Sadaasa guyyaa 9, bara 2010

Guyyaa Yaadannoo FDG ilaalchisee, sadaasa 6, bara 2010 Norway ,magaalaa Oslo, irratti

soneeffamee ture milkii fi injifannoon kabajame. Gumaachi WBOf godhames guddaa fi

boonsaa ture. Sagantaa kana kan qopheessee fi qindeesse koree madda galii ABO, kan

Awuropaa yeroo ta’u, seenaa FDG ilaalchisee, bara Oromoon humna alagaatiin qabame irraa

eegalee hanga har’aatti jiru, keessattuu ammoo bara 2005 keeessa sadaasa guyyaa 9, gaaffii

mirgaa baratoonni Oromoo karaa nagaan qindoominaan gaafatanii fi wareegamni, kafalame ,

akkasumas injifannoon argame guddaa akka ture seenaa yeroo ta’uu fi guyyaan kunis bara

baraan akka yaadatamu ibsame.

Wal-gahii kana kan qindeessan keessaa tokko J/Ayyaanaa Goobanaa turan. Isaanis yeroo

sagantaan wal-gahii kun gahu hirmmatotaan baga nagaan dhuftan jechuun tartiiba sagantaa

sanaa gabaabaatti ibsanii duuba; J/Mohammed Ahmed Dura Taa’aa Koree Hojii Geggeesituu

ABO Kutaa Scandinavia akka gara waltajiitti dhihaatan afeeran.

I. Akka kanaatti sagantaa bifa seminaaraan qophaa’e kana haasawa gabaabaan

gochuun kan bane, J. Mohammed Ahmed ibsa kennaniin, barattoota

Oromoo FDG keessatti hirmaatanii fi humna waraanaa Wayyaanneen

godinoota Oromiyaa bakka adda addaatti ajjeefaman hanga tokko maqaa

tuttuquun seenaan isaanii akkuma gootowwan Oromoo qabsoo bilisummaa

Oromoo keessatti wareegamanii kan yaadatamuu fi kan kabajamu ta’uu

hubachiisuun, kaayyoo isaan itti wareegaman sana fiixaan baasuuf

ammallee cimnee tokkummaan qabsaa’uu akka qabnu hubachiisan

.

Ittaansuun akka armaan gadiitti keessummoota adda addaatu mata duree gara garaa irratti

ibsaa fi barumsa kenne.

II. J. Dhugoomsaa Dhugaasaa, miseensa GS ABO duraanii fi yeroo amma

soorama kan bahan waa’ee seenaa FDG irratti yaada kennan, Innis fincilli diddaa

gabrummaa kan eegale bara Oromoon sirna kolonii Habashaa jalatti kufe irraa

eegalee, Mootummoota Habashaa dhufaa dabraa turan irratti bifa qindaawee fi hin

qindoofneen godinoota Oromiyaa adda addaa keessatti godhamaa kan ture yeroo

duraaf Oromoo kutaa Walloo keessa qubatuun akka eegalame tahuu ibsan. Kunis

Raayyaa fi Warra Baabboo keessatti Warqituun kan geggeeffamu Tewodros irratti

finciluun of irraa dhorkaa akka turan akka fakkeenyaatti ibsan.Finciloonni kunniin

boodarra gara qindoominaatti jijjiiramuun ijaarsa MT booda ABOn bu’urefamee

lola sirnaa fi bifa qabeessa qabu gochaa akka ture, kanarrattis injifannoolee hedduu

fi wareegamni guddaanis akka kafalame, bu’uureffama ABO irraa jalqabee

muuxannoo qabsoo keessatti argatanii fi horatan bal’inaan hubachiisanii jiru.

Guyyaan yaadannoo FDG kun guyyaa yaadannoo goototaa Ebla 15 wajjin kan

walfakkaatu ta’uu eeruun, kaayyoon jaallan kun yeroo adda adda irratti

wareegaman akka fiixa bahuuf ilmaan oromoo marti karaa isaaf danda’ame

jaarmiyaa fedhe jalatti hiriiree diina keenya waloo irratti qabsoo gochuuf

gumaacha karaa adda addaa irraa eegamu gochuu akka qabu hubachiisan.

