single-mother: ang bagong mukha ng pilipinang ina sa gitna ng mga suliranin ng kasalukuyang...
DESCRIPTION
A research paper for Kas 118 of the Women' s History in the PhilippinesTRANSCRIPT
UNIBERSIDAD NG PILIPINASDiliman, Lunsod ng Quezon
SINGLE-MOTHER:
ANG BAGONG MUKHA NG PILIPINANG INA SA GITNA NG MGA SULIRANIN
NG KASALUKUYANG PANAHON
Ni:
Frauline C. TadleBA Political Science
Isang Papel Panananliksik na Ipinasa kay
Dr. Ma. Luisa M. Camagay
Bilang Bahaging Katuparan
sa kursong Kas 118
Marso 2013
INTRODUKSYON
Ang pagiging magulang ay isang propesyon na karamihan sa ating lipunan ay
nakatakdang tahakin at sadyang hindi maiiwasan. Ito ang hanap-buhay na siyang nasa sentro ng
isang pamilya sapagkat layunin nitong hubugin ang mga susunod na henerasyon ng isang lahi.
Kaakibat nito ang di mabilang na mga tungkulin at responsibilidad kaya't ito ay karaniwang
pinag-tutulungan ng mag-asawa. Silang dalawa ang siyang magtataguyod ng isang pamilyang
may maayos na pamumuhay at buklod. Ang ama ang siyang tumutugon sa una sa pamamagitan
ng paghahanap-buhay, samantalang ang huli'y isang krusyal na prosesong nagaganap sa loob ng
tahanan na kung saan, ang ina ang siyang punong abala.
Sa kulturang Pilipino, 'Ilaw ng Tahanan' ang taguring sa mga ina. Bilang ilaw, pangunahin
niyang responsibilidad ang magbigay 'tanglaw' sa kanyang mga supling. Mula pa lamang sa
sinapupunan, pagkaluwal hanggang sa pagpapalaki, ina ang pumapasan. Bagaman may mga
kontribusyon din ang ama, ang ina, bilang siya ang naiiwan sa tahanan ang siyang namamahala
dito. Bukod pa dito, kasama rin sa kanyang mga pang-araw-araw na gawain ang pamamahala ng
tahanan. Sa madaling sabi, ang pagkakaroon ng maayos na pamumuhay ng pamilya ay hindi
lamang pinansyal na usapin kundi pantahanan rin. Samaktwid, ang ama at ina ay nananatiling
magkatuwang para maayos na mamuhay ang pamilya.
Sa ina rin nakasalalay ang harmonya sa loob ng pamilya, bilang bahagi ng kanyang
responsibilidad para sa pagkakabuklod-buklod ng pamilya. Ayon kay Linda Perez, ang tibay ng
loob ng isang ina ang isa sa susi upang mapagtagumpayan ito (n.p.). Masasabi rin na ang
karakter na ito ng isang Pilipinong ina ay isang reaksyon ng kanyang pagnanais na mabigyan ng
maayos na buhay ang kanyang mga anak. Napatunayan nang malaki ang kinalaman ng maaayos
na kapaligiran, lalo na sa loob ng tahanan sa paglaki ng bata. Ang mapayapang tahanan ay isang
mahusay na lugar upang mapaghusay ng bata ang kanyang pagkatao- bagay na siyang
pinakahahangad ng sinumang ina. Kaya't ang pagpapatibay ng loob ng isang ina para sa
harmonaya ng pamilya ay para pa rin sa kanyang mga anak.
Sa kabila ng lahat ng ito, ang pagkakakulong ng ina sa loob ng tahanan ang nagiging
dahilan kung bakit madalas na naisasantabi ang kanyang kapakanan at karamihan ng mga
kontribusyon sa pamilya. Ngunit, sa paglipas ng panahon, nag-iiba ang istruktura ng lipunan.
Kasabay niyon ay ang kamalayan at paraan ng pag-iisip ng mga mamamayan. Marami nang
babae, kasabay ng kanilang pagiging ina ay nagiging propesyunