oud affiebond · mekaar op nuweland gepak het. nóg ‘n oud-affie wat vanjaar sy super-rugby...
TRANSCRIPT
Oud-Affiebond
Algemeen
Die OAB wens alle oud-Affies sterkte en voorspoed toe vir 2016, mag dit ‘n
geseënde jaar vir elkeen wees!
Die skool se 96ste bestaansjaar het met volle vaart afgeskop en die Affies
moes op elke terrein woeker om voor te bly. 2016 het getallegewys twee
nuwe rekords opgelewer: 313 graad 8's en 1 299 seuns in totaal in die skool.
Talle aanpassings moes gemaak word om soveel seuns te kan
akkommodeer. Daar is selfs 'n nuwe tydelike koshuis ingerig, onderwysers
deel klasse, ens. Die koor is onder leiding van ‘n nuwe dirigent, die atletiek-
en sweminterhoërs is reeds afgehandel en die hokkie- en rugbyproewe is
ook agter die rug. Die nuwe kunstekampus is met groot fanfare ingewy en
die nuwe koshuis, Huis Kruger, is ‘n reusesukses.
Voorsittersverslag van 2015
Al ooit gewonder waarmee die OAB-bestuur hulself besig hou? Wil jy graag
weet wat beplan word? Lees gerus hierdie verslag wat jou duidelikheid op
hierdie vrae sal gee.
OAB-memorabilia en klerasie
Die OAB het nou `n aanlynwinkel op Alumnet. Skakel in om die aanlynwinkel
te besigtig.
Nuwe OAB-voorsitter
Philip Roesch (matriek 1991) is tydends die
Algemene Jaarvergadering as nuwe Voorsitter
van die OAB verkies. Hy verskyn hier saam met
sy seun, vanjaar in graad 10, en sy pa, Ned
Roesch, skoolhoof van Affies van 1974 tot
1984. Die bestuur van die afgelope twee jaar
het hulself weer verkiesbaar gestel, sodat die
momentum van die laaste paar jaar behou kan
word.
Vrydagkuiers
Die OAB wil graag `n platform skep waar ons by restaurante en kuierplekke,
wat aan oud-Affies behoort, op ten minste een Vrydag per maand
bymekaarkom vir `n koue een. Die eerste van hierdie kuiers vind op Vrydag,
11 Maart, by Fritz Brüne se
Baracas, in Pretoria plaas.
Hierdie informele
byeenkomste moet ook in
ander stede plaasvind.
Skakel gerus vir Ben Moodie
by 082 858 5449 vir meer
besonderhede.
Melktertdag
Die Affie-ma's en die OAB
het sowat 1300 seuns op
29 Februarie met melktert
trakteer. Meer as 600
melkterte is na die skool
gebring ter viering van
Nasionale Melktertdag. Elke seun het `n sny ontvang en daar is vir die
matrieks van die AHMP en naburige laerskole se personeel ook melktert
geneem.
DAGBOEK ASB:
Vrydag 5 Augustus 2016: Oud-Affiedinee
Die dinee sal weer op die vooraand van die jaarlikse derby teen Boys High
plaasvind. Die Bond wil graag soveel as moontlik oud-leerlinge daar sien –
oud en jonk! Meer inligting sal volg.
Vrydag 6 Mei 2016: Oud-Affies en oud-Greys, gholf
Daar word beplan dat twee Affie- en twee Grey-manne mekaar die stryd in
elke vierbal sal aansê. Die volgende dag is dit interskole teen Grey by Affies.
Sodra die gholfreëlings met Grey gefinaliseer is, sal meer volledige inligting
gekommunikeer word.
Reünies
Neem asb. kennis dat die
Affies/Boys High-naweek vir
2016 reeds deur die 1986- en
1966-groepe bespreek is. Die
skool kan slegs twee
reüniegroepe per naweek
hanteer. Reüniereëlings word
deur Dirk Taljard (082 770
4290) hanteer.
Oud-Affies
Gholf
George Coetzee (2004) het die
Dimension Data Pro-Am (18-21 Feb)
op Fancourt gewen, en selfs 'n "hole-
in-one" op 'n syfer drie aangeteken.
