat moment al lang en breid bezig mit ’t aete veur noa de

wedsjtried. Zoaterdigoavend vonj namelijk de officiële oettraejing van de ouw keuningin en

de inhuldiging van de nuuj keuningin plaatsj. Mat houw alles tot in de puntjes geregeld en

sjting d’r zelf waer wie unne richtige gentleman op:

Mat vertelde greutsj dat hae die kleijer houw aangesjaf om d’r kommend joar in noa ’t

Amerikaanse alternatieve festival “Burning Man” te goan.

Mat: “Dat kos un paar euro, maar dan hubse auch get. Dan num ich mich de dochter mit...”

Ron: “Kens dich baeter dollars mitnumme esse noa Amerika geis.“

Omdat de saté-sjtekskes nog effe op temperatuur moosj komme ging Mat eesj rondj mit de

manje kroepoek.

Mat: “Hie jonges, dit is venus-kroepoek.”

Ron: “Venus kroepoek? Wat is dat dan? Hubbe die unne kittelaer? Of lekke die terugk?”

Mat: “Haha, joa zoget.”

Ron (eine in de mondj duujend): “Ze hubbe in jeder geval unne kut-sjmaak.”

Terwiel jederein mit de kop aan ’t sjudden woar om die oetsjproake, ging Ron rustig wiejer.

Ron (nog un paar pruivend): “Ich hub al un paar bekende d’r tusje gepruif.”

Intusje woort d’r auch nog noagekald euver de taegegoal wobie Roger d’n Doam “Veur

mich!” reep.

Roger: “Ze loestere geweun neit noa mich. Ich reep eesj “veur mich” maar zei geliek doanoa

“toch neet!”

Ron: “Dat heurde toch geine hondj.”

Roger: “Jazeker waal. Ich zoog zelfs dat de paert op de manege opkeke wie ich dat reep.”

Ron: “Die keke omdat ze nog nooit zo’n sjtom goal gezeen hubbe. Én die sjtoan doa al get

joare.”

Vervolges veel ’t auch van Ron op ’t pekske shag van Thijs Otten:

Ron: “Houw ich dat geweite, dan woar ich joare geleje al goan rouke. Dan woar ic hun sjtuk

gouwekouper oet gewaes es noe.”

Mat woar intusje bienoa gereid om aan ’t officiële gedeilte te beginne. Hae deilde nog effe

ein besjtelling oet en besjtelde nog get veur Emma Shoes-directeur Tom Keulen.

Mat: “Effe kieke, haet jederein zien drinke, jonges? Welke werme haet noe dae greune ice

tea besjteld?”

Véronique: “Iche.”

Mat: “Oh sorry keuningin. Jo, doog Tom de Keul auch nog get. Gaef ‘m maar unne “Emma-

sjoes”

Vervolges ging Mat euver tot de ceremonie. Eesj moosj Danielle van Roger aafsjtandj doon

van heure kroon en heur veske.

Mat: “Veer goan Danielle noe ontdoon van al heur keuninklijke attributen.”

Ron: “Loat heur dat kledje geweun aanhaute, man! Dat is toch gein gezich angesj!”

En vervolges woorte die attributen door de feestcommissie, in de personen van John Jacobs,

Mat Creemers en Jos Driessen euverhandigd aan Véronique:

Wie die ceremonie gedoan woar, vertelde Ron dat hae extra lang zou blieve want zien

vrouw waor 50 gewoare en dat is noe neit bepaald get om te viere, aldus Ron.

Willem: “Is ze éch 50 gewoare vandaag, Ron?”

Ron: “Joa, maar doa pruifse helemoal niks van.”

Vervolges brach Marianne waer un nuuj deinblaad pils, sjoes en hauf om. Wie alles verdeild

woar, houw allein Ron nog niks. Op ’t deinblaad sjtinge nog 2 glazen hauf om.

Ron: “Marianne, ich hub dich waal door. Doe probeers mich zaat te veure om vervolges

misbroek van mich te kenne make.”

De sjtortvloed aan hilarische quotes van Ron woort veur effe ongerbroake wie Thijs Otten

zich waer aan toafel meldde.

Stefan: “Woarom deigs doe eigenlijk neit mit vandaag, Ties?”

Thijs: “Ich hub versjrikkelijk las van unne sjtieve nek.”

Gerard: “Aezel, doe houws dae viagra auch motte doorsjlikke in plaatsj van d’r op te

knauwele.”

Intusje houw Stef de microfoon gepak en vroog hae effe de aandacht.

Stef: “Jonges, effe allemoal loestere. Auch die van Catsop. De sjeids van vandaag, Rick, zeen

veer heel dankbaar dat hae os oetgeholpe haet. Maar d’r is nog ein dingk wat hae nóg

baeter kent es fluiten. En dat geit ‘r os noe loate heure.”

Rick: “Jo, zet maar get op van Frans Duijts.”

En vervolges kreeg Rick de ganse kantien aan ’t sjoenkele mit zien gouwe strotje.

Willem meljdde zich auch op de dansvloer. Omdat zien eige Groningse schone, Joyce, al noa

hoes woar, vroog hae de Braziliaanse vriendin van Robbie van der Linden, ten dans:

Ron: “Potverdomme Willem, die nuuj van dich is nog van wiejer es Groningen.”

Wie Rick auch zien tweede leidje houw gezonge, vonj hae ’t tied veur ’n pilske. Stef vroog

nog of die van Catsop auch unne zanger mitgenomme houwe. “Joa, maar dae is net van

hoes”, woort van achter oet de kantine geroupe.

’T sjlotwoord van vandaag woar veur Eddy Ubbink dae zich oetleet euver de zangkwaliteiten

van Rick mit de mededeiling: “Es ich dit zo heur, vonj ich ‘m nog neit ens zo heel sjlech

fluiten.”

Rob Sjulpe