PHUK LAI GAU LAI VAX GLAWK RA

Cub caw jhawp pingya Meung vax pa yuh-yeen lih

2

Lai Vax in: māwh ngai: lai pa hoik tat tix dēuh lox, kīeh māwh lai Vax yam yūh bang: kum: daux kaung: Moeg nu daux 1990 num khix (1) 15 hoek 25 ngāix. Phuk lai in: māwh lai pa yūh ex son sang chix ka lai Vax ku kaux, caw tix gau tix chix mīex mai: kawn: sivoe heue. 5Yeen lih bawg - (4) 5Num - 2013 5Yeen lih - 2000 5Dee yuh phuk lai -Num pang ting kaing Veng Pang Sang: Meung Vax 5Cao tiiem lai - Ngox Kat 5Cao tawk cag(Computer) - AiKaw Nhuawa Maw Vet

3

TAX CAO NYI LAI

4

LAWG (1) TAX CAO NYI LAI:

Tax lai: hoik thai: krax ot Vax Sim: sai: Ai nyi ang: lai khi:. Eep sawm: rawm: nyāux kīeh awm: pāox. Tāoh klawng: gawng prāix hoik yien: yawg. Dawg māwh rhawm: keud Tax nyi lai:. Kai kui: tui: lox ang: cot pui. Ot shia: dia: prēh, mai: Tax lai:. Ngai: jhak rhawm: jhim: Tax nyi lai:. Kai: hak tiex Vax ang kīeh nai:. Cox bre ku ceu, māwh mūah tix reu ceu tix mu.: Tēh taux saux yum, ang: kīeh koe:. Num: rang: pang: braik plaik daux lai. Tax lai: ngai: jhak piang gawng Vax. Kīeh krax law li doh ku klawng:. Gawng prāix meung Vax Tax lai: kīeh māwh, dee tai khaox gīx dee plix mau kawn. Tax lai krai ex mhong:, ot rong: tiah yūh tix māwh laux. Ot lat kraux yūh māwh cao mi.

Ciao: kab lox, Ngox kat

2000 num khix 6

5

TAX LOG PANG:

6

LAWG 2

TAX LOG PANG:

Tax pang: māwh rang: ting meung Vax Piang gawng piang lua hoik doh krax cheu: kheu: jao pa keud sawn: Tax pang:. Lang: rhawm: mhawm: keud son meung Vax. Eep sawm: rawm: nyāux koe: ku nyiiex Priēx ih nyiiex ot hoik loh tix Tax pang: sidiex, ih rhawm: pāox. Yūh awm: nyiiex tix lhang: prang: tix gawng:. Lai ling ing: tiang ang: lai lhat. Mat saux Tax pang: ang: kīeh koe:. Kawn: doe:, pui loeg, cha:, mi ang: pi kix. Chix keud chix sawn: kawn: pui mhawm:. Ang: gūah ceu pui, ang: gūah ru, been Tax yāx paw pi prah. Ah lox awn: sawn: pāox lhak. Ciao: kap Tax Ngox kat 2000 num khix 6

7

LAWG 3

GRAWNG BĀUX YAM PRĀIX KLAWNG: BĀUX RĀUX,BĀUX RUNG, BĀUX KUAT.

Bāux yam rāux jāh daux khix-5-hoek daux khix 9, lhiex līh daux khix 5 kawn: pui sum: to: ma:, nghox, sivawng, khawx, koi:, dauxkhix 8, rawm: pai: vai līh ku gawng ku klawng: jāh khix -8-kawn: pui teei to: ma: khraox, awm: koi: si vawng khankix, phan: māwh nghox khraox jāh tix kaux daux khix dim: heue. Bāux yam kuat jāh daux khix-10- hoek khix-2- kawn: pui jāh tix sum: to:rung daux khix –9- haok khix 12, si daing: kuat, līh rawm:sidap, rawm: si-mawg, rha:, kawn:pui daing: ki kaing yam an:, jao

khrawm: can ceu plīx pa sum: pa van:tix heue. Bāux yam kuat kawn: pui daing: phlu: tix co ngu kheu: sidaing:

8

kuat, mai: ceep sibēx pu khlax pu, bawg yam in: pui sum: taux lhax mai: lhax sioe: ku ceu heue. Bāux yam rung jāh daux khix -2-hoek khix -5-sidaing: siaoh sidaing: mai prāix klawng: mai: koek ka sidaing: hax lhak khaox lhax ox, khrum: khaing: kak tix.kawn: pui sidaing: heem: rawm: mai: sawg tix ot greem: vui khaox, dee sidap, dee phlu: bhaung: mai: daing: līh hu: sawg vhi: yūh laih lai plak prāix, yam an: caw bawg yam ang: pui lai tien, son kaing gha: ma: hu: tix, paug, pai: khawp nyhee: daux kaing pa yūh tix heue.

LAWG (4)

PUI VAWK RHAWM: YĀOX KRAX YUM.

Dīx dīx koe: sox prāix tix mu: sox prāix an: koe: rhawm: pa vawk ka piang pāox grawm tix cak mai: ah nin: ka cak an:“pāoxgrawm cak eue:, ka daux tiag tix dah aux yāox dee koe: rib mai: rawm: mai: sidaing: mhawm: heue: Son sang hu: ka daux tiag an:, aux thong: māix hu: mai: jhi: māix yāox daux krax awx”

9

Khaix hoik jhi: sox prāix cak yāox daux krax, cak hu: teei tix sawm: rib prāox ku: singāix heue. Yam an: ciao: yūh kaung: tix kaux yāox cak an: mai: taong: tix een: jhawk mai: jhawk taong: nawh an: krix ka cak heue. Yam yāox sox prāix krix cak ka jhawk, sox prāix hoik vhax rhawm: vhax rhi: ka ceu pa keud tix heue. Cak an: ah nin: “pāox grawm sox prāix eue: son sang luad luan aux khaing: jhawk in: teem: coi ka aux liak, aux khiox khaw: ka māix heue.” Sox prāix ah nin: pāox grawm cak eue: jhawk in: aux sang chix kraing dud yūh ka mawx, khaix hoik ah nawh nin: sox prāix an: to: tix mox ka daux yeem mai: pau tix jhak ka cak heue. Yam in: son sang kiied aux tix ih cak, ang: tau tix nyiang chix, phan: aux kiied nawh yum yam in:, tix blah teu ce aux māwh pa pie pa lhen: ka piang pāox

10

grawm tix, sox prāix keud yūh nin: daux rhawm: tix heue.

