Saatvikta Hum Saatvikta ke bare mein baat kar rahe the. Aakhir saatvikta hai kya? Kya saatvikta ka matlab sirf vichaaron mein shuddhi hi hai. Sirf vicharon mein shudhhi ho aur karm mein nahin to kya vyakti satvik hai? Saawal yeh ki vicharon mein saatvikta aati kahan se hai? Apke aas-paas ke vatavaran se- apke aas-paas ke log kaise hain, kya sochte hain, unki prakruti kaisi hai ,unka khana-peena kaisa hai aur unke saathi kaise hain. Sabse mahtvapurna- aap par unka kitna prabhav padta hai.Shastra ke vachan hai ki –Jaisa khaye ann vaisa hove man. Aap shakahari hain tab bhi wo ann jo aap khate hain wo sahi kamai ka hai ya nahi- yeh bhi prabhav dalta aapke vicharon par tab masahari hona kitna prabhav dalega- yeh batane ki zaroorat hai kya? Aapne jab ek janwar ko khane ke liye maara tab uske man mein kya chal raha tha . Wo agar dara hua tha ya gusse mein tha tab wohi prabhav aapki mansicta par bhi aayega. Kyon kisi nirih ki hatya karke use apna bhojan banaye, kyon nahin hum kisi nirih ko jeevan dan dete?Badi takleef hoti hai agar hamare bacche ko koi ek thappad bhi maar de to aur hum apni jeebh ke swad ke liye kisi ki hatya kar dete hain! Mana ki wo hatya humne nahin ki,lekin yadi hum masahari na hote to who hatya kyon ki jaati- kahin na kahin hum hi jimmedar hain. Tamsik pravrati ka bhojan kabhi saatvikta nahin la sakta. Kyon har mahan vyakti ne ahinsa ka raasta apnane ka updesh diya. Ahinsa ka matlab sirf hinsa na karna nahin hai balki man,vachan,karma- kisi bhi tarah doosre ka dil na dukhana- wo ahinsa hai.Shakahari banana ahinsa ka marg apnane ki shuruaat hai. Ahinsa saatvik banane mein pratham sidi hai. Phir doosri hai-krodh na karna. Gussa karne wala vyakti vivek kho deta hai, sochne samajhne ki shakti kho deta hai aur phir jo nirnaya liya jata hai aur jis bhasha ka prayog kiya jata wo doosre ko kitna kashta deti hai.Kyon har nirnaya hum khud hi lena chahte hain, kyo nahin kuch samay par aur kuch bhagwan par chod dete.Pehle krodh ko shant karne ke upay karen aur phir koi nirnaya lene ki cheshta karen. Phir phal ko usi data par chod dein jinhone hume jeevan diya .Hamara bhala wo hamse jyada jante hain. Aur phir saatvikta se liye gaye har nirnaya mein khud ka nahin khuda ka haath hota hai to phir phal bhi meetha hi hoga.

Kyon nahin har zimmedari khuda par chod kar saatvik karma karen aur roz kuch meethe phalon ka anand lein.

Ishwar ki sharan saatvik hone ki antim sidi hai. Jo uska ho gaya wo saatvik hone ki rah par aa

gaya. Sirf uska sahara aur usi ki sharnagati- saatvikta aapke peeche peeche aayegi.

Shree Charano mein pranam.