III. Itti fufuun keessummaan afeerame obbo Baqqalaa Jiraataa ture. Obbo Baqqalaa

Jiraataa barreessaa WFDO kan ture yoo ta’u, mootummaan Wayyaanee sabab maqaa

ABO jedhu itti moggaasuun shira soba itti xaxee Oromoota bara dabre keessa murtii du’aa

fi hidhaa bara dheeraa itti murteeffame keessaa jalaa miliqee bahe dha. Waa’ee FDG

ilaalchisee waan arganii fi xiinxalan irraa ibsa bal’aa kennan keessaa cuunfaan isaa akka

armaan gadii ta’a. Erga Mootummaan wayyaanee humna qawween aangoo qabate irraa

eegalee ummanni oromoo karaa qindaawaa fi hin qindoofneen lolaa fi fincilaa akka jiru,

keessumattuu baratoonni Oromoo gaaffii mirgaa karaa nagaa gaafataniin kan mana

barumsaa keessaa arihatamanii fi ajjeefaman lakkoofsaan himuun akka nama dhibu,

Waldaan MT dhimma magaalaa FF ilaalchisee sababa hiriira baheen hidhamuu fi waajirri

isaa cufamuu irra dabree qabeenyaan isaa saamamuu, WFDOn akka seera biyyattiitti erga

hundeeffamee booda hojii gurguddaa akka hojjetee fi humna oromoo keessumattuu

barattootaa fi dardarran Oromoo haalan akka qindeessee fi daandii qabsoo bifa toftaa

bilchaataan akka geggeessaniif barumsaa fi muuxannoo cimaa akka kenneef, afaan

oromoo mana maree paarlamaa biyyattii keessatti akka dubbatamu gochuun fakkii guddaa

akka ture, humni oromoo yeroo ammaatti alagaa biratti kan sodaatamaa dhufee fi kabajaa

guddaallee akka horataa jiru, garuu oromoon humna isaa kana akka alagaan ilaalutti

hubataa akka hin jirre ibsan. Kanaaf oomoon humna isaa beekuu, xiiqeffachuu baruu,

hooggana isaaf kabajaa qabachuu fi hordofuu, dhaabolii oromoo kanneen mirga oromoof

falman marayyuu gargaaruu fi waltumsuun akka jiraatu gorsa hayyummaa kennuun yaada

isaanii xumuran.

IV. Isaanumatti aansuun Dr. Geetaachoo Jigii, miseensa WFDO fi bara 2005 keessa

filatamaa paarlamaa kan turanii fi erga biyyaa bahanii booda Gumii Paarlaamaa Oromoo

kan jedhamu ijaaranii qabsoo karaa dipiloomaasii gochaa kan jiran, yaada kennaniin,

ummanni Oromoo dhaaba isaa ABO humna, beekumsaa fi qabeenya qabuun akka cinaa

hiriiru, oguma qabaniin ijaaramuun egeree Oromiyaaf waan malu akeekuu fi gorsa

barbaachisu mara gumaachuun dirqama oromummaa bahuu akka qaban bal’inaan ibsuun

yaada kanaafis wixinee barbaachisu qopheessuun hawaasa Oromoo maraaf dabarsuuf

akka jiran ibsan.

V. Dhimma dubartootaa ilaalchisee aadde Almaaz Qixxeessaa fi aadde Amsalee Margaa

walduraa duubaan yaada kennaniin, dubartoonni mirga isaanii fi saba isaaniif falmataa

turan bebbeekamoon Addunyaa kanarra akka turanii fi jiran fakkeenyaaf maqaa dhahuun

dubartoota oromoo keessaallee kan akka aadde Warqituu fi Aster Gannoo akka turan,

qabsoo bilisummaa fi FDG keessattis dubartoonni oromoo hedduun akka wareegamanii fi

seenaa boonsaa kan galmeessan hedduu akka ta’an ibsan. Dubartoonni utubaa maatii fi

ummataa akka ta’an, ibsuun ilmaan isaanii gootummaa fi sabboonumaa horatanii akka

guddataniif daa’imummaa irraa eegalanii gorsaa fi barumsa barbaachisu kennuun dirqama

haadholii akka ta’e hubachiisan. Kana malees ijaaramuun Dubartootaa fi Hawaasa

Oromoo hedduu barbaachisaa tahuu irra deebi’anii ibsanii jiru.