Māwh kheu: nan: phan: nawh tang: yum ciao:, aux tag sang teei tix ih nēx nawh, sox prāix ah yūh nin: heue.

Khaix an: yam yāox ciao: yūh kaung: krix cak ka jhawk taong: tix, nawh gāux rhawm: gāux rhi: mai: to: tix hu: dēx cak, mai: jhak tix yāox cak heue. Yam an: cak yūh tix yum plak sivoe ngai: ciao: yūh kaung:, ciao: yūh kaung: ah nin: “cak in: hoik yum tom: pon bo mai: vaig kawx hoik ploh hoik pong heue. Khaix an: ciao: yūh kaung: tom: yah jhawk khaing: cak, yam an: lak tix mu: po: tix tum: ka pi-ang cak mai: riag yo ah lox tix, mai: cak kaoh to: dom mawx dom an: heue. Yam yāox ciao: yūh kaung: kaoh to: cak nawh teei vaig pa vīex tix mai: sivun ka cak ang: krox, viang māwh kawx nan: vaig pa sivun nawh an: hu: krox ka sox prāix pa vawk rhawm: ka dee mox nawh tix ka daux yeem mai: sox prāix an: yum heue.

P a w k h o i : r i a n g p a w c i a n g p āo x t i x . Sox prāix keud pa cāox piang cak,sidah nawh

yaox tix yum.

11

Ting ngawg vawk rhawm: dawd ju cao yum: Kum: rhawm: mai: kuad mhawm: tawng grawng been. Deen rhawm: jhawm: cāox yāox krax lāux. Pluat ploi: phi: map nab yam: ka pāox māwh kaing mhawm.

LAWG (5) PĀOX GRAWM MHAWM:

Saikat māwh kawn: nyawm cawng tix kaux, mai: nawh ot daux glawg 2 heue.Tix singāix sara ciao: gau nawh tawx lai simin ra: phuk son yūh nawh daux nyiiex viang māwh kawxnan: to: kaux nawh ang: doh rhawm: doh rhi: ang: chix sawn: hu: heue. Khaix an: to: kaux nawh tom: kaoh cao cao mai: hu: ka nyiiex cawng yam yāox pāox grawm tix Nyitao: mai: nawh mhaing: tix brīex tiiem ka daux lai ciie tix heue. Viang māwh

12

kawx nan: Nyitao: ang:tawx nawh brīex tiiem simin pa yuh Nyi tao:ka daux lai ciie tix heue. Son sang doh rhawm: doh rhi: nawh mai: son sang chix sawn: nawh, Nyitao: tom: gau sawn: nawh sidawng: mhawm: mhawm: heue. Khaix hoik gau sawn: Nyitao: ka Saikat, Saikat kiied gāux rhawm: gāux rhi: mai: hoik tang: chix yūh chix sawn: lai simin mhawm: mhawm: heue. Māwh kheu: nan: Nyitao: māwh pāox grawm pa mhawm: ka son Saikat te te heue. Gau sawn: pāox lhak, hak pāox gau lai. Ngai: riang piang pui, teem: pui mhawm: Awm: veei khaox rung, lung: pa ting. Cung ot dee mawx, tawx lox ang: nai:. Pui moh hun: nie, simie ceu tix chix pon uik. Gau pui tix son, pon kao: son. Gau sawn: pāox lhak, hak pāox lāoh riien:. Yuh tix kaux ang: piien:, riien: tix kaux ang: tāuh. Phan: riien: ku kaux tom: piien:, miien: ku kauxtom: sied. Paw pied paw poe, paw toe: kaing cāox.

13

LAWG (6) KAWN: CAK KLIH KA PA KEUD CAO: TIX

Koe: tiag tix dah ka daux tiag an: koe: kawn: cak pa mhawm: griang ka tix mu: heue. Tix singāix kawn: cak an: līh hu: nyāux rawm: ka daux rawm: dung pa singax singaong: tix mu: heue. Yam nyāux nawh rawm: nawh deeih yāox kawn: boe: pak peung: rung: ciao: tix mai: nawh kiied gāux rhawm: mai: ting rhawm: ting rhi: te te heue. Phan: pui tix kaux kaux yāox rung: ciie aux, pui pa ang: ghoing: pa ang: simie tix ciie ang: tau tix koe: tix kaux kawx heue. Mai: nawh ting rhawm: mai: yaw rung: ciao: tix ku bawg yam heue. Khaix hoik nyāux nawh rawm: nawh tom: līh hu: ka piang gawng, yam hoek nawh ka piang gawng, nawh tom: lia caong tix mai: ah nin:, “caong

14

aux in: ang: doh mhawm: awm: rung: aux mai: ang: nyawm tix jhak mai: ang: khaw: rhawm: rhi: aux tix bawg kawx heue. Khaix an: nawh to: tix laig ka daux tiag dom mawx dom an: heue. Yam an: koe: pui jaw tix kaux yāox ka cak an: mai: pheet tix puing: ka cak an: yam an: kawn: cak lhat tix yum mai: to: tix laig ka daux tiag dee nhik yeem dom mawx dom an: heue. Yam to: kawn: cak tix laig ka daux tiag, rung: nawh fak tix ka kak khaox kak yeem: mai: ang: lai pon to: khaing: tan: heue. Dom mawx dom an: nawh doh keud ka to: kaux tix mai: ah in: “māwh kheu: rung: pa jiet mhawm: griang aux in: aux tom: yāox krax kha: rhawm: heue. Caong pa sibriem aux in: ang: sax kīeh aux yāox krax pa lāux pa leeing: tix bawg kawx heue. Yam in: māwh kheu jao rung: pa jiet mhawm: griang aux in: aux tom: yāox krax pa saux pa yum ka daux tawm: taix pui jaw heue. Ngud ngai: lung bāoh khoi: riang ciang pāox,cāox yūh ex. Kid khaox ka rao jao: pāox ang: mhawm:. Jhawm: keud tix lāoh, yiie yāox cāox. Viang iak cāox griang tang: koe: dee shiao. Pui yaw ciao: tix pon pa kaig.

