qajeelfama iskiriiptii raadiyoo barreessuu
DESCRIPTION
it is all about writing scripts for radio programs.TRANSCRIPT
QAJEELFAMA
Korree Shaanqullee Arsee (MA)
QAJEELFAMA ISKIRIIPTII RAADIYOO BARREESSUU
(Writing Scripts for Radio- news and programmes)
Sagantaa raadiyoo hojjachuun qarummaa teeknikaa barbaada. Yaada
sagantaa gabbisanii haala gaariin iskiriiptii barreessuudhaan gara
sagantaatti geeddaruudha hojiin guddaan. Kennaa addaa, dandeettii waa
kalaquufi cimina hojii miidiyaa namni qabu sagantaa raadiyoo hojjachuun
waan isa rakkisu miti. Gaazexeessaan raadiyoo tokko dandeettii-gabaasuu,
barreessuu, gaaf-deebii hojjachuu, gulaaluu, meeshaatti akkaan
fayyadamuu, tamsaasa kolbaan dhageeffattoota mariisisuufi sagantaawwan
raadiyoo tamsaasuu qabaatu gaariidha. Raadiyoorra hojjachuun fedhii
barbaaddi; fedhii haasawuu, fedhii yaada namaa dhageeffachuu, fedhii
waan argaadhageettii dhageeffattootatti himuu fa’atu barbaadama.
Naamusniifi yaadaa qindaawaa dhageeffattootaaf galu dubbiin yookaan
barreeffamaan akkaan dhiheessuunis waan biraati.
- Waa hundarraa waan muya beekuun (hinbeekuun hintaatu),
- Barachuufi jijjiiramuuf fedhii qabaachuu,
- Ijaa-gurra odeeffannoo qabaachuu,
- Fedhii dhimma namootaa dhageeffachuu-jireenya, mindaa, oomisha
isaanii, mirga isaanii, kkf
QAJEELFAMA
Korree Shaanqullee Arsee (MA)
- Maddi odeeffannoo kan akka fedheyyuu haata’uu shakkuun amala
gaazexeessaa gaariiti;
- Jecchoota muraasaan ergaa mamii hinqabneefi nama maraaf galtu
sirritti(osoo hindogongorre) dabarsuu danda’uun,
Namni sagantaa hojjatu kaayyoo sagantaa san qopheessuuf beekuun
ammoo waan dabalataati. Kana yoo jennu barsiisuuf, bashannansiisuuf
moo bashannansiisaa barsiisuuf? Sagantaan dhageeffataa maraaf moo
dhageeffataa murtaa’eef/muyoof dhihaata? Qopheessaan dhageeffataa isaa
adda hinbaafanne, dhageeffataa garaa gahuufi dhiisuu isaa waa adda
hinbaafatu.
Adeemsa hojii sagantaa
yaada
karoora
qorannoo piroodaakshinii
madaallii
QAJEELFAMA
Korree Shaanqullee Arsee (MA)
YAADA MADDISIISUU: Yaadni qophii bakka biraatii hinmaddu.
Jireenyi ilmaan namaa harki caalu ija ogummaatin ilaalamnaan roga heddu
itti baasuun qophii gochuun nidanda’ama. Yeroo baay’ee namoonni kan
dogongoran yaada haaraa maaltu jira inni ani yaadu waanuma beekamu
jechuun. Waan haaraa baasuun dadhabamus roga ittiin ilaalan haaraa
baasuun nidanda’ama. Mee diyaagiraamii armaan gadii kana haa ilaallu.
Salaphaadhumatti yoo diyaagiraamii armaan olii ilaalle yaada baldhaa
tokkorraa gara dhiphaatti(muyootti)deemuun waan qabatamaa seenaa
namaa irraa odeeffannu baasuun nidanda’ama.
Fayyaa Barnoota Fayyaa Ittisa Dhibeewwan
Daddarboo
Busaa Qulqullina Qulqullina qe'ee
balfaa: goggogaafi dahangala'aa
balfaa dhangala'aa
balfaa - qoorsuu, dhangalaasuu, lafa dhooqaa biyyeen
guutuu
QAJEELFAMA
Korree Shaanqullee Arsee (MA)
KAROORSUU: hojiin karoora hinqabne ka’umsaafi xumuras hinqabu.
Namni hojii isaa hinkaroorfannemmoo, bu’aan hojii isaa
hinbeekamu;hinsafaramus. Hojii nama biraa hojjachuun isa qofa
lakkaawata. Kun ammo irra deddeebii karooraafi bu’a argamee ta’a.
Abbaan karoora malee socho’u waan dogondoru hinbeeku; waan fooyyessus
hinqabu. Karoorri, waan milkii qofa osoo hintaane, milkaawuuf daandiin
sirriifi filatamaan kami?, milkii maaltu mudeessuu danda’a? fa’a
jedhameeti hojitti seenama.
Karoorri dhimmoota armaan gadii kana qabaata.
1. Mataduree karooraa: dhimma ijoo sagantaan irratti hojjatamu.
2. Kaayyoo karooraa: maaliif matadureen filatame
3. Galma karooraa: dhageeffattoonni maal raawwatu erga dhageeffatanii
4. Dhaamsa/ergaa karooraa: ergaan qabatamuu qabu maali
5. Madda odeeffannoo: odeeffannoon eessaa walitti qabama
6. Qabiyyee karooraa (tarreeffama): dhimma sagantaa keessatti
qabiyyeen jabeennatti ilaallaman maal kan akkamiiti
7. Bifiyyee ittiin dhihaatu: dhimmichi haala akkamiin yoo dhihaate
woyya
8. Qorannoo qabiyyee(qophii): yaada dhuunfaafi yaada qabatamaa
akkamii faatu jira dhimma sagantaan irratti hojjatamu duuka walqabatee
QAJEELFAMA
Korree Shaanqullee Arsee (MA)
9. Dheerina: dheeressuu moo gabaabsuu woyya ykn sagantaa gabaabaa
moo dheeraa ykn oduu moo sagantaan yoo dhihaate woyya
10. Dhageeffattoota: dhageeffattoota mara moo muyoo akkasumas
sadarkaa barnootaa akkamii, umriifi koornayaa kamiif kkf
Afaan:
1. Gabaajee : namni odeeggannoo/seenaa qophii tokko barreessu akka
dubbisuuf isatti toluun jechoota sababii garagaraatiif
gabaabsuu/gabaajessuu danda’a. Sababni tokko, yeroo qusachuu ta’a.
Fakkeenyaaf jecha Doktora jedhu Dr jechuun barreessuun nidanda’ama.
2. Lakkoofsa/Lakkoobsa Barreessuu: lakkoobsa yoo iskiriiptii
raadiyoo keessatti barreessinu akka mamiin hinjiraane qubeessuun
barreessuun dubbisuutu gaarii ta’a, keessattuu, lakkoobsa baay’ee yoo ta’e.
Fakkeenyaaf, 65678 jennee barreessuurra miiliyoona jahaafi kuma dhibba
shaniifi dhibba jahaafi torbaatamii saddeeti jechuutu gaarii ta’a. Yookaan
miiliyoona afuriifi kuma dhibba shanii ol jechuunis nidanda’ama. Garuu
dogongorri waan nama ajaa’ibsiisu yeroo baay’ee miliyoona afuriifi
tuqaa/qabxii shan kan jennee dubbisnu. Kun siruma ifa waan hintaaneef,
haala kanaan barreeffamuu hinqabu. Tuqaan maali? Nama meeqatu qabxii
jennee yoo waamnu hubata? Kan biraa lakkoobsa 3989 gara lakkoobsa
guutuutti siksuudhaan gara kuma afurii ta’u/ta’a jennee barreessuun
QAJEELFAMA
Korree Shaanqullee Arsee (MA)
rakkoo hinqabu. Parsantii yookaan dhibbaantaa yoo ogeeyyii keessa
beekanirraa ragaa arganne yookaan fakkeenyaaf ejensii istaatistiksii irraa
yoo arganne malee siruma itti fayyadamuu hinqabnu. Tokkoffaa
dhageeffataan marti maalummaa isaa hinhubatu. Lammaffaa dogongorri
hiikkaa parsantii/dhibbantaa heddu. Lakkoobsota 1-9 jechaan barreessi.
Lakkoobsota 10-999 akkuma jiranitti lakkoobsumaan barreessi.
Lakkoobsota 1000 ol ta’an jechaafi lakkoobsaan barreessi. Fakaeenyaaf,
Kuma 15, kuma 90, miliyoona 12 kkf. Lakkoobsa bilbilaa, sa’aatii, qabxii
waldorgommii ispoortii, guyyaa fa’a addatti ilaalla.
3. Gabaajee Diiganii Barreessuu: gabaajee babali’isanii/diiganii
barreessuun dhageeffattoota raadiyootiif bareeda ta’a. Tokkoffaa hiikkaa
gabaajee sanaa akka dhageeffataan baru gargaara. Lammaffaa qubeewwan
jechoota akkamii irraa akka gabaajeffamanii barreeffaman hubata. WALQO
jechuurra Waldaa Aksiyoonaa Liqiifi Qusannaa Oromiyaa yoo jenne
bareeda. Gabaajee UNESCO garuu akkuma jirutti dubbisuutu irra wayya;
idil-addunyaatti beekkama waan ta’eef. Yoo barbaanne bifuma tokkoon
ammaa amma irra deddeebi’uurra, dhaabbata barnootaa, saayinsiifi aadaa
biyyoota gamtaayanii jechuunis maalummaa gabaajee sanaa ibsinee itti
fayyadamuuf nu gargaara. IMX, BLTO, ILQSSO jennee akka jirutti
QAJEELFAMA
Korree Shaanqullee Arsee (MA)
dubbisuu hindandeenyu; garuu gabaajee isaa barreessinee yeroo dubbisnu
ammo diigaa dubbisuun rakkoo hinqabu.
4. Sirna Tuqaalee: sirni tuqaalee iskiriiptii raadiyootif baay’ee
barbaachisa. Namni dubbisu eessatti hafuura akka baafatuufi eessaa hima
dubbisuu eegalee eessatti akka xumuruu qabu beekuu qaba. Sirni tuqaalee,
iskiriiptiin akka haala gaaritti dhangala’uufi namni waa dubbisu yoom maal
akka jechuu malu seera qabsiisa. Gulaalaan kana sirritti ilaaluu qaba.
Abbaan barreessullee waan akkanaa yoo eeggatee barreesse, guggufataa
iskiriiptii hindubbisu.
5. Jechoota ogummaa: jechoonni ogummaa kan ogeeyyiin ogummaa
tokkoo qofti itti fayyadaman, kan garuu, namoonni biroo hubachuu
hindandeenye jechuudha. Yeroo dhimma teknoolojii qofarratti dubbatamu,
ogeeyyiin jechoota ofiif beekan qofatti fayyadamu dhageeffataa
irraanfatanii yookaan jechoota bakka buusan dhabanii. Dhageeffatan waan
isaaf hingalle dhageeffachuuf dirqama hinqabu waan ta’eef, gara filannoo
biraa deemuu danda’a. Kun akka hintaane, haala salphaa namoonni
hubataniin barreessuu qabna. Roobootii ibsuudhaaf waan dhageeffataan
beeku sa’a jabbiin jalaa duutee ‘tolee’ tolchanii ittiin elmatan irraa ka’uun
ibsuunis mala tokko. Toleen jabbii bakka bu’uun faayidaa kenniti waan
ta’eef. Roobootiinis akkasuma nama bakka bu’uun tajaajila kenniti.
QAJEELFAMA
Korree Shaanqullee Arsee (MA)
Doktoroonni yeroo baay’ee waa’ee fayyaa irratti mariif yoo gara keenya
dhufan dhimma akkanaatin rakkatu. Kun akka hintaane, qopheessaan
dursee doktoraan waliin mari’achuun haga danda’u jechoota ogummaa
gara jechoota yookaan yaada bakka bu’uutti jijjiiruun iskiriiptii barreeffatee
istuudiyoo seenuu qaba.
6. Qubeessuu: jechoonni akkuma jedhamanitti yookaan akkuma
hiikkaa sirrii itti kennanitti sagaleeffamuu qabu. Akkas ta’uu baannaan,
hiikkaa yaadame dhiisanii hiikkaa biraa kennu. Kan gabaabachuu qabu yoo
dheerate; kan dheerachuu qabu gabaabachuun hiikkaa jijjiira. Fakkeenyaaf,
Dalloo Maannaa, Dalloo Mannaa, Dalloomannaa jennee barreessuun
garaagarummaa hiikkaa qaba. Abbayyii Coomman, Abbayyii Cooman,
Abbayi Cooman/Coomman jechuunis akkasuma garagarummaa qaba. Saqa
Coqorsaafi Saqqaa Coqorsaallee tokkoo miti. Jecha faxuula/faxuula silaa
jedhamu faaxula jedhanii ammaa amma dubbisuun dogongora. Nama
dhaamotee haguuggate ormi faaxula se’a jedhame sagantaa tokko
keessatti. Saadiq Ibraahim nama jedhamuun Zaadiq Abraham jechuun
hoo? Qubeessiifi hiikkaanis gargar. Shaale, Shaalle, Shaalee jechuunis
abbaa maqaa kanaan waamamu nikomachiisa isa sirrii yoo barreessuu
baanne. Nama aadaa ummataa hinbeekne nu fakkeessa. Wallaalaallee nu
fakkeessa. Jabeessanii waa ilaaluu dhabuullee muldhisa. Sirrummaa
QAJEELFAMA
Korree Shaanqullee Arsee (MA)
odeeffannoo keenyaa shakkisiisa. Kabajaa nu dhabsiisa. Aadaa ummataa
gaafachuun; maqaa namaatis taanaan abbaa maqaa saniin waamamu
gaafachuun, salphina hinqabu rakkoo jalaa nu baasa yoo ta’e malee. Mee
maqaa keessan haala isin ittiin of hinwaamneen namni aadaafi afaanicha
hinbeekne yoo isin waame maaltu isinitti dhagahama? Gulaalaan dhimma
akkanaa irratti dursee abbaa iskiriiptii barreesse duukaa dubbachuun haala
itti sagaleeffamu/dubbisamu waliigaluun waan ummanni jaalatu
qabachuudhaan qilleensatti bahuun waan filannoo biraa hinqabne.
Qubeessuu akka waan xiqqaa tokkootti warri ilaalan jiran waan ta’eef,
dogongora qubeessuu wallaaluun qabu kana irraa hubachuu danda’u.
Jechoota dubbisuun nama dhibu dursa irra deddeebisanii
dubbisuu/sagaleessuun ofitti fudhachuun gaarii ta’a.
7. Aangoon maqaa dursa:
Deetaa Ministira Daldalaafi industirii ebaluu ebaluu
Ministira Muummee ebaluu ebaluu
Pirezidaanti Dr ebaluu ebaluu
Doktora kabajaa artisti ebaluu ebaluu
Dogongoraan kan barreeffamu:
Ministir Deetaa/Ministeer Deetaa
Muummee Ministiraa/ministeeraa
QAJEELFAMA
Korree Shaanqullee Arsee (MA)
Artistiifi Doktora kabajaa ebalu
8. Hiikkaa/jijjiirraa: akka jirutti aadaa tokko gara aadaa biraatti
yookaan afaan tokko gara afaan biraatti jijjiiruun/hiikuun rakkoo ergaati
bu’aan isaa. Yeroo baay’ee jijjiirraan akkajiree(loyal to the source) dhaamsa
barbaadame hinqabaatu. Sadarkaa jechaatti, sadarkaa gaaleetti, sadarkaa
himaatti muldhata rakkoon akkanaa. Fakkeenyaaf, ‘maadireg’ taasisuu
jennee hiikaa jirra. ‘Yihi bendih endale’ kan jedhu ‘kun kanumaan osoo
jiruu’ jennee gara Afaan Oromootti jijjiiraa jirra. Ummanni afaan dubbata
caasaa afaanii akkasiitti fayyadamaa jennee yaaduu qabna osoo hinjijjiirin
dura. Taasisuu kan jedhu fakkeenyaaf ‘gochuu’ jechuu qabna. Akkas na
gootee, akkana na gootaa, maaf akkas goota jedha malee ummanni, akkana
na taasistee?, akkana na taasistaa?, akkas na taasistaa?...kkf hinjedhu.
Haala Itti Barreessinu/Akkaataa Itti Barreessinu(style)
9. Dhageettiif barreessi: nama si dhageeffatutti akkaataa waan
ergaa itti himtutti barreessi iskiriiptii kee. Akkaataa namoota lama walitti
haasawaniin walfakkeessii barreessi iskiriiptii kee. Istuudiyoo yoo seentus
nihimata malee hindubbistu. Haasawa fakkeessii himi. Yoo akkaan itti
beektee himuu wallaalte shaakali. Jechoota filadhu, hima gaggabaabsi,
haasawaati himi malee hindubbisin! Dhageeffattatti haasawi malee
iskiriiptii hindubbisiniif! Nama seenaa/duri durii namatti himu ta’ii
QAJEELFAMA
Korree Shaanqullee Arsee (MA)
barreessi; akka waan nama tokkotti haasawaa jirtuuttis duubbis. Hima
dheeraa barreessuun dubbiif hinta’u, sagalee olfudhatanii dubbiduufiyyuu
hafuuratu nama cita. Kan dhageeffatu ammoo mee irra naaf deebi’i jechuuf
yookaan ofiif irra deebi’achuuf carraa hinqabu; jala baanaan bahe
hindeebi’u. Dhageeffataa dirretti gatuun hinta’u hadiyyoo.
o Akka waan nama tokko isayyuu hiriyaa keetti haasoftuutti
barreessi,
o Akka waan hoogganaa kee yookaan amajaajii keetti dubbataa
jirtutti yookaan sagalee gadi buuftee yookaan dutaa akka waan
dubbattuutti hinbarreessin,
o Akka waan dhageeffataa duukaa(wajjiin) dubbataa/haasasaa
jirtuutti malee akka waan asi gadi itti dubbataa jirtuutti
hinbarreessin,
o Ibsitoota maqaa garmalee hinfayyadamin; keessattuu
maqdhaaltota akeektuu (demonistratives) namni gurraan
dhagaha waan ta’eef itti hinfayyadamin,
o Walqabsiistota yeroo haasawaa namuu itti hinfayyadamu; atis
raadiyoodhaafédhageettiif waan barreesitu akkasumatti
barreessi,
QAJEELFAMA
Korree Shaanqullee Arsee (MA)
o Seerlugni yookaan caaslugni sirriidha moo osoo hintaane,
gurraaf taanaan akkasumas hiikkaa sirriifi ergaa barbaadamu
dabarsinaan garmalee dhiphachuun hinbarbaachisu,
Mootummaan namoota yakka malaammaltummaatin
shakkaman heddu keessattuu aangoo ummataatin
dahatanii warra maallaqaafi qabeenya ummtaafi
mootummaa faaidaa dhuunfaa isaaniitif oolfatan
toowannaa seeraa jala oolchaa jira. Haaluma kanaan,
bulchaa godina ...guyyaa adhaa yakka
malaammaltummaatin shakkamanii poolisiidhaan
toowatamanii jiru. Kana jechuurra, bulchaan godina
akkasii yakka malaammaltummaatin shakkamanii
toowataman. Oduu kana osoo nama beektu yookaan
hiriyyaa keetti himtee, ebalu hidhamuu dhageettee yakka
malaammaltummaatin shakkamee? jetta.
Dhageeffattoonni raadiyoo waan sakondii 90 hanga
daqiiqaa jahaa fudhatu qofa yaadatu jedhu ragaaleen.
The enemy of good writing is the official, the bureaucrat and the so-called expert who uses words as a barrier to understanding instead of as a means of communication. Their aim is to mystify rather than enlighten. A good deal of the journalist’s time is spent translating their gobbledegook
QAJEELFAMA
Korree Shaanqullee Arsee (MA)
into plain English so ordinary people can make sense of it.(Boyd, 2001:61)
Fkn. Sababii waytiin kun ganna ta’eef, manni barnootaa cufamee,
barattoonni gara warra isaanii galanii hojii tola ooltummaa hojjataa
jiru. (maaliif yoo jenne deebii hinqabu;dhageeffataa taanee yoo ilaalle.)
Waytiin kun ganna. Manni barnootaa cufamee jira. Barattoonni gara
warra isaaniitti galanii hojii tola ooltummaa hojjatu.
10. Seensaafi bahiinsa: akkaataan itti barreessitu haasawa fakkaannaan
yoo gara dhimma tokkootti seentu dhimmicha beeksistee, jidduuttis irra
deebitee, yoo baatus akkasuma. Fakkeenayaaf, “obbo Caalaan akkas nuun
jedhan” jetta yoo seentu...jiddutti “haala jireenyaa/hojii obbo Caalaa irraa
muuxannoon fudhatamu...” jettee yoo baatu ammoo “...obbo Caalaa yaada
nuuf kennaniif baay’ee galateeffanna. Haala kanaan yoo hojjatan
hiyyummaa waliin waggaa baay’ee hinturan akka nuti arginetti.” Si’a
sadeenuu obbo Caalaan xiyyeeffannaa gaazexeessaa keessaa hinbaane.