VI. Dr. Dagafaa Abdiisaa miseensa Shanee Gumii Sabaa ABO kan ta’an bakka

kanatti argamuun dhaamsa ummata walgahii kanarratti argeef dabarsaniin, ” Jaallan

maal nuuf dhaamanii dabran ?” mata duree jedhu irratti gootowwan qabsoo

bilisummaa oromoo fi FDG irratti wareegaman keessaa kanneen akka Haajii Adam

Saadoo, Obbo Hayle Maaram Gammadaa fi Elemoo Qilxuu, Aja/ Dhibbaa

Maammoo Mazammir, General Taaddasaa Birruu faan yeroo adda addaatti ummata

Oromoof haala garaa garaa keessatti qabssoo Oromoo ilaalchisee ummataaf akka

barumsaatti jedhaa turan keessaa jechoota isaan ummata isaaniif dhaaman,

akkasumas diina isaaniitti himan akka fakkeenyaatti kaasuun dhaloota har’aaf fakkii

guddaa akka ta’e ibsuun barumsa onnee fi hamilee nama kakaasu dabarsan.

VII. Akkasumas Obbo Waaqee kan jedhaman hayyuun oromoo tokko, dhaamsa ummata

kanaaf gad jabeessanii dhaaman keessatti, amantiin oromoon yeroo ammaa hordofu marti kan

oromummaa booda dhufe waan ta’eef amantiin oromummaa fi qabsoo oromoo dura

dhaabbatu ykn qabsoo irraa dhorku marti balfatamuu fi balaaleffatamuu akka qabu

hubachiisuun, hordoftoonni amantii Kiristaanaa, Isilaamaa fi Waaqeffannaa harka

walqabachuun qabsoo saba isaaniif tumsaa fi gumaacha irraa eegamu akka godhaniif

hubachiisan.

VII. Obbo Rukelloo Boruu dardarri Oromoo walaloo barreessuun kan beekamu

walaloo ” Loli, WBO, loli ammallee” jedhu dhiheessuun qalbii fi hamilee ummata

walgahii kanarratti argaman kakaasee jira.

VIII. Gara dhumaa irratti qindeessitoonni sagantaa guyyaa kanaa aadde Ilfinesh

Qannoo fi obbo Ayyaanaa Goobanaa namoota waamicha godhameef kana kabajuun

bakka kanatti argaman galateeffachuun, akeekni qophii kanaa yaadannoo FDG

cinaatti gumaacha WBOf gochuu akka ta’e hubachiisan. Akka kanaatti namoonni

bakka kanatti argaman gumaacha maallaqa guddaa gochuun WBOf abdii fi lafee

dugdaa ta’uu isaanii hojiin mul’isan. Kanatti dabalees galiin isaan WBOf kan ta’u

suuraan J. Asilii Oromoo caalbaasiif dhihaatee galii guddaa argamsiisee jira.

Akkasumas, dhumarratti artistoonni Oromoo Abbabaa Abbashuu, Tottoobaa Taaddasaa,

Hayluu Kitaabaa fi humna haarawaa kan ta’an Hawwii H/Yesus, Daangaa H/Yesuusii fi

Firaa’oli Siyyum sirba aadaa fi ammayyaan ummata

bashanaansiisan.

Walgahiin guyyaa yaadannoo FDG, 2010 Oslotti godhame kun nagaa fi milkuun kabajamee

xumurame.

Gadaan Gadaa Bilisummaa ti !!