15

LAWG (7) SI NGAX SINGĒH ANG: PON JHAWM: SAUX

To: kaux mu: ceu, nēx hak ex kawn: pui māwh pa ting ceu te te telai heue. Phan: rawm: shiao ex ang: singax singēh kaux hak ex ngiēx mai: pon jhawm: saux phan: prīex ih ex ang: singax singēh ex kawn pon jhawm: saux ka heue. Lheu: khaing: an: pa nie lheu: ting ceu son to: kaux mu: ceu ex māwh “Hak”heue. Hak māwh pa kheem: to:kaux ex khawm: uik, son sang ang: to: kaux ex mat, saux,si aoh sikied hak māwh ciao: pa tieb tie jheeng: jheeng: heue. Son sang mhawm: pak peung, nēx nham: to: kaux ex, hak māwh pa ting ceu khawm: uik heue. Phan: hak ex ang: mhawm: ka daux to:kaux ex kawx chix līh māwh jhawm: saux jhawm: ngia mai: chix līh māwh pa ngīex pa ngoi: pa khreeing: son ex heue. Māwh kheu nan: hak ex caw tix yūh satix tix mai: caw tix kīeh singax si ngēh ku bawg ku yam heue. Yam khoek heem: ex to:kaux tix caw tix shiao rawm: pa singax, rawm: pa si u: mai: sipiak khoek heue. Viang māwh kraung khrai: pa ceep ex kawx,

16

caw tix kīeh singax, caw tix thai: loh tix ceep, caw tix sidaux mai: caw tix priex to:kaux tix mhawm: mhawm: heue. Son sang ang: pon jhawm: saux jhawm: ngia, son sang ang: kawb ka pa khreeing: pa ang: singax, caw tix kip nghim: taix nghim: caong mai: caw tix heem: rawm: ku singāix heue. Phan: koe: dee saux, dee mat, dee plix mai: dee muad ang: pon tix pupi: giex kraig ka taix pa ang: si ngax heue. Phan: ex ang: pon priex to:kaux tix mhawm: mhawm: ka piang kaing: ang: ah, ka daux to:kaux ang:ah, six, breeing, viag pa ang: mhawm: khankix kawp ka nēx ex mai: ex pon jhawm: saux pa ang: mhawm: ka heue. Māwh kheu: nan: son sang ang: pon jhawm: saux jhawm: ngia ka daux tix, caw tix singax singēh jheeng: jheeng: heue. Singax jao rawm: mhawm: kheu: eep. Kraung ceep eep sawm: mhawm: yūh kaux. Kaux hak nēx nham: paw kīeh seeing: To:kaux mo: ceu phan: seeing: brai: grai: yūh kaux Six breeing: ngiiex ngoi: coi ex saux. Khoek heem: ku singāix ang: pon saux. Laux lee yam it, ang: chix phit.

17

LAWG (8) IA: SIMĒX MHAWM: GRIANG

Dīx dīx koe: ia: simēx tix mu: ce: tix kin: mhawm: griang, mai: yūh griang tix mai: ah lox ngeei:, ia: simēx phex griang yūh nin: sigoe raoh mai: sibēx preeih, singi: g h o k p h a n : s i l a h mhawm: griang aux pon nam bad t ix koe: t ix ngāix, ia: simēx hoik sak ka kāohtix,yaog kaing: tix m a i : a h l o x g r e e m : num: khaox ting heue. Nawh yāox ia: klax tix mu: mai: ah nin: ia: klax lang: gāoh ax silah pāox tix, mawx pa mhawm: griang? “Ia: klax an: ah nin: mai: dhah rhawm: tix” paw nyiang ha: kadaux khaox in: koe: jhawm:saux viag daux nawh sang pai: aux ka nawh”Ia: simēx mhong: ah ia: klax nan: ah lox tix, bāox nied tix hu: heue. Ia: simēx hu: hoek daux ma: plix tix dah yāox kun: hia: tix mu: mai: ah nin: “Kun: hia: ton: to:ngai: ax si lah pāox tix, mawx pa mhawm: gri-

18

ang?” Kun: hia: dhah rhawm: mai: pawk lox nawh ah nin: “Ang: aux nyiang tien, hoik pruih tai khaox plix, sang hu; aux teei rawm:” la: simēx mhong: lox in: ah lox tix bāox nied tix hu: heue. Ia: simēx hu: hawt tong kaung: yāox khiet tix mu: ah nin: “Khiet prāuh vaig, ax silah pāox tix, mawx pa mhawm: griang?” khiet ah nin: mai: dhah rhawm: tix, koe: kaing aux, kawng pa koe: ka nghox aux sang hu: nyhawp ka nawh, ia: simēx yāox ang: mawx silah mhawm: griang mai: tix, ceen deeih ing: khaing: heue. Hoek greung krax, ia: simēx yāox brung kuad tix mu: ciao: tang: prīex preem, ia: an: ah nin: mai: voi rhawm: tix, “tax brung, aux sang silah mhawm: griang tix mai: ia: klax, hia:, khiet, māwh yūh pa tix kix ang: si mi aux lie?” Brung kuad an: pawk lox ia: ah nin: “māwh jao tawng kix mhawm: ang: mhawm: ang: mawh ngie gaig plak prāix, kawn gaig nang: teem: ang: teem: coi kawn: pui yūh kaing jhaw: ia: simēx mhong: lox in:kix kaig ka, ang: lai pon hu: si-lah ka mhawm: griang tix mai: pui mawx tix khaix an: heue. Khaix an: ku singāix, ka ang: prāix nyiang riang, nawh sau: lox ux tix, so: kawn: pui kaoh heue.

19

LAWG (9) MIAO: SUM: KAX

A i ka : māwh c iao : yūh ma:kaung: tixkauxheue. Nawh sum: sivawng dauxma: tix,hoek bāux kaux hoikpon sivawng mie nyao heue.

Khaix hoik leh moeng nawh pakaux Yex Hoing:sivawng uik. Pūx nawh pa kaux Nyi nap deeih sum: ceem tiex daux ma: an: bāox deeh pon ceem tiex mienyao heue.

