De Sjter 1 oetgesjakeld in kwartinale baeker, maar busreis woar geweldig!
Bo Knoops sjtelt topscorerstitel veilig; Mick Cremers in topvorm; Vacature
nuuje bardame liek ingevuld!
Ut woar aafgeloupe weekend poasje en dus woar d’r unne houp te voetballe veur os
seniorenteams. De veteranen sjpeelden thoes taege Jekerdal en gebroekten hun breije bank
om de wedsjtried in hun veurdeil te besjlisse. Os eesjte sjpeelde in Veghel taege hoofdklasse
koplouper Blauw-Geel 35 minute prima mit, maar moosj doanoa ’t hoofd deip buigen veur
unne baetere taegesjtenjer. Desondanks woort d’r door de mitgereisde supporters zowel in
de bus es in de Brabantse kantine un leuk feeske geboewd. Os tweede elftal houw niks te
voetballe maar zoog waal un aantal sjpelers oethelpe bie ut driede én bovendien un fikse
delegatie aafreizen noa Veghel om de mannen van 1 te supporteren. Ut driede hoalde waer
ens un punt, in de derby taege Urmondia nota bene. De dames sjoomden op noa de 2e
plaatsj op de ranglies mit dank aan un oeteuverwinning, wobie Bo Knoops opnuuj de
volledige productie (4 goale) veur haer raekening noom. En os viefde elftal tot sjlot hoalde,
noa un aantal waeke in un dipje te hubbe gezaete, dit weekend maar leifs 6 punte!
Maar in dit versjlaag, zo wie gebroekelijk, auch waer veul aandach veur ’t randjgebeure. Mit
dees waek onger angere de neit-te-sjtille honger noa sjpeelminute en goal van clubman pur
sang Mick Cremers. Maar auch un antjwoord op de vroag wat in de kop van Sanne
Boelhouwers omgeit es ze mit un sjloapdronke gezich op un toafel in Gronsveld ligk. En
aandacht veur un lovenswaardige insjpanning van Robin Storms in Walonië. En wat te denke
van onthullende foto’s van un feeske bie Jari Knoops thoes. Of van Bastiaan Muijtjens dae
zich binne probeert te lekke in ’t gezin van Christel Vankan en Rudy Crutzen…
Om nog maar te zjwiege van de gebeurtenisse in Veghel dees waek wo Sjteindenaere de DJ-
toafel euvernome, dansten op toafels, klaagden euver ’t Bah-varia beier, un souvenir
mitnome veur thoes én… en passant de vacature van bardame invulden.
Kortom: genog informatie waer om mit uch te deile. Wederom mit dank aan ozze geweldige
reporters rondj de velje.
Veer beginne dees waek bie ozze dames. Die moosjten op poasj-moandig aafreize noa
Gronsveld om te voetballe taege ’n fusieclub mit un aafkorting die mich inmiddels alwaer
ontsjoate is. De dames houwe d’r zin in want d’r besjteit nog ummer un klein kenske op de
titel. Dat enthousiasme en die motivatie woorte perfect geïllustreerd door Sanne
Boelhouwers die zich in ’t kleidlokaal effe rustig op ’n toafel houw gelag om heur gedachten
op ’n riej te zette. Heur ploeggenoten koosjten die gedachten waal roaje en vulden die veur
os in:
Mit un tot op ’t bot gemotiveerde Sanne wisten ozze dames de volle buit mit terugk noa
Sjtein te numme. Dankzij maar leifs 4 (!) treffers van Bo Knoops woorte de punten in ‘n 2-4
euverwinning euver de sjtreep getrokke. Omdat concurrent Caesar onverwachs punte
versjpeelde, sjtoomden ozze dames op noa de 2e plaatsj op de ranglies. Klasse Ladies!
Os tweede elftal houw dees waek niks te voetballe. Un prima moment dus veur Jari Knoops
om ’n feeske te organisere bie heum thoes. Aan de foto’s te zeen eiste dat feeske de
neudige sjlachoffers:
Op dat feeske leet Bastiaan Muijtjens auch tot vervaeles toe aan Jari’s mam Christel weite
dat hae heur héél gaer es sjoonmam wol hubbe. Bastiaans poginge bie Christel’s dochter Bo
sjtrandden al sjnel, maar dat woar veur Bastiaan absoluut gein reje om ziene druim op te
gaeve. Hae richtte zien piele geweun op zien tweede keus:
Un actie die veteranen captain én metro-man-pur-sang Mat Cremers ongetwiefeld zeer kent
waardere.
En es veer ’t dan toch euver Jari Knoops hubbe. Dae hoalde dees waek auch nog ens op
facebook ’t nuujts mit un leuke wetenswaardigheid. Of baeter gezag… unne “tag” door zien
vriendin Minou leverde os verrassende info op euver Jari:
Wie Rene Gooren deze info deilde, leet Jari geliek blieke zeer gecharmeerd te zeen van ’t
oetlekke hievan:
Van os voetballoze tweede elftal goan veer euver noa de wáál voetballende mannen van De
Sjter 3. Die houwe op moandigochtend hunne derby taege Urmondia op ’t programma
sjtoan en woare bovendien zo sjportief om op zoaterdigmiddig hub companen van ut viefde
oet te helpe mit un aantal sjpelers. Ein van die oethelpers woar Mick Creemers, dae dat
auch nog ens oetermate succesvol deig in de zestig minute die ‘m gegaeve woare. Daezelfde
Mick zou op moandig in Urmond de 90 minute vol make veur ut driede, om vervolges door
te rieje noa Buchten om doa nog 30 minute mit te pikke bie ut viefde. Mit anger weurt: Mick
haet dit weekend in drie wedsjtrieje maar leifs 180 minute gevoetbald en doa in auch nog
ens maar leifs 4 goale scoorde! Klasse Mick!
De mannen van drie vonje ’t op poasj-moandig waer ens tied om punte te goan pakke.
Urmondia 2 moosj ut kindj van de raekening waere. Die doelsjtelling woort sjus neit
gehoald. Noa unne sjpannende wedsjtried sjting unne 2-2 eindsjtandj op de borde. Un
heldenrol woar d’r weggelag veur keeper Roy dae unne penantie sjtopte. De goale kome op
naam van Mike Pepels en Mick Cremers, beide keren oet unne assist van Ralph Janssen.
Sjterkste staaltje van sportiviteit bie de mannen van 3 koom echter op gounsdig op naam
van Robin Storms. Dae wol gaer live aanwezig zeen bie de Waalse pijl, en houw doa un
heroïsche bromfits-tocht van 4 oer veur euver:
Van ut driede goan veer door noa de mannen van 5. Die houwe un ontzettend druk
voetbalprogramma mit zowel op zoaterdig es op moandig unne wedsjtried. Gelukkig besjik
os viefde euver un selectie van 25 sjpelers. En dus woare d’r op zoaterdig “sjlechs” veier
sjpelers van 3 neudig om uberhaupt un team op de bein te kenne brenge en moosjten op
zondig drie A-sjpelers en unne veteraan van sjtal waere gehoald om te kenne voetballe. Mit
anger weurt: d’r woar waer ’n sjtortvloed aan aafmeldinge binnegekomme bie de
technische staf. En eigenlijk woare dat allemoal kutsmoesjes euver verjoardage, weekendjes
weg, poasj-eier rape, winkele bie de Ikea enz. enz. De einige dae un goei reje veur zien
aafmelding houw, woar Rick Kostons dae tot euver zien ore verliefd is en dae op dit moment
niks lever wult dan tied doorbrenge mit zien hartje. En dat is Rick natuurlijk van harte
gegund.
Zonger Rick, maar mít Mick, Chris, Roy en Rene van ut driede in de gelederen, reisde ozze FC
Biejeingeraap op zoaterdig aaf noa Zitterd om te voetballe taege Sanderbout. Mark Habets
houw zichzelf un basisplaatsj toebedeild, mede omdat hae maar un hauf oer koosj mitdoon
omdat hae noa Roda ging kieke.
