liturgi jumat si mbelingbkpbatangseranganmedan.or.id/wp-content/uploads/2020/04/... ·...
TRANSCRIPT
LITURGI JUMAT SI MBELIN Tema
“Eli, Eli, Lama Sabakhtani” TANGGAL 10 April 2020
A. PERSIKAPEN
Ertoto Guna rekamen Kebaktin
B. KEBAKTIN
1. Kata Penaruh
Runggun gereja bagepe kerina si ertugas i bas wari si sendah ngataken
mejuah-juah man banta kerina. I bas wari enda icidahken Dibata me kuasaNa
man banta arah kematen AnakNa si Tonggal e, eme Jesus Kristus.
KematenNa jadi kahulta, gelah kita anak-anakNa si arusna iukum erkiteken
dosa-dosanta banci ndatken kegeluhen si mbaru. KematenNa e, ningetken
kita maka kita rutang man Dibata erkiteken kekelengen si enggo i sehkenNa
man banta bagepe doni enda. Utangta eme nehken kekelengen man doni
enda dingen ikut mersan kayu persilang Kristus.
• Rende : ……….. (Serayan Kebaktin Bengket ku Mimbar)
KEE No. 264 : 1, 2, 3 “Ateku Tedeh”
1. Ateku tedeh man baNdu o Tuhan,
Malem me ateku jumpa si erkuasa.
Aku megegeh di ras Kam o Tuhan,
Sabab Kam me kapen ulu si nasana.
Refrein : Ku begi kataNdu, kata tuhu-tuhu,
Keke me ukurku nehken peratenNdu.
2. Terang kataNdu, nerangi pusuhku
Pusuh jadi senang, ergiah geluhku
Gelah si mbaru, berekenNdu bangku
Labo aku talu, meriah ukurku Reff ...
3. Ib’reNdu pedah, kuakap pe megah
Tambah pengertin, ‘dat kiniulin
Tambah pemeteh, turah kapen gegeh
pemereNdu sampur, ras kusehken bujur Reff …
2. Votum - Salam
L I bas gelar Dibata Bapa si erdiate dingen ngkelengi tinepaNa, i bas gelar
AnakNa Jesus Kristus si enggo ngasamken KesahNa guna nebusi
manusia, ras i bas gelar Kesah si Badia si mereken gegeh man banta guna
mersan kayu persilang.
Mejuah-juah man banta kerina anak-anak Dibata si lit i bas persadan ras
Kristus Jesus. Amin.
P Amin ….. Amin ….. Amin …..
3. Berita Perbahanen ras Sura-sura Dibata (Invocatio)
L “ Seh kal kejamna perbahanen man bana, tapi igengkenna, janah sinik
saja ia. Bali ras anak biri-biri si nandangi igunting mbulu, la sitik pe ia
ersumekah” (Jesaya 53 : 7).
Erpalasken Kata Dibata enda, sipuji IA alu radu ras kita ngendeken :
KEE No. 321 : 1, 2 “Sisembahlah Min”
1. Si sembahlah min Tuhan si mbelin.
Endeskenlah min, enden-den pujin.
Tuhan Dibatanta ingan cicio.
Sembahlah Ia ola kita menggo.
2. Sipembarkenlah kinimbisanNa
Sinalsal terang e me pakenNa
Megang soraNa bagi lenggur kepe
Kalisung-sung e pe ibentasiNa
4. Ende-enden Pujin
L “O Tuhan, keleng ateNdu seh ku langit, kesetianNdu seh ku awang-
awang. KebenarenNdu seri ganjangna ras deleng, kinibujurenNdu seri
bagesna ras lawit, manusia ras rubia-rubia ipekena-kenaNdu o Tuhan.
O Tuhan andiko ergana keleng ateNdu e, ikawaliNdu aku i teruh
kabengNdu”.
5. Pertoton Perpulungen Guna Ngendes Man Dibata
L “Aminna pe kita dem alu kesalahen, erbahan si la ngena ate Dibata
segedang-gedang wari, tapi Dibata e tetap engkelengi kita. Perkuah ateNa
tetap simpar i bas kegeluhenta. Emaka gundari mari dage si pake waktuta
guna bengket ku bas paksa teneng, guna rukur kerna kinilangasupenta
ndalinken si ngena ate Dibata.
(Paksa Teneng, Ertoto Sekalak-sekalak i bas pusuhna)
6. Pengakun Dosa
L “Kalak jahat megiken pengajuk dosa seh ku bas pusuhna, sitik pe la ia
mbiar man Dibata. Erkiteken meganjang iakapna bana, iakapna maka la
ieteh TUHAN dosana janah la iukumNa. Rananna jahat janah melala
takina, si mehuli dingen pentar la nai ia nggit ngelakokenca” (Masmur
36 : 2 - 4).
Tole mari kita ngakuken dosanta arah ende-endenta :
KEE No. 207 : 1, 2, 3 “I Uruk Golgota”
1. I uruk golgota, ku idah silangNdu.
Dosangku si ma jekkenca, silangNdu e Tuhan.
Refrein : Reh. Aku Tuhan ngadap man baNdu.
Yesus dudurken tanNdu alokenlah aku.
2. Kubegi soraNdu,
Erlebuh man bangku,
‘Lah aku pe I Golgota,
Ngendesken geluhku. Reff
3. Di latih kin gia,
Nggeluh bas dosa e,
Ernalem man baNdu ngenca,
Je malem ate e. Reff …
7. Berita Pengalemi Dosa
L “Terpujilah Dibata erkiteken kiniulinNa si mulia, si icidahkenNa man
banta arah pemerenNa i bas anakNa si ikelengiNa. Sabab erkiteken
Kristus kita enggo itebusi, eme dosa-dosanta enggo i alemi Dibata”.
Malem kal eteta erkiteken dosanta enggo ialemi Dibata, e maka sipuji IA
alu ras kita rende i bas :
KEE No. 304 : 1, 2, 3 “O Tuhanku O Dibatangku”
1. O Tuhanku, o Dibatangku,
rusur aku nimbak pedahNdu.
Nggo meluat k’rina geluhku,
labo dame banna pusuhku.
2. O, Tuhanku, o, Dibatangku
Kutungtungken ukurku
baNdu
Ras mekuah ateNdu aku
Sasapkenlah salah dosangku
3. O, Tuhanku o, Dibatangku
Kuikutken pedah-pedahNdu
Ras pembarken kinirajaNdu
Janah tetap jadi saksiNdu
8. Kata Dibata
a. Marilah sibegiken Kata Dibata si man ogenken ibas Kebaktin enda sini ibuat
ibas Heber 10 : 19 - 29. ( Tunggal )
Sideherilah Dibata
L Dage erkiteken kematen Jesus, o senina-senina, enggo bebas kita
bengket ku bas Ingan Sibadiana kal.
L Enggo italangi Jesus man banta sada dalan si mbaru, sada dalan si
nggeluh, arah kire-kire, e me kap kulaNa.
L Lit Imam si Mbelinta; e me si jadi kepala i bas rumah Dibata.
L Dage sirembakkenlah dirinta ku Dibata alu tutus ate dingen kiniteken si
tetap. Alu pusuh peraten si bersih i bas penggejapen ersalah nari, bage pe
alu kula si enggo ibersihken alu lau meciho, sideherilah IA.
L Tetaplah si gelem pengarapen si enggo siakui, sabap tek kita maka
isehken Dibata nge padanNa.
L Marilah kita sisampat-sampaten gelah keke ukurta guna nehken keleng
ate ras ndalanken si mehuli.
L Ola kita la reh ku perpulungen, bagi si ibahan piga-piga seninanta. Tapi
lebih asa si e siiah-iahenlah kita sabap sieteh maka wari Tuhan, e me wari
kerehenNa, reh me.
L Sabap adi tetap denga kita sengaja erbahan dosa, aminna pe enggo
sieteh kai si ngena ate Dibata, lanai lit persembahen si deban si banci
nasapken dosanta.
L Si lit denga e me si man kebiaren si nandangi jadi: ukumen ras api si
merawa si engkernepken kalak si ngelawan Dibata!
L Si la patuh man Undang-undang Musa iukum seh mate, alu la lit
ampunen, kenca tereteh salahna arah dua ntah telu kalak saksi.
L Apai denga ka kalak si la ngergaken Anak Dibata sitik pe! Kalak si
mekarus nandangi padan Dibata si enggo mbersihken ia i bas dosa nari!
Si megombang nandangi Kesah Dibata si melias man ia! Gejaplah maka
ndauh beraten ukumenna!
Ketuahen me kalak si megiken kata Dibata dingen si makekenca i bas
kegeluhenna si teptep wari. Haleluya.
P Haleluya…. Haleluya…. Haleluya….
b. Khotbah : Matius 27 : 45 - 56
9 Pengakun Kiniteken
10 Persembahen
L Seh paksana kita nehken persembahen pengataken bujurta man Dibata.
Kata Dibata si jadi palas i bas kita nehken persembahen, niNa :
“O senina-seninangku, nginget perkuah ate Dibata si mbelin si
isehkenNa man banta, kupindo man bandu: Endeskenlah kulandu man
Dibata saja selaku persembahen si nggeluh rikutken si ngena ateNa.
Sabap bage me arusna kam ersembah man Dibata sue ras biakndu selaku
mahluk si rukur”
Iherta ngendesken persembahen, ras kita rende arah :
KEE No. 379 : 1, 2, 3 “Tuhan Tetap Nemani Geluhku”
1. Tuhan tetap nemani geluhku,
dingen mereken dalan man bangku.
Ernalem gelah tetap ras ertoto man baNa,
Tuhan tetap nemani geluhku.
2. Tuhan tetap nemani geluhku
Dingen mereken dalan man
bangku
Tedeh ate tendingku
ngidah kemulianNdu
Tuhan tetap nemani geluhku
3. Tuhan tetap nemani geluhku
Dingen mereken dalan man
bangku
enda me keg’luhenku
kuendesken man baNdu
Tuhan tetap nemani geluhku
Pertoton Persembahen ras Syafaat
10. Perpadanen Man Dibata
L Turang ras senina, perkuah ate Dibata si mbelin enggo sialoken. Jesus
nggit jadi kahul man banta gelah kita terkelin. Erkiteken si e kita rutang
sikeleng-kelengen i bas doni enda.
P Bujur Tuhan i bas perkuah atenNdu si mbelin si enggo ku aloken. Aku
erpadan maka kekelengenNdu ku sehken pe man doni enda.
L Turang ras senina, kematen Tuhan Jesus e mereken usihen man banta i
bas ermeteruk ukur, setia ras nggit mereken dirindu guna kiniulin
enterem jelma ras doni enda.
P Erpadan aku Tuhan ngusih Kam i bas ermeteruk ukur, setia ras nggit
mereken dirindu guna kiniulin enterem jelma ras doni enda.
L Turang ras senina, i bas kematen Jesus, kita enggo nggeluh i bas geluh si
mbaru.
P Erpadan aku Tuhan i bas ndalani wari-waringku, tetap nggeluh nandangi
si ngena ateNdu.
L Sipepaguhi perpadanenta arah enden-endenta :
KEE No. 324 : 1, 2, 3 “Tuhan Kap Penalemenku”
1. Tuhan kap penalemenku,
Ia sinjayam geluhku.
Iakap pe sekawalku,
la nggo kekurangen aku.
Refrein : Tuhan si mada si nasa,
Tuhan saja si pehaga.
Muliakenlah gelarNa,
mari puji sembah Ia.
2. Kune jumpa si mesera
Kiniteken lab opera
tetap aku sampatiNa
K’leng ateNa la erleka Reff …
3. Nggo terkelin jine aku
Arah perkuah ateNdu
PeratenNdu kudalanken
G’luhku e kupersembahken Reff …
3. Pertoton Tuhan
4. Pengutusen Ras Pasu-pasu Dibata
L Bengketlah ku bas kegeluhendu sekalak-sekalak. Cidahken kesetian ras
ketutusen atendu ngikutken si ngena ate Dibata i bas geluhndu. Guna si
e, alokenlah pasu-pasu idur Dibata nari :
“Ipasu-pasu janah ikawali Dibata kam; siang ayo Dibata ersinalsal
ibabondu; janah melias ateNa man bandu itatap Dibata ku kam, janah
malem atendu ibahanNa” Amin. (Bilangen 6 : 24 - 26).
P Amin… Amin… Amin… (iendeken)
Pdt. Tanda Pinem
GBKP Rg. Jl. Sei Batang Serangan