Kawn: miao: yāox yūh kix nan: teei nang: kawn: kax vīex tix hu: sum: daux ma: g r a w h g r a w n g n a w h , kawn:miao:kawx, simie tix pon kawn: kax mie nyao heue.

20

LAWG (10) KAWN: PĒX YŪH PĀOX GRAWM

Dīx dix koe: kawn: pēx tix mu: hu: sawg tix yūh pāox grawm mai: to: sat tang: ceu tang: mu: heue. Yam jāh nawh yūh pāox grawm mai: kawn: ia: kawn:ia: an: khan: kawn: pēx ih kawn: kawng, kheu: ang: kawn: pēx sax ih kawn: kawng, kawn: pēx ah lox ting buan: son: ka kawn: ia: yūh nin:

“pāox grawm eue: lāoh lie pa yūh māix, viang māwh nan: aux ang: sax māwh pa ih kawn: kawng heue.” Khaix an: kawn: pēx deeih hu: yūh pāox grawm mai: kawn: miao: kawn: miao: hu: teei kax, khan: kheu: kawn: pēx

ih kawn: kax kheu: ang: kawn: pēx sax ih kawn: kax, ah lox ting buan: son: ka kawn: miao: yūh nin:

21

“ pāox grawm eue: lāoh lie pa yūh māix, viang māwh nan: aux ang: sax māwh pa ih kax heue. Khaix an: kawn: pēx deeih hu: yuh pāox grawm mai: kawn: sox, kawn: sox khan: kheu: kawn: pēx khliak siang: kawn: pēx ah lox ting buan: son: ka kawn: sox yūh nin: “pāox grawm eue: lāoh lie pa yūh māix ,viang māwhnan: auxang:sax māwh pa khliak siang: heue. Khaix an: kawn: pēx deeih hu: yūh pāox grawmmai:kawn:moi, kawn: moi khan: kheu: kawn: pēxsawm: rib klai heue.Kawn: pēx ah lox ting buan: son: ka kawn: m o i y ū h n i n : “pāox grawm eue: lāoh liepa yūh māix ,sawm: ax tau heue.”

22

LAWG (11) TOI: HU: MOX TIX DAUX NONG:

Tom: yam jāh tiex tix loi: moi tix bāwh, raix tix

pang: rang: tix peem: dīx dīx , toi: mai: lak hoik ot tau si jheeng: kiex māwh pāox grawm moh, hauk kiex paing khawm: uik awm: pāox tix heue.

Son sang yūh kiex tix mhawm: griang, kiex

tom: phaw: lox tau, lai: loh pāox tix pawd riang tai ka hauk pāox tix heue. Lak jāh tix gaw toi: pawd ri-ang tai, lak shiao rawm: nam meug lung, bre tix pawd piang hauk toi: rhoi: mawx rhoi: an: ot khaix bāox teei rawm: nam meug raoh kraix ka grawng caong toi: raoh ngie, khaix hoik pawd nawh toi: uik, toi: kied mhawm: griang te te, lak uik ghoing: ngie ka heue.

23

In: phao: caw toi: pawd riang tai ka hauk lak, toi: taug sang jāh tix pawd, keem: māwh mhong: nawh lox pa tix ang: tawng, toi: yaog tix tong si jāox, ah, “māwh tit lox pa tix,”lak deeih yaoh nang: ka lox toi: lak taug sang yaog tix pu:, toi: yaog tung rawm: nam meug lung lhauk nawh ka lak uik, lak hoik lung khawm: mu: tix, kiex tang: to: khaix heue.

Khaix an: phan:lak yāox ka bēuh griang tix yūh nin: nawh hoik kin: meet rhawm: ka jao, phan: si-dauh toi: dee mawx, nawh pheet tix tut heue. Toi: lhat ka lak, tom: to: laig daux nong:, hoek tom: sin-gāix, toi: tom: ang: lai pon līh khaing: daux nong: heue.

Pui pie pui lhen: yāox khen: ke. Khrex riien ka pāox yāox krax mhawm: Jhawm: kraix jhawm: khrawm: mhawm: yūh prāix. Gaig kia: pāox tix awm: khix piang ma: Khat kha:soh yeem, teem: pāox tix. Kheem: tawb nawb buan: ka pāox tix. Gu:cāox yāox mhawm: tawm: lhah ju. Cu nghiet simiang riang pak ngai: Ang: lit ang: lhai: krai grawng hu:. Pui kawk pui vawk yāox maox phyawk. Toi: ang: pon lih khaing:daux nong: kheu: yūh

24

krax pa song: rhawm: lak. Lak lung: khawm: jung jao yūh toi:. Toi: khoi: ka lak sak ot daux faik.

LAWG (12)

GRAWNG KEUD SON BHAO: KHAIX Tax kuad tix kaux paug kaong: tiex daux si-

beem yūh tix mai: awm: caong kawn: khaox mak mong sum: tix heue. Kawn: simiang tix kaux hu: lai ling tix jaw daux tiag daux nong: mai: jiet caw tix pha: sibeem yūh tax kuad an: heue.

Tax kuad an: yāox hoek kawn: simiang dee ot tix rieb nawh khawm: gāux rhawm: gāux rhi: tix mai: tawx ih plix mak mong pa sidaing: tie: khawm: bhawng: tix heue.

25

Kied sidaing: nyawm plix mak mong caong tawx māix aux ih nux tax eue:, viang māwh nan: aux simie tix chawk tax ka lox tix gum, yam hoek aux, māwh sum: tax kawn: khaox pa tix lie? Tax kuad - sum: aux kawn: khaox mak mong. Kawn: simiang- Tax hoik koe: ju māix mie; num lie? Tax kuad - ju aux hoik koe: 80 num heue. Kawn:simiang- Tax māwh kawn keud māix tix

kawn bāox im: mie num lie? Yam in: kawn: khaox mak mong pa sum: “Tax”māwh ce: māix tix kawn yāox tix ih lie? Kaing pa ang: ex tau lai yāox tix ih, nieb yūh māwh khaw nang: lie?

Tax kuad- Plix mak mong pa ih māix yam in: nux, māwh pa sum: Tax yiiex aux tix dēuh heue. Kawn: khaox mak mong pa sum: aux tix dēuh yam in: phan: hoek kawn: saux kawn: sex aux mai: cub pui bhao: khaix kix teu rien tix yāox tix ih heue. Tax kuad deeih pawk lox kawn: simiang an: yūh

26

nin:, kawn: simiang an: kied sidaing: caw khaw rhawm: ka lox krai Tax kuad an: te te heue.