Unne wedsjtried oet taege Sanderbout beteikent veur ozze legere elftalle doorgoans
voetballe taege 12 man óf bie veurbaat al mit 1-0 achtersjtoan. Zo ging ’t auch zoaterdig mit
de mannen van 5. Noa un aantal sjoon reddinge van keeper Kai, ontsjting noa 25 minute
sjpele de eesjte kans veur De Sjter. Mark Habets koom allein veur de keeper en rondde
beheerst aaf: 0-1…. of toch neit? Ondanks dat de grensrechter van Sanderbout neit houw
gevlag, keurde de sjeids de goal toch aaf. Later in de wedsjtried zou dat nog ens gebeure bie
un zuvere goal van Marc Caubo. Maar goud… Mark Habets zoog zien goal aafgekeurd waere,
realiseerde zich dat zien hauf oer d’r op zoot en reep gesjpeeld verontwaardigd: “aan deze
flauwekul doon ich neit meer mit. Ich goan noa hoes.” Mark beinde noa ’t kleidlokaal om
zich kloar te make veur zien bezuik aan Roda, terwiel de sjpeles van Sanderbout ‘m verbaasd
noakeke. De einige medesjpeler van Mark dae woar vergaete dat Mark geweun eerder weg
moosj, woar Devon Moerkens dae zich solidair verkloarde mit Mark en auch van ’t veldj aaf
leep. Gein van Devons medesjpelers deig euveriges un poging om ’n te bewaege om tóch
geweun door te voetballe
Mick Creemers koom ’t veldj in en scoorde mit zien eesjte balcontact geliek de 0-1. Mick
scoorde auch al bienoa de 0-2 mit zien tweede balcontact en ’t woar dus dudelijk dat hae al
prima opgewermp woar. Marc Caubo, dae tegeliek mit Mick woar komme invalle, houw
volges zien ploeggenoten gét langer neudig gehad om werm te dreije. Sjterker nog: wie de
sjeidsrechter noa 93 minute aaffloot woort Marc mit onderkoelingsversjiensele sjnel onger
de werm douche gezat.
Ralph Doek berichtte euveriges dat, aafgezeen van de bedenkelijke sjeidsrechter,
Sanderbout hartsjtikke sjportief voetbalde. Dit woar mit name te danke aan de Sjteinse
femieje Loi (Andy, Joey en Tim) die bie Sanderbout acteerde. Einige sjtevige euvertreding
vonj plaatsj wie Rene Gooren de keeper van Sanderbout wol goan dollen op de achterlien.
Dae besjloot un poging te doon om ’t bein van Rene te amputeren, maar blesseerde zichzelf
doabie.
Oeteindelijk wonnen ozze jonges mit 1-3 dankzij unne hattrick van Mick. Noa aafloup woort
d’r in de kantine nog flinke genoate van de juupkes die bie Sanderbout sjlechs eine euro
vieftig kosten!
Dit oetgebreide versjlaag woort euveriges gemaak door Ralph Doek. Wie hae dat
aanleverde, meinde Rene Gooren ein sjtukske vitale informatie te missen. Hae woort echter
geliek op zien plaatsj gezat door Mark Habets:
Op moandigochtend mochte de mannen van 5 nóg unne keer aan de bak. Dit keer oet taege
HBC. Opnuuj woar d’r un tekort aan sjpelers, maar gelukkig woorte drie A-junioren bereid
gevonje om oet te helpe. En auch de sjriever van dit sjtuk leet zich mekkelijk euverhoale om
nog ens lekker mit te ballen mit dit leuke team. Al woar ’t allein maar om dit inmiddels
beruchte bord in Buchten (dat bezuikers de waeg wis noa de velje wo taege de Sjutterie
kent waere gevoetbald) unne keer mit eige auge te kenne aansjouwe:
Veur ’t vertrek leek ’t d’r in de kantine op dat alle mama’s in Sjtein ens unne keer wolle
oetsjloape want ’t woar unne woare kinjercreche mit kleine Ortmansjes, Habetsen,
Schulpjes en Van den Berghjes.
Tiedes de warming up betrok de loch beheurlijk en vele d’r get druppele oet. Stan Ortmans
sjprook oet: “Ich hoap toch dat ’t dreug blif, want angesj woar ich esnog lever noa de Ikea
gegange mit Ilona.”