Dhageeffataan jalqaba, jidduutti yookaan xumura irratti raadiyoo bane
dhageeffatus waa’ee nama Caalaa jechamuu akka dubbatamaa jiru
nihubata. Dogongorri yeroo baay’ee muldhatu, nama tokko osoo
hinbeeksine yookaan si’a tokko qofa maqaa dhahuun, achi booda “qonnaan
bulaan kun, qonnaan bultichi, qonnaan bulaa adda dureen kun,...”
QAJEELFAMA
Korree Shaanqullee Arsee (MA)
jedhama. Qonnaan bulaa kam akka ta’e wanti beekamu hinjiru. Kun, sun,
-ichi, kunneen, as... dhamjechoota iskiriiptii raadiyoo/dhageettiif
barreeffamu keessatti faayidaa hinqabne akka ta’an hubadhu.
o Manni barumsaa kun (raadiyoorratti akkamiin agarsiifta?)
o Aanicha/aanichatti/aanichi (Aanaa kami?)
o Kan ani uffadhe kun qoloo jehama. (kamtu?)
o Rifeensi dhahadhe kun ammoo quttoo jedhama. (akkamitti
dhahame?) akka ati beektu dhageeffattoonnis nibeeku jettee hintilmaamin.
Kanaaf, yoo irra deddeebii ta’a jetteellee shakkite irra deddeebi malee,
tilmaamaan yaada ibsamuu qabu bira hindarbin.
10. Sagalee Uumamaa: iskiriiptii yoo barreessitu sagaleen uumamaa
kan akkamii akka qabdu adda baafadhu. Dhageeffattoonni kee qaamaan
waan ati argite arguu baatanis miiraan si hubachuu danda’u. Sagaleen
uumamaa lubbuu raadiyooti waan ta’eef yeroo mara irraanfatamuu
hinqabu. Fakkeenyaaf, deeggartoota kubbaa miilaa dirree kubbaa miilaatti
iyyan waraabuun qofa eessa akka dhaqxeefi waa’ee maali akka odeessuuf
deemtu yoosuu baru. Lafa daggalaa yoo deemtes sagaleen shimbiraafi
bineensota gara garaa qophii keetiif dhama ta’u. Kanaaf yoo mara, waa’ee
sagalee uumamaa hindagatin qophii raadiyoo yoo hojjattu/iskiriiptii
raadiyoo yoo barreessitu.
QAJEELFAMA
Korree Shaanqullee Arsee (MA)
11. Gulaallii Iskiriiptii: seenaan qophii tokkoo yookaan iskiriiptiin
akkuma barreeffamee dhumeen gulaalaa bira gahee marii hojiin duraafi-
boodaarratti (brief) dhihaatee tamsaasaaf ta’a moo hinta’uu adda bahuu
qaba. Achi booda, sirratee (wanti bahu bahee kan dabalamu dabalamee)
istuudiyoo aseennama.
12. Duub-deebii:sagantaan/oduun osoo hintamsaane, akkuma
waraabamee xumurameen ilaaluu malee, erga tamsa’ee booda yaada
kennuun faayidaa hinqabu. Ragaan lakkoofsaa sirritti dubbisamuu,
maqaan namaafi bakkaa sirritti waamamuu, yaadni namaa bakka sirritti
fudhatamuu, akkasumas dhaamsi darbu osoo irraa hincinne waraabamuu
isaa ilaaluun dirqama ogummaati.
Dhoorkaadha:
- Osoo sagalee yookaan ragaa barreeffamaa dirree dhufe hindhageeffanne
yookaan hinilaalle iskiriiptii barreessuun,
- Garee tokkoof carraa sagalee dhageessifachuu kennuun garee tokko
dhoowwachuun,
- Ragaa sirrii ta’uun isaa hinmirkanoofne maaltu na dhibe jedhanii itti
fayyadamuun,
- Qaama madda odeeffannoo tokko fayyaduuf jecha ragaa lafarra hinjirre,
keessattuu lakkoofsa fa’a, fakkansanii dhiheessuun,
QAJEELFAMA
Korree Shaanqullee Arsee (MA)
- Barreeffama/seenessa yookaan iskiriiptii osoo gulaalaan hingulaalle
istuudiyoo seenanii dubbisuun,
- Iskiriiptii/barreeffama gulaalame hayyama gulaalaa malee, akka ofiif
barbaadanitti sirreessuun ergaa madaala hinqabne dabarsuun,
- Yaada gulaalaan akka bahu jedhe osoo keessaa hinbaasin dubbisuun,
- Dhibbeentaa(percentile) qaamni seeraan beekkamu kennuu male, abbaa
odeeffannoo kenne irraa qofa fudhannee iskiriiptii barreessuun,
- Ragaa barreeffamaa qaamni odeeffannoo sagalee isaatin nuuf kennu
dabalataan harkatti nuuf kenne faayidaa ummataafi ragaa qabatamaa lafa
jiruun osoo walhinmadaalchifne, akkuma nuuf kennametti kan keenya
goonee itti fayyadamuun, (hannas; dhugaatu dabas)
Dhageeffattoonni osoo itti hinyaadin raadiyoo dhagahu ta’a; osoo
qalbiii isaanii hinhawanne garuu ncaqasu jechuun rakkisaadha.
Namni sagantaa raadiyoo hojjatu, sammuu dhageeffattoota
keessatti, suuraa uumuun akka raadiyoo dhageeffatan haala
hawwataa ta’een hojjannaan ergaa darbu qabsiisuu mala.
Sagaleen, qoonqiifi muuziqaan akka dhageeffataan waan tamsa’u
jabeessee ilaalu shoora jabaa qabu. Sagaleen kan uumamaa fa’a
QAJEELFAMA
Korree Shaanqullee Arsee (MA)
ta’a. Qoonqi kan nama sagantaa hojjateefi kan namoota gaaf-
deebii irratti hirmaatanii ta’uu mala.
Muuziqaan miira namaatti dhihoodha. Qalbii namaa qaba. Fedhii
dhageeffataa kakaasa.
Malleen jahan armaan gadii kunneen seenessa raadiyoo cimaa
barreessuuf baay’ee nu barbaachisu.
- Dhageettii: seenessi(iskiriiptiin) raadiyoo nama ijaan
hinagarreef barreeffama. Danbaliin sagalee raadiyoon
dhageeffataa bira dhaqqabu suura waan ibsamuu sammuu
dhageeffataa keessatti uumuun akka waan tamsa’aa jiru
jabeessee ilaalu gochuu qaba.
- Jalqabumarratti fedhii dhageeffataa qabachuu:
seenessi barreeffamu seensuma irratti akka gaaritti kan
dhageeffataa hinqabanne taanaan dhageeffataan waan
dirqamuuf hinqabu. Gara raadiyoo biraa deema. Simbirti tan
jalqabaattu ija fudhata jedha mammaaksi. Seenessi keenya
QAJEELFAMA
Korree Shaanqullee Arsee (MA)
dhageeffataa qabachuu, waan sagantaa keessatti dhihaatuuf
deemu akka qalbii dhageeffataa qabatutti dhiheessuu qaba.
- Akeekuu(Power of suggestion): barreessaan seenessa
raadiyoo (radio script) dhageeffattoonni yoo hanga xumura
sagantaatti kan dhageeffatan ta’e waan akkamii fa’a, eessatti,
akkamitti akka dhiheessuf daangaa isaa dhageeffattoota
qabsiisuu qaba. Daangaa beekumsaafi muuxannoo akkamii
irratti akka sagantaan dhihaataa jiru muldhisuu jechuudha.
- Daangaa yeroo: dhimmi sagantaa raadiyoo keessatti
dhihaatu tokko yeroo murtaa’e keessatti kan xumuramu
ta’uu qaba. Daangaa yeroo keessatti maaltu dursee dhihaata?
Maaltu itti aana? Akkamiin xumurama?kkf fa’a miira
dhageeffataa qabachuuf akka tolutti dhiheessuun gaarii ta’a.
- Walabummaa (freedom of movement): akka nama
seenessa raadiyoo barreessuu tokkotti qopheessaan sagantaa
akka barbaadetti dhageeffattoota yaadaan fudhatee guuluu
danda’a jechoota filatamanitti fayyadamuun. Sagalee
uumamaa fa’attis fayyadamuun dhageeffattoota yaadaan
QAJEELFAMA
Korree Shaanqullee Arsee (MA)
bakka tokkoo fudhatee bakka tokkoti buusee miira isaaniitin
akka doolanan gochuu danda’a. Fakkeenyaaf, sagalee
fincaa’aa bishaaniifi waca simbirrootaa, sagalee weenniifi
qamalee kkf yoo fayyadame, dhageeffataan mana ofii taa’ee
raadiyoo dhageeffataa qalbiin daggala keessa nanna’a.
Muuziqaanis as keessatti qooda guddaa qaba.
- Waldiddaa (conflict): gaazexeessaa cimaan waldiddaan
ribuu dugdaa seenessa/barreeffama sagantaa raadiyoo akka
ta’e namuu itti hinhimu. Laafaafi jabaa, kufaatiifi milkaa’ina,
gaariifi hamaa, qabsoo jireenyaafi falli rakkoo kkf seenessa
sagantaa raadiyootif utubaadha.
Barreeffama(seenessa) gaarii:
- Kan namuu hubatu (clear): barreeffamni sagantaa
raadiyoo salphaa ta’uu qaba. Yaadni isaa tartiibaan
dhihaachuu qaba. Yaadni akka dhageeffataan hubatutti haala
gaariin yaa’uu qaba. Ergaan darbus kan hiikkaa gara garaa
qabaachuu hinqabu. Jechoota hedduu yookaan lakkoobsota
hedduu hima tokko keessatti akkuma sitti toletti hinruuqin.
QAJEELFAMA
Korree Shaanqullee Arsee (MA)
Himni jechoota 25 irraa ijaarame gaariidha. Kanaa ol
taanaan, hima lamatti adda qoodamu hubachuuf salphaa
ta’a. Gaalee of hindaneenyetti hinfayyadamin. Hima salphaa
tokkoon yaada kee barreessi. Jechoota dhageeffattoota
rakkisanittis hinfayydamin. Jechoota namni baay’een
beekutti fayyadam. Jechoota ogummaa gara afaan/yaada
namni baay’een beekuutti jijjiiri.
- Gabaabsuu(concise): dhageeffataan waan darbe irra
deebi’uu hindanda’u. Himoota gaggabaabsii barreessi.
Himoonni kee garmalee sadarkaa barbaadamuu gadis bu’uu
hinqaban. Kan dhageeffataan irra jireessiifi jiddugaleessi
hubachuu danda’u ta’uu qabu.
- Xuxxubbaa(completeness): seenaan sagantaa tokkoo
guutuu taanaan mamii malee ergaan barbaadame darba.
Gaafiiwwan: Maal? Eessatti? Yoom? Eenyuun? Akkamiin?
Maliif? Fa’a deebii argannaan seenessi(barreeffamni)
sagantaa mudaa hinqabu;mamiis hinqabu jechuu
dandeenya.
QAJEELFAMA
Korree Shaanqullee Arsee (MA)
- Haasawa(conversational): yaada akka gaaritti yaa’u yoo
ta’e malee sabaa himaan yoo haasawa hawaasa keessatti
barameen dhihaate bareeda. Akka ofii kee haasoftutti
seenessa(barreeffama) sagantaa barreessi. Sagalee olfudhuu
himi malee hindubbisinis. Seenessa kee erga barreesitee
xumurteen booda sagalee olfudhhuu dubbis; yoo san kan
haasawaaf ta’u moo kan hintaanee adda baafatta. Caasa
himaa namatti hintolleefi jechoota ulfaatan ilaalii kan
biraatin bakka buusi.
- Amma(current): seenaan seenessa keetti kan yeroon irraa
darbe akka hintaane ofeeggadhu. Waan dhageeffataan ijaa
gurraa qabu sagantaadha jettee hindhiheessin. Waan
jijjiirame yookaan dabalame duukaa bu’ii hojjadhu.
- Sirrii(c0rrect): lakkoofsiifi dhugaan lafa jiru osoo
hindabne, osoo hincabne akkuma jirutti dhihaachuu isaa
mirkaneeffadhu.