Kawn: simiang- lox “Tax” māwh lox caw tix priex daux rhawm: sawm: daux kaux te te, man: aux tix krai lox yūh nin: nux, paw awt saux rhawm: ka liak “TAX”Jāh daux in: singāix ang: aux doh lai keud ngie son tix khaing:, aux lawk keud tix yūh kaing son to:kaux ciao: aux mai: son bhao: khaix awx. Aux simie tix krub ka “Tax” khaix hoik ah kawn: simiang an: nan:, nawh peeik jip giien:khri: ih tix krub Tax kuad, khaix an: nawh yaog tix brug brung tix mai: ing: gāux sile: he: sivoeg tix heue.

Yam an: Tax kuad an: gāux rhawm: gāux rhi:, kheu ponlak sawng khaing: kawn: simiang, “Tax” an: ah nin: khaoxmak mong pa sum: aux hoik plix khri: plix siang son auxheue. Yam yūh kaing, viang nu mie ding. paw deen paw gaing:

27

Jhaing: yāox riang rao cao: tix voe. Ceu pa sum: van: ang: doh nai: grai: kaux ang: nai: khaix.

LAWG (13) LAK PIE LHEN: TIX MĀWH KAUNG:

Dīx dīx koe: lak pa sidaing: yaw tix, tix mu:,lak an: yāoxJhawm: mhawm: griang kaung: nawh ka simie tixmhawm:griang awm: kix heue. Māwh kheu: nan: nawh sawg tix suthauk kaung: seet daux kaux mu: tix, hu: dee ot kaung: heue. Lak an: hoek dee ot kaung: mai: ah nin: aux kamāwh nang:kaung: awm: pex heue. Yam an: cub kaung: pawk lox nawh ah

28

nin:,mai:baigka ngai:nawh “PHUIK”lak, pie lhen:, māix ang:timāwh cub kaungawm:yīx kaung:ang: māwh liemāix mawh laklung: ot pie tix māwh yīx, Yaman:kaung: khan:kix reebtix tuih lakan:,lheu: khaing: hoik greeg hauk kaung: khaing: lak an:,piehauk ciao:lak hoik greeig khaing: nawh uik heue. Lak an: sidaing: saux nēx saux kīh, mai: deeih po: hoek deeot pāox lak tix heue.Maix kaux rhom:kaceu putang:ceu, tīehtix ang:kaux rhom:yum rhom: ka ceu ciao:tix,piprah,map nai:ka ceu ciao: tix pa māwh cub lak, māix paw lai hoek ka yīx, pāox lak ah nin: ka nawh, mai:nawh līh khaing: daux cubphung:lak heue. Māix tik ceu ciao: tix, yūh tix māwh pui tang: ceu, jalao yīxlak ang: khreeng: ka māixpie kaung: kix kakhreeng:ka māix. pāoxlak ah nin: ka nawh,mai:ang:lai culak an:,otmai:kix heue. Lox diex lox gau kuad ka ex. Jāh tiex tix loi:kaw: moi tix bāwh. Kaw: raix tix pang: kaw: rang: tix peem:. Deem: ang: sa: krix ka krak. Lak ang: sax tieh tix paing:.

29

Cak ang: sa: tuih ka rung:, lung: ang: sax bīeh. Bi: ang: sa: plix tawg, hoik dawg māwh been nawh. Krawg ang: krix, ang: sa: koe: Ceu cad māwh aux, kaux cong: yūh aux.

LAWG 14.

GRAWNG KHAOX OX.

Khaox ox māwh ceu pa kied sidaing: koe: buan: son:, son exkawn: pui heue. Phan: ex sang sum: tix ot nyiiex ma:, phan:khaox ox ang: koe: pon ang: doh chix te te heue. Khaox ex peung tix yūh rong: nyiiex, lat nyiiex, nuk nyiiex, siox ny-

30

iiex,prang: nyiiex, rung: nyiiex, mai: phia: ka heue. Phan: māwh khaox kamāwh nang:ciao:pa kie-hbāuxyam prāix klawng: mhawm:heue. Koe: khaox ting nong: ting deemāwh,rawm:lhiehrawnm:klawng: ka mhawm: dee an:,lheu: khaing:an: exkawnpeung tix yūh reu,yūh khix, yūh khaox thai: krong: baug-sipeed,mai:pheu:can kraung pa shiao sonkaing jhaw: khankixheue. Ox ka māwh nang: nan: awm:khaox,awm:ox ex sum:nyiiex yaong: pa ang: ox vīex ang: sa: koe: pie tix nyiiexkawx heue.Ex peung tix yūh maox vien ku ceu ka heue. Awm: meung pakoe: cu:yi:ping nyia, kix krid ox yūh māwh ce tiiem lai, yūhngot, tāoh māwh meeih mai: tawm daux nyiiex lhaong: ot tixheue. Ox ang: māwh ngie pau shiao ex son sum:t ixnyiiex nong: nong: kawn yūh nang: kraung pa yip pa shiao dauxn yiiex heue. Lox tiag, sawng,yau, pheen:ox, khrawng:, iep, lu sawm:, Jhat, lhaktūh, maox vien, maox thai:, toi: an: khankix, ex kawnPeung tix ih plaung, yūh khrauh nīex, pung, ex kawn peung kīeh māwh buan:son ex heue. Khaox mai: ox ang: jhoeng māwh ngie koe:

31

buan: son: sonPa yip pa shiao, phan: ex kid tix coh ex ka chix pon mau khri: Ka heue. Son pa yippa s h i a o a n g : a h , s o n p l a k m a g m i a n g : a h , Khaox ox sidaing: joh jhaung: ka exyūh nin:māwh kheu: nan:nyiiex mawx yaong: an: sau: riang rao ti sum: khaox ox kukaux pui awx. Khaox ox coh kix, chix māwh mau. Kid khix bīx kaing, taing: māwh yau. Mau cai: ngai: lai, māwh khaox ox. Sau: riang sum: ox, toh ku gawng. Klawng: gawng rawm: nyāux mhawm: kheu:

khaox.

LAWG (15)

Jhak ngai: lai in: plak greem: mai:kīeh māwh laiphat awx.māix, nāwh, ah, pax, yex, kiex, aux, ax, ex, yix, kix, tax,keeing, mīex, aik, O. (1) Māix-māix bre priex nyiiex mhawm:

mhawm: awx. (2) Nawh-Nawh hu: pang: kham: pon sax lie

32

(3) Ah-Ah aux tix hu: laih meung mau: si kaoxheue. (4) Pax- Pax nied hu: phai: phai: awx. (5)Yex- Yex hu: māix ma: dee mawx ngāix in: lie? (6) Kiex- Kiex sang hu: tix brīex moi yaong: maw

heue. (7)Aux- Aux sang liag law tix mu: aux ang: tie

koe: mau. (8)Ax- Ax hu:ih prīex prawng yaong: mawin:ngāix

awx. (9) Pex- Pex yūh pa tix ka lig in: lie? (10)Yix- Yīxhoik uik gaox sawm: tawx yīx ba: tix

ceex liak. (11)Kix- Kix hu: kid khix daux tiag. viag ih nghox

ma: yīx. (12)Tax- Tax ih pa tix lie? (13) Keeing-Keeing: kaoh māix khaing: dee mawx lie (14) Miex- Mīex ting brax pax nang: lie? (15) Aik- Aik kaoh māix khaing: dee mawx? (16) O: -O:aux kied mhawm:griang khaing: pui uik heue.

33

LAWG (16) TING TU PU RHAWM: ANG: MHAWM:

Dīx dīx koe: Tax kuad tix kaux, nawh koe: pet mīex tix mu:, pet an: jiet māwh ceu pet pa daox pa am:, kheu: jao tom: nawh tom: khri: ku singāix heue. Māwh kheu: nan: Tax in: nie mi tix ngāix khaing: tix ngāix heue. Koe: tix singāix Tax kuad an: keed daux rhawm: tix yūh nin:, pet in: pau tom: tix singāix tix mu:, cha: luan: yawm, daux vaig pet in: teu: rien tom: nawh tix nie pleue:, ah yūh nin: nawh tom: mut pet an: mai: pauh yum heue. Yam an: nawh sawg tom: khri: daux vaig pet ang: yāox ka heue. Man: aux tix pauh pet yum, hoik māwh krax lud ting son aux te te, te lai, nawh doh keud mai: kleeh(klih) ka pa yūh tix heue. Vhax rhawm:ka pa koe: mhawm: son māix. Cawk ang:hoek taix,khlaix ang: hoekbhawm: paw cawm yūh,ih pie nyawm, sawm: pie laig, baig ghak pāox tix ang; chix,Paw yūh kaing nai: paw yūh grai:kaux, saux yum grum hoek,Koe:kraung thai: koe: dai: loh mie ding ot khawm: an: heue. Can pa koe: māix priex khrawm: mhawm:.

34

Jhawm: mie pon nie yiie lāux yūh ex. Tax kuad mie nie, ciie nawh uik. Tom: nie, tom: iak dawg māwh diag. Lu liak tu tīeh dieh yūh ot. Viang hot, viang chia: paw vi khi:. Thong: jhi: pāox tix yūh kaing mhawm:.

LAWG 17. PHAX CAO MAI: MOI LAW: Dīx dīx koe: ciao: grheu: moi law: tix kaux, nawh grheu: law: ciie tix laig daux eeng: daux glaox pa raux, yam grheu: hu: yūh nin:, law: ciie nawh blawn daux glāox heue. Yam an: moi law: ang: pon tuk pon reu: law: līh khaing: daux glāox ca: ot yūh nan: heue. Ciao: law: an: son sang pon l īh law: khaing: daux glāox an:, nawh nieb ca: ot, mai:

35

bhauk taix tix ang: tie su: siah tix yūh tid tix heue. “Siyiiex eue: teem: coi ka aux liak, kīeh law: aux luan: khaing: glāox in: liak” nawh rawg buan: ah yūh nan: heue. Yam an: Tax phak cao ah nin: ka nawh “he” pui nīeh, son sang luan: law: māix khaing: daux glāox in:, māix ang: tie sau: riang mai: cot ka law:, ang: māix sau: riang tix lie? Sau: riang māix cot mai: kīeh moi reu: nawh, yam ciao: law: an: yūh awm: pa ah Tax Phax cao, law: nawh tom: tag pon tix līh. khaing: daux glāox dee blawn tix heue. Phan: yūh, phan: yāox kaing ceu pa tix ang: ah, tom: ex plih riang: rao, ang: nīeh ang: krien, tom: chix hoik heue. Kaing ceu pa tix ang: ah, nieb tang: chix yūh chix hoik khawm: ang: pui yūh, ang: sa: koe: piang hak tiex tix bawg kawx heue. Pui ciao grheu: law: khaw: tix sau riang. Son tiang dee blawn kawn: bhauk taix tix. Chix yūh pa tix ang: tie chux su: siah. Nieb ot rawg buan: kuan: ciie pa yie. ce yāox pa yiie ce ciie pa hoik. Māwh tiex ex kaung: ka dāwh māwh dāwh ex thom: ka naog. Pui nīeh pui brīex siyiiex ang: teem:.

36

Lawg (18) DEE OT MAWX DEE OT AN:

Dīx koe: tiag ting tix dah, ka daux tiag ting an:, koe: to sat loe: ceu, pa māwh sivai, sang: si:, sang:, mai: khiiet sivai sang:si: ot plak līh singāix, sang: ot plak klip singāix, mai: khiiet ot ka daux sinax tiag an: dēx rawm: dung tix dah heue. Tix singāix sang: simie tix kuang ka dee ot sivai sang: si nawh lih hu: mai: hoek ka dee ot khiiet dēx dung rawm: mai: khiiet chawk ah nin: ka nawh “Pāox grawm simiang sang: eue:” māwh kaoh māix khaing: dee mawx? Māix sang hu: māix dee mawx lie? Yam an: sang: deeih pawk lox mai: ah in: “pāox grawm khiiet eue: yam in: aux hoek tin: māwh son sang hu: ngāh tix tik ka sivai sangsi heue. Khiiet ah nin: “pāox grawm eue” paw vi hu: ka dee an: liak, ang: māwh dee ot māix heue. Phan: māix hu: phan: ngāh sivai sang:si māix teu: rien tix som viang māwh nan: sang: ang: nghiet mai: nawh lih hu: khaing: tan: heue. Māwh kheu: nan: khiiet deeih bāux tawm: lox ah nin:, lheu: khaing: hoik krai aux māix mhong: phan: māix sang cu kawx teei rhawm: māix ah heue. Viang māwh kawx nan: phan: māix

37

kaoh khaing: ngāh tix sivai sang:si yūh buan: son: deeih hoek ka aux awx.

Yam hoek sang: dee ot sivai sang:si kiex ra:mu ngāh pāox tix, yam an:sang: teei nga tix mai: sau: ri-ang sau: rao mai: coca: tix son sang pon klah sivai sang:si kawx, sivai sang:si via gwiex via dawm: sang: tom: ang: pon klah heue. Khaix an: sang: hoek kied taug bawg ghoik, sivai sang:si brung ka sang: ra: loe: bawg sang: tom: som heue.

Sang: tom: khiox khaw: ka sivai sang:si ah nin: “pāox grawm eue.” Yam in: aux hoik māwh pui pa som ka māix viang māwh nan:, aux māwh pa koe: moeng kawn: mai: aux kawn: simie tix yāox moeng kawn: tix, tix bawg ha. Phan: hoik naog ka daux aliah singāix, aux deeih hoek ka māix, pa māwh pāox grawm tix te te heue. Yam an: sivai sang:si cāox rhawm: cāox rhi: ka sang: mai: ploi: nawh ing: heue.

Sang: doh keud doh sawn: mai: kied lāux rhawm: ka grāwh grawng: pa yūh ciao tix, mai: deeih ing: plak khaix tix heue. Yam deeih hoek ka dee ot khiiet mai: khiiet chawk tix yāox grāwh grawng: kiex ra: mu:, aux hoik krai māix mhong: ang: māwh lie? Phan: ang: māwh dee ot ceu mawx

38

ceu an: ang: chix pēx ka pāox tix, yam in: māix hoik som ka nawh ang: māwh lie? Khaix an: sang: deeih ah nin: ka khiiet “pāox grawm eue” phan: hoik naog ka daux aliah singāix aux yāox tix yum heue. Khaix an: khiiet ang: cu nawh lāux rhawm: mai: tawx daux krax daux blawng yūh nin:, phan: hoik naog aliah singāix paw vi hu: ka sivai sang:si, jāh in: singāix māix kok pāox sang: tix hoek, māix teei glāox yūh rawm: dung ting tix mu:, phan: nawh hoek pex laig ka daux rawm: dung ting an:, mai: deeih pawk bīx ka nawh awx.

Sang: deeih ing: dee ot tix, mai: cox riien awm: lox pa tawm: khiiet heue. Yam hoek ka daux aliah singāix, sivai sang:si yāox ang: sang: hoek ka tix, nawh tom: song rhawm: song rhi: mai: hu: ka dee ot sang: heue. Yam yāox khiiet ka hoek sivai sang:si nawh chawk ah nin: “pāox grawm sivai sang:si eue” ang: māwh dee kuang: māix, māix sang hu: yūh pa tix lie? Sivai sang:si krai khiiet mhong: grāwh grawng: pa hoek yūh kiex ka pāox tix khawm: uik heue. Mai:khiiet deeih ah nin: ka nawh pāox grawm: sivai sang:si eue:. Māix māwh pa koe: siawp sibrawm: kawx, phan: ang: māwh dee kuang: ciie mawx ciie an: ang: tau tix pēx mai: deeih ing:

39

ka dee ot tix khaing: awx. Vaing māwh kawx nan: sivai sang:si ang: nghiet lox khiiet mai: līh hu: ka dee ot sang: heue. Yam an: khiiet hawt hu: plak khaix sivai sang:si mai: pau tix jhak pa yūh nawh heue.

Yam yāox sivai sang:si laig sang: ka daux rawm: dung ting, nawh kied song: rhawm: song: rhi: mai: brum ka sang: heue. Yam brum sivai sang:si ka sang:, sang: com tix ka daux rawm: dung ting, bawg goik sivai sang:si kied nie song: rhawm: mai: laig ka daux rawm: dung ting dee ot sang:, yam an: sivai sang:si thom: mai: glip ka daux glāox mai: ang: lai pon līh heue.

Khaix an: khiiet līh hoek mai: ah nin: pāox grawm eue:, dee ot ceu mawx ceu an: kīeh tang: tawng: dee ot tix, son sang pēx ex pāox tix ang: yiie yiie, māwh kheu: nan:, dee ot ciie mawx ciie an: tang: ting ka dee ot tix heue. Khaix hoik sidiex khiiet ka kiex tix ceu mai: tix ceu deeih teem: ka pāox tix mai: gaux rhawm: gaux rhi: ot tau ka daux tiag an: heue.

40

GLAWG (19) GRAWNG BEE IH.

Bee māwh pa kied ting ceu ka daux pa ih pa

un: ex kawn: pui tix ceu. Ex kawn: pui son sang ny-awm ot siu: koe: mai: son sang naog riang rao ka daux ex pa ting ceu māwh bee pa shiao pa ih ex heue. Pui tix kaux son tix num caw ih bee (5.50)coi heue. Māwh kheu: nan: son sang kub shiao kub yung: bee, ka son kawn: pui khawm: uik, caw tix sum: plix pa koe: bee tom: nie ceu heue. Ka daux Meung ot ex son sang nie līh bee mai: son sang kub shiao kub ih ex, kaing: ting caw tix sum: ngīex mai: ceem tiex tom: nie, ngīex koe: ra: ceu, ngīex lung (ngīex num) mai: ngīex paing(ngīex sawk) heue. Phan: māwh ngīex paing(ngīex sawk)pui lheu sum: plak nie, grāwh grawng: nawh, ngīex paing(ngīex sawk) māwh kheu: ngaing: singāix ngaing: ju, ngaing: bawg yam mai: cao plix, pui tom: moh tix sum: khaing: ngīex lung, (ngīex num)heue. Viang māwh ceem tiex kawx koe: ra: ceu, ceem tiex pa sum: bawg yam kuat mai: ceem tiex pa sum: bawg yam rāux, phan: māwh ceem tiex pa sum: bawg yam kuat sidaing: nie plix khaing ceem tiex pa sum:

41

bawg yam rāux mai: ceem tiex tang: ceu heue. Lheu: khaing: an: tai riang singāix kawx, pui tiblah sum: nawh heue.