De wedsjtried taege de sjutterie van Buchten woort unne sjpannende. De Sjter woar
weliswoar de baetere ploug, maar ut bleef toch oppasse veur ’t fel voetballende HBC. Noa
un hauf oer sjpele woort de ban gebroake door de sjriever van dit sjtuk, dae mit de kop
scoorde oet unne corner van Marco Verhoeven. Nog veur de rus woar ’t Michel Beks dae de
0-2 aanteikende oet unne prima counter.
In de rus woort in ’t kleidlokaal tevreje terugkgeblik op ’n prima eesjte helf. Devon
Moerkens maakte zich op dat moment kloar veur zien invalbeurt en meldde: “Ich goan un
wereldpartie sjpele want ich wul in ’t versjlaag komme.”
De tweede helf bleef De Sjter goud voetballe en dat resulteerde nog in doelpunten van
Michel Beks en Marco Verhoeven wodoor de score woort verdubbeld. Mit name de sjtift
van Michel benaderde de perfectie! Ralph Doek, dae unne prima pot sjpeelde, veel nog op
door zich te manifesteren mit un klein opsjtootje, dat al sjnel gesust woort. Ralph: “Toen
koom effe alle frustratie d’r oet van dat al waeke in un dalletje zitte.”
A junioren Joep, Ennis en mit name Tim sjpeelden unne prima pot en de letste 20 minute
veel Mick Creemers nog in. Én… Mick scoorde auch nog bienoa. Maar oeteindelijk bleef de
score sjtaeke op 0-4.
Mick feliciteerde keeper Kai noa aafloup mit de weurt: “Klasse Kai, alwaer de 0!” Wo op
Mark Habets zei: “Alwaer? Dit is volges mich de eesjte keer dit sezoen dat veer de 0 haute!”
Stan Ortmans woar ’t opgevalle dat d’r noe twee keer op riej gewonne woar en dat dat
toevallig de einige twee kere woare gewaes dat zien vrouw Ilona neit woar komme kieke.
Ralph Doek hoastte zich om te antjwoorde: “Loat heur tóch maar geweun komme kieke de
kommende waeke, Stan. Ut rökskes-waer kump d’r noe aan en veer zeen toch al veilig.”
Noa aafloup toafelden Ivo van den Bergh, Mark Habets, Stan Ortmans en de sjriever van dit
sjtuk nog effe noa en dat woort dusdanig gewaardeerd door de kantinebaas van HBC dat
hae os op get lekkesj tracteerde:
En ondanks dat Mark Habets volop in training is veur unne hardloup-wedsjtried van
kommend weekend, ginge die bitterbel toch mit sjmaak d’r in. En dat moch auch waal want
Mark houw de volledige 90 minute mitgedoan. Ziene zoon River woar doa getuge van
gewaes. Zo reep River hauverwaege de tweede helf op ziene pap: “Pap, wat besse aan ’t
doon???” Wo op Mark houw geantjwoord: “Zo weinig muigelijk, jong.”
Al mit al haet os viefde elftal dit weekend dus grandioos gepresteerd en 6 punte mit noa
Sjtein genomme vanoet Zitterd en Buchten. Klasse mannen! En ’t woar hartsjtikke leuk om
waer ens mit uch te ballen.
Van ut viefde goan veer noa os veteranen. Die houwe op zoaterdigmiddig unne
thoeswedsjtried taege Jekerdal op ’t programma sjtoan. Unne taegesjtenjer wo mit name
Mesjtreichtenaer Steef van de Woude zeer euver te sjpraeke woar. Steef houw veur de
gelegenheid dan auch zien aller-sjiekste ongerboks oet de kas gehoald en showde die mit
gepaste trots aan zien ploeggenoten:
Veur aanvang van de wedsjtried koom sjeidsrechter Robert Kraus, rechsjtreeks van zien
werk de kantine in. Hae besjtelde zich unne hamburger en dat brach Roger Daemen auch op
un idee. Roger doa auver: “ich mot effe waer op wedsjtried-gewich komme.”
Auch Will Leurs koom aanloupe en die aanblik brach Willem Thewissen tot de volgende
noodkreet.
Willem: “Och god, doa kump Leurs! Én die van Jekerdal zeen goud…”
Ron: “Will, wat dachse van un helfke?”
Will: “Ich sjpeel toch ummer un helfke?”
Ron: “Nae un helfke van de eesjte helf, mein ich.”
In ut kleidlokaal woorte de kup geteld en bleek de selectie te besjtoan oet maar leifs 19
sjpelers. Jederein vreesde dus al veur weinig sjpeeltied en dus kome d’r get pesteriekes om
de selectie oet te dunne.
Eddy: “Jonges, ich mot trouwes waal geliek noa de wedsjtried weg.”
Willem: “Angesj gangk noe al, Eddy.”
Ron: “Joa Eddy, zurg dasse neit te laat kumps.”
Leon: “Jonges, loester effe. Hie kump de opsjtelling. Will Leurs sjpeelt linksboete.”
Ron: “Goan veer ze hoap gaeve?”
Willem: “Sjtoan ich d’r in, Leon?“
Leon: “Hubs doe net neit geloesterd? Mot ich dich d’r aaf pakke?”
Willem: “Joa, ich hub net droevesokker gepak en dae wirk nog neit. Dus loat mich maar de
tweede helf sjpele.”
De eesjte helf woar van un bezunjer hoog niveau van de kantj van De Sjter. Jekerdal woort
mit de rugk taege de moer gezat, maar houw geluk dat ’t vizier van de Sjteindenaere nog
neit op sjerp sjting. Mit name Will Leurs leet enkele goeie kansen ligke. Al mot gezag waere
dat Will auch unne keer mit unne onmuigelijke kupbal de lat deig trille. Maar wiejer woar ’t
veur DJ Will unne wedsjtried om sjnel te vergaete. Grensrechter Willy Worms, dae van
kortbie getuge woar van Wills optraeje (omdat Will aan ziene kantj acteerde) woar de
wanhoup noa un hauf oer noabie. Wie vanaaf de bank aan Willy woort gevroag of hae auch
unne kauwgom wol, antjwoordde hae: “Doog mich maar un pak rennies, want ich krieg
boekpien van dae Leurs!”
In de rus woorte 8 sjpelers gewisseld en Gerard Martens leet in woord en gebaar blieke ’t
doa neit mit ens te zeen. Mit sjoon en zukke sjmietend reep hae oet: “Doe mos
godverdomme bliekbaar Sjulpe of Conjour heisjte om bie deze k*t-trainer unne ganse
wedsjtried te moage sjpele!”
De wissels houwe echter waal effect want in de tweede helf denderde de thoesploug euver
de erme gasten van Jekerdal haer. Oeteindelijk bleef de teller sjtaeke op 4-0 dankzij twee
treffers van Levi Nelissen en twee treffers van Stef Conjour.
Noa aafloup in ’t kleidlokaal begoosj Steef van de Woude nog mit Paul Janssen te kalle euver
un gebeure tiedes de wedsjtried.
Steef: “Paul, noe mosse mich ens get oetlegke. Dae keeper is 40 maeter oet de goal, doe
krigs de bal maar doe geis geweun get wachte en sjpeels ‘m dan aaf. Woveur sjuts doe neit
op goal?”
Paul: “Steef, d’r zeen sjpelers die zeen ’t waal nog, maar weite wat hun lichaam neit meer
kent. Zo wie ich. En d’r zeen sjpelers die zeen ’t waal nog en die vergaete dat hun lichaam ’t
neit meer kent en die sjeure zich un sjpierke. Zo wies dich vandaag.”
Stef: “Steef, loat Paul toch. Die mit die kale köp hubbe gein voetbalversjtandj.“
Willem: “En die mit hoare hubbe un dikke pens!“
En mit die conclusie loate veer de veteranen achter en goan veer euver noa ’t einige team
dat nog neit is besjproake: os eesjte elftal. Dat houw d’r dit sezoen un prachtige
baekercampagne opzitte mit un indrukwekkende reeks euverwinninge taege eesjte klassers.
In de kwartfinales moosj men op poasj-moandig aafreizen noa Veghel om te voetballe taege
Hoofdklasse-koplouper Blauw-Geel. Un zeer lestige opgave dus.
Gelukkig woorte os jonges ongersjteund door un grote sjare supporters, wodoor in totaliteit
2 bussen aafreisden noa Veghel. In de ‘serieuze’ bus, wo de selectie van 1 in zoot, aangevuld
mit de mitreizende neit-zoeplep woar d’r al get veursjpas, helemoal in ’t thema van poasje,
mit Peter Janssen en Piet Vos es lijdende veurwerpe:
In de anger bus woorte alle zoeplep biejein geduujd en doa bleef men euveriges auch
geweun binne ’t thema van Poasje:
Veur de wedsjtried woar Sjteins de veurtaal in de Veghelse kantine:
D’r woort sjtein en bein geklaag euver ’t aafgrijselijke Bavaria-beier oet de tap, maar
desondanks woort d’r flink getank door mit name de aafvaardiging van de zoepbus. De
wedsjtried woort dan auch vanoet de kantine gevolg, wodoor de thoesgebleve fans es volgt
op de hoogte gehaute woorte:
Ut verhoal van de wedsjtried is sjnel verteld. Ozze jonges bleve un hauf oer langk leuk
mitdoon en wisten tot dat moment un taegegoale te veurkomme. Doanoa ging ut echter
sjnel. Nog veur de rus wis Blauw-Geel op 2-0 te komme en binne 1 minuut noa rus sjting ‘t
3-0 en woar de wedsjtried gesjpeeld. Omdat de gastheren ’t gaaspedaal bleve intrappe veel
de score oeteindelijk nog vervaelend hoog oet. Get wat ozze jonges, noa zo’n geweldige
baekercampagne, auch waer neit verdeinden.
Desondanks woar de sfeer noa aafloup prima. Zeker noadat Jari Knoops zich euver de
meziekinstallatie ontfermd houw:
Op de tonen van DJ Jari “bal op de poal” Knoops ging ’t beier nóg get sjmakelijker noa binne
en wie Pascal Conjour en De lange Paes bezit nome van un toafel, ging ’t daak helemoal d’r
aaf:
Auch de busreis terugk verleep mit un prima sfeer. En aangekomme in Sjtein woorte nog
effe get cafékes aangedoan door de meeste mitgereisde fans. Joep Nacken deig dat auch, al
ging hae eesj noa hoes om zien zorgvuldig oetgekoaze souvenir in veiligheid te brenge:
Names de ganse selectie van 1 mot ich bie deze nog alle mitgereisde fans heel erg hartelijk
bedanke veur hun sjteun en de geweldige sfeer die ze hubbe verzurg. Klasse werk dames en
heren supporters!
Tja, en dan res os nog de aafsjleiting van dit versjlaag. En die geit dees waek euver ’n
heuglijke mededeiling. Omdat ozze fantastische Marianne, die veurig joar terech tot Sjter-
vrouw van ’t joar 2016 woort oetgeroupe, haet aangegaeve dat ze wult sjtoppe mit heur
kantine-werkzaamheden, sjteit d’r al moanje un vacature oape. Op de website, op facebook,
face-to-face, op allerlei maneiere is ruchtbaarheid gegaeve aan dees vacature. Tot noe toe
echter nog zonger succes. Totdat elftalleiders Peter Janssen en Frans Beaujean aafgeloupe
moandig in ’n Brabantse kantine un gesjikte kandidate taege ’t lief lepe, hun charmes in de
sjtried sjmete en alles in eine keer contractueel in orde maakten:
Maar eerlijk is eerlijk, Marianne, sjtiekem hoap de ganse vereiniging nog ummer das doe d’r
nog lekker un joarke aan vas knuips. Want ozze Marianne wulle veer eigenlijk allemoal veur
gein goud missen. En doa kent zelfs gein goudlachse brabantse blondine verangering in
brenge. Ozze Marianne blif veur ummer ozze nummer 1!
Pes volgende waek!
Rob Sjulpe