Hy het met ware Affie-guts oor die
naweek tellings van 64 en 66
aangeteken, om die toernooi met 'n
telling van 21 houe onder baansyfer
te voltooi. Om die toernooi te wen, moes George op die laaste putjie 'n arend
op die syfer 5 aanteken. Hy het op die Saterdag én Sondag van die toernooi
sy rondes afgesluit het met 'n voëltjie op 16, 'n voëltjie op 17 en 'n arend op
die 18de putjie. Hy slaan hierdie week af in die Investec Cup op Melvale, ‘n
privaatbaan in die finale toernooi van die Sonskynreeks hierdie jaar, met ‘n
prysgeld van R10 miljoen wat tussen die 16 deelnemers gedeel sal word.
David Malan
Oud-Affie David Malan (2010) is
tans deel van die 55ste Suid
Afrikaanse Antarktiese Ekspedisie
(SANAE) oorwinteringspan. Hy
het groot moeite aangegaan om ‘n
Affie-vlag saam te neem op sy ekspedisie – sekerlik ‘n eerste vir ons vlag.
Ben Schoeman
Ben Schoeman speel Tchaikovsky se eerste
klavierkonsert op Vrydag 11 en Sondag 13
Maart in die Brooklyn Teater. Beethoven se
sesde simfonie is ook op die program. Volg die
skakel om kaartjies aan te koop.
André de Wet
André de Wet (1984)
was onlangs
instrumenteel met die
opstel van 'n nuwe
Guinness-
wêreldrekord wat nou
aan SA behoort. 415
vlieër-surfers het by
die strand in Tableview, Kaapstad, 'n nuwe rekord in die Virgin Kite Surfing
Armada opgestel. Hulle het daarin geslaag om die meeste vlieërs te wees
wat gelyktydig oor ’n myl in die lug is. Die vorige rekord was 352 wat deur
Spanje gehou is. André het 18 maande lank gewerk om dit reg te kry.
Devon Hofmeyr
Devon Hofmeyr (2012) is eersdaags in die rolprent
Mignon “Mossie” van Wyk te sien. Dit is sy eerste groot
rol. Devon het vir die eerstespan waterpolo en rugby
gespeel. Hy het tot onlangs nog gehelp met afrigting by
die waterpolo.
Oud-Affiepersoneel by AHS
Mnre. Colin Fouché (geskiedenis), Gideon van Zyl (Afrikaans) en Hanco
Deale (Wiskunde-assistent), al drie van die 2011-groep, is in 2016 tot die
personeelkorps toegevoeg. Daar is tans 11 oud-Affies aan die skool
verbonde!
Rugby
Oud-Affie voorrymanne en
broers, Juan (2009) en Pierre
Schoeman (2012), is by
onderskeidelik die Haaie en die
Bulle se Super-rugbyspanne
ingesluit. Juan was na skool vir
5 jaar by die Bulle en het in
Julie 2015 by die Haaie
aangesluit, vir wie hy reeds
verlede jaar uitgedraf het.
Pierre is nou in sy vierde jaar
by die Bulle en het vir al hulle
ouderdomspanne uitgedraf. Hy
het in 2015 sy buiging vir die Curriebekerspan gemaak.
Twee Oud-Affies, Jannes
Kirsten (2011) en RG
Snyman (2013), het op 26
Februarie hul Superrugby-
debuut gemaak toe die
Bulle en die Stormers
mekaar op Nuweland
gepak het.
Nóg ‘n oud-Affie wat vanjaar sy Super-rugby buiging maak, is Jean Droste
(2012) wat by die Sharks gekontrakteer is.
Verskeie ander oud-Affies verteenwoordig provinsiale spanne in die
Superrugby-reeks.
Krieket
AB de Villiers (2002) het op 14 Februarie die sesde Suid-Afrikaner geword
wat in 200 eendagwedstryde vir sy land gespeel het. AB, die kaptein van die
eendagspan, is ook onlangs as die Suid-Afrikaanse toetskaptein aangestel,
wat beteken dat al die Suid-Afrikaanse krieketspanne deur oud-Affies
aangevoer word. Sy tydgenoot, Faf du Plessis, is die kaptein van die SA T20
-span.
Oud-Affie Leus du Plooy (2013) het op 3
Maart sy debuut vir die VKB Knights in hul
Sunfoil-reeks wedstryd teen die Unlimited
Titans op Supersportpark gemaak. Een van
sy opponente in die wedstryd was niemand
anders nie as oud-Affie Heino Kuhn (2002).
Heino het sy buiging vir die Proteas in 2011
gemaak, vir wie hy in vyf T-20 wedstryde
gespeel het. Hy nader die einde van sy
loopbaan wat hy reeds in 2004 by die Titans
begin het. Hy speel in 117 eersterangse
wedstryde (7 850 lopies), 124
eendagwedstryde (3 144 lopies) en 68 T-20
wedstryde (1 087 lopies) vir die Titans.
Lief en leed
Die Bond betuig sy innige simpatie met die naasbestaandes van:
Rousseau Snyman van die 1959-groep
Gert Hugo van die 1981-groep
Charles Ceronio van die 1958-groep wat op 15 Desember 2015 oorlede is.
Willie Schoon van die 1961-groep wat op 10 Januarie 2016 oorlede is.
Dr. Bennie Cilliers van die 1973-groep is op 28 Januarie in `n plaasaanval
buite Rouxville vermoor. Hy het op die dorp en in die omgewing as
huisdokter praktiseer. Volg die skakel om die nuusberig te lees.
Die bekende historikus dr. Cas Bakkes is vroeg in
die jaar in die ouderdom van 90 jaar in die Paarl
oorlede. Dr. Bakkes was in 1942 in Affies in matriek.
Hy het die skool in 2008 vir die laaste keer voor sy
verhuising na die Kaap besoek om 'n kontantprys te
oorhandig wat hy vir prestasie in Geskiedenis
geskenk het. By dié geleentheid is hy deur sy seun,
prof. Johan Bakkes, vergesel. Die Bond betuig sy
simpatie met sy vrou, Margaret Bakkes, en sy drie
oud-Affieseuns: Johan, Marius en Christiaan.
Skoolnuus
Algemeen
Affie-kunstekampus
Die onthulling van die
gedenksteen van die Affie-
kunstekampus het
saamgeval met die viering
van Affies se 96ste
verjaarsdag. Na die
onthulling is die gaste op
verversings trakteer wat deur die OAB voorsien is. Die kunstekampus is op 2
Maart vir die eerste keer tydens `n glansgeleentheid amptelik in gebruik
geneem. Talle Affie-musikante, die orkes, koor en A-minere het vir vermaak
gesorg.
Schalk Viljoen
Schalk Viljoen, ‘n graad 11-
leerling, is op 22 Januarie baie
ernstig beseer toe hy voor die
skool deur 'n bus raakgery is. Hy
moes ‘n operasie ondergaan om
drukking op die brein te verlig, wat
suksesvol was. Hy is daarna in 'n koma gehou om die herstelproses aan te
help. Oud-Affierugbyspeler Fourie du Preez, en die bekende sanger Bouwer
Bosch, het vir Schalk in die hospitaal gaan kuier. Schalk het egter baie goed
herstel en sterk tans tuis aan. Hy sal eers weer in die tweede kwartaal by die
skool aansluit.
Huis Kruger
Die AHS-trust het in Junie
2015 ‘n huis, wat aan ‘n
voormalige
beheerliggaamvoorsitter, wyle
mnr. Jackie Kruger behoort
het, in Arcadia gekoop. Mnr.
Kruger het die beheerliggaam
van 1992 af in die nuwe
onderwysbedeling ingelei. Die huis is na mnr. Kruger vernoem en is vanaf
Januarie voluit in gebruik met 18 seuns wat daar woon.
Kultuur
Kyk gerus na die opkomende kultuuraktiwiteite op die skool se webwerf.
A-minere
Die FAK het 'n prestige-toekenning aan die skool se acapella-groep, die A-
minere, toegeken vir hul bydrae tot 'n opname van Afrikaanse volksmusiek.
Die cd, wat talle Suid-Afrikaanse kunstenaars se vertolkings van
volksmusiek bevat, kan by me. Estelle Matthee bestel word.
Koor
Die koor staan vanjaar onder leiding van mnr. AJ Maree, ‘n talentvolle
Wiskunde-onderwyser by Affies. Die A-minere is reeds sedert 2010 onder sy
bekwame hande, en vanjaar neem hy ook die leisels van die Rooidasse oor.
Sport
Kyk gerus na die opkomende sportaktiwiteite op die skool se webwerf.
Atletiek
Die atletiekseisoen is afgeskop met die jaarlikse
interhuis saam met die leerlinge van AHMP. Die
koshuis het oortuigend gewen met hul prestasie
op die baan en veld, sowel as op die paviljoen.
Na talle vriendskaplike byeenkomste het die B-
span die Pretoria B-bondinterhoër op Pilditch
ingepalm. Die A-span het by die A-bondinterhoër
met die Pretoria-skole afgereken. Op 1 Maart het
die A-span weer in die stryd getree, hierdie keer
by die jaarlikse NWU-PUK interhoër in
Germiston. Beide die seuns en dogters van
AHMP kon daarin slaag om hierdie byeenkoms te wen. Die o/17-aflosspan
slaag daarin om rekords, wat al jare staan, te verbeter by beide die Pilditch-
en Germistonbyeenkomste. Hulle kan hier in aksie gesien word.
Krieket
Die eerste krieketspan het ‘n
baie suksesvolle seisoen
agter die rug. Drie uit die 19
wedstryde wat gespeel is het
uitgereën en die span het 15
gewen. Die jaar het afgeskop
met ‘n toer na DHS vir die
viering van hul 150ste
bestaansjaar, waar daar teen Northwood, Hilton, Michaelhouse en Westville
gespeel is. Verder is daar aan die tradisionele liga-wedstryde deelgeneem.
Die seisoen is afgesluit met ‘n toer na die Kaap waar daar kragte teen
Rondebosch, Wynberg en Paul Roos gemeet is. Te midde van al hul
wedstryde het die span ook aan Krieket SA se T20-toernooi deelgeneem en
kon hulle vir die eerste keer in sewe jaar daarin slaag om die finaal (teen
Garsfontein) te wen (lees meer hieroor). Daarna het die eerste span sy
segetog voortgesit deur Middelburg in die finaal van die Coca-Cola
Provinsiale T20-toernooi te klop om die Titans-wenner te word. Hierdie
oorwinning het tot gevolg dat die span teen die wenners van die Cobras,
Warriors, Lions, Dolphins en die Knights te staan kom om hul provinsie te
verteenwoordig.
Swem
Affies het, soos elke jaar, aan die A- en
B-sweminterhoër deelgeneem. Affies
eindig in die derde plek by die B-
interhoër en word met die silwer
medalje beloon by die A-interhoër. AHS
het ook aan die Johannesburgliga se
interhoër deelgeneem en eindig in die
derde plek.
Waterpolo
Die eerste span het 'n baie
geslaagde deelname aan die
Grey Kollege-toernooi gehad.
Die eerste span:
wen teen Pearson, 12-3
verloor teen Clifton, 3-8
wen teen St David's, 6-5
wen teen Grey Kollege, 8-3
wen teen Selbourne, 6-3
verloor teen DHS, 4-7
wen teen Glenwood, 4-3
AHS eindig 3de uit 16 skole
Alumnet
Die OAB het jou hulp nodig in die opdatering van die oud-
Affiedatabasis.
Ons wil graag jou korrekte besonderhede hê ten einde kommunikasie en
reünieskakeling te vergemaklik.
Dateer jou inligting soos volg op:
Volg hierdie skakel na die Alumnet-databasis:
Die skakel maak op ‘n intekenblad met die oud-Affie wapen oop. Gebruik die
e-posadres waarop u hierdie nuusbrief ontvang het as e-pos. Klik op die
“Nog nie geregisteer nie” knoppie. Die stelsel maak ‘n venstertjie oop waarin
jy jou wagwoord kan insleutel en bevestig. Volg die eenvoudige aanwysings
terug na die intekenblad. Jy kan nou jou profiel volledig op datum bring.
Die Affies Alumnet Databsis word deur ons borge ondersteun. Indien jy jou
besigheid blootstelling op hierdie unieke platform wil gee, volg hierdie
skakel of maak kontak met Tobias Lubbe.
Ons maak staat op u betrokkenheid en ondersteuning.
Niel Coetzer en Dirk Taljard
Namens OAB-bestuur
10 Maart, 2016
Nuusbrief
Belangrike datums:
27 Apr - 2 Mei Koor: Kaaptoer (kontak Estelle Matthee vir inligting)
11 Mei Skool se opedag
6 Mei Affies-Grey Interkultuuraand (kontak Estelle Matthee)
Oud-Affies en oud-Greys, gholfdag
7 Mei Interskool, Grey Kollege (tuis)
21 Mei Interskool, Waterkloof (weg)
5 Aug Oud-Affiedinee
Ons doen vriendelik beroep dat nuus aan die skakelkantoor deurgegee
word sodat ons dit met die oud-Affiegemeenskap kan deel. Ons
verwelkom met graagte enige voorstelle of advies ter bevordering van
die OAB.
Lede van die 1955-groep
Juan en Pierre Schoeman
Jannes Kirsten RG Snyman
Leus du Plooy