Ka daux bawg yam in: son sang kub shiao kub ih kawn: pui khawm:uik ka bee pa ih ciao: kaing: ciao: thong plak pa sum: plix khaox plix ox, hoik cheuk tix yāox cheu: tix sum: plix khaox pa līh bee, pa māwh khaox mak pao:, ngīex Japan, mai: khaox tang ceu tom: nie heue. Plix mak pao: phan: krid līh tix māwh bee ih ex kawn: pui heue.

Māwh kheu: nan: caw tix sum: plix khaox pa līh bee mai: pa koe: bee tom: nie heue. Phan: ex hoik pon sum: plix khaox pa līh bee, bee pa shiao pa yung: pa ih ex khawm: uik tag sang kub sang lheu: son ex kawn pui ka daux singāix heue.

GLAWG (20) KLANG: PLAWH PA KOE PINGNYIA CUYI:.

Dīx ka daux tiag tix dah, klang: plawh pa koe: ping nyia cuyi: koe: tix mu: ot daux heue. Can pa māwh to: tiag to:tu khankix phan simah simiang thung thiang: phit pāox tix, kix hoek ka klang plawh

42

pa koe: pingya cuyi: an: mai: kīeh nawh prawng heue.

Tix singāix sang: mai: raokhaox thung thiang: pāox tix jao grhang: kiex tix ting, sang: tom: ah nin: “māwh kheu: ting to kaux aux mai: koe: riang koe: rao aux, aux tom: pon raig khaox mai: pon blūh num khaox ting gōh heue.

Khaix an: rao khaox deeih ah nin: khaox lhaong: miex ding kawx, aux pon haok, pa iak kaux mai: pa chaong: kaux, ceu pa tix ang: ah lheu: koe: buan: son: khaing: pa ting kaux mai: pa koe: riang heue.

Khaix hoik thung thiang kiex pāox tix kiex khawm: ra: tom:līh ka klang: plawh son sang kīeh nawh prawng ca ka sinax kiex heue.

Yam hoek kiex ka klang: plawh, kiex krai lao grāwh grawng: thung thiang kiex pāox tix, mai: chawk yūh nin:, klang: plawh eue: yiiex ra: mu: māwh mawx pa lheu: ting ceu ka daux sinax yiiex lie?

Praok dee ot klang: plawh koe: khaox tix khaox mai: koe: rawm: klawng: tix kawng:, khaix an: tom: nhie kiex tiang rawm: klawng: mai: ah nin: toi: rawm: klawng: koe: khaox tix khaox, pax

43

khawm: ra: mu hu: pieh plix khaox an: hoek awx. Sang: tom: deeih chawk lox ka klang: plawh

ah nin: khaox an: tix khaox mai: plix khaox an: māwh hu: caw grāwh grawng: thung thiang yiiex pāox tix yuh ka mawx? Klang: plawh deeih pawk lox ah nin:, aux nhie pax hu: pa caw tix hu:, grāwh grawng pa thung thiang pax ka pāox tix, pax tag sang tawng nawh khaix heue.

Khaix an: sang: mai: rao khaox thung pāox tix hu: dee ah klang: plawh, raokhaox māwh pa ang: sax tiang rawm: tix bawg kawx, mai: rawm: klawng: an: raux lie, thaw lie, nawh ang: tawng nawh tom: ang: pon tiang heue.

Sang: ah nin pa ting riang mai: pa ting kaux, koe: buan: son: ang: koe: buan:son: jāh yam in: māix hoik tawng ang: māwh lie? Māwh kheu: nan: māix haok brug piang blawg aux awx, khaix hoik ah sang nan: nawh tom: vīex raokhaox tiang rawm: klawng: heue.

Khaox pa koe: toi: rawm: klawng: an: kied ting kied lhaong: mai: plix, plix ka rao tix, yam an:, son sang pieh plix mai: son sang haok khaox, sang: ang: chix haok ka khaox heue. Yam an: rao khaox deeih ah nin:, pāox grawm sang: eue: to kaux māix

44

ting kawx ang: koe: buan:son: ang: māwh lie? Māix jhak aux awx, māwh kheu: iak kaux aux mai: chaong: kaux aux, aux sang haok khaox mai: pieh plix hoek awx. Khaix hoikpieh plix, kiex deeih ing: plak khaix tix heue.

Yam deeih hoek kiex ka klang: plawh kiex ah nin:, pa koe: ping nyian cuyi: eue:, plix khaox pa kieh māix yiiex pieh, hoik vīex hoek heue. Māwh kheu: nan: grāwh grawng: thung thiang yiiex pāox tix prawng: ca: ka son yiiex yam in: liak. Klang: plawh deeih ah nin: grāwh grawng pa māwh pax pa deeih prawng ca ka son to kaux tix heue. Yam an: sang: mai: rao khaox kied daox deng: ka lox ah klang: plawh, mai: kiex deeih chawk ah nin:, yiiex chix sang deeih prawng ca son to kaux ciao tix yūh ka mawx.

Khaix an: klang: plawh sidiex gau kiex ah nin:, phan: ang: māwh sang: maix kawx ang: pon tiang rawm: klawng:, phan: ang: māwh rao khaox son sang haok pieh plix, māix kawx ang: chix haok, māwh kheu: nan: ang: kuang: tix mawx ceu pa tix ang: ah, tang: koe: buan: son: mai: tang koe: dee shiao tix heue. Yam in: tix ceu lai tix ceu phan: ang: chix teem: chix coi ka pāox tix ang: khaw: daux

45

krax daux blawng tix. Phan: thung thiang ka pāox tix jheeng: jheeng: māwh ceu pa simah simaing: ka pāox tix māwh kheu: nan:, phan: pex ih rhawm: rhi: kri: mau pāox tix, khaw: caw ka pāox tix, pex tag pon ah pon yūh ku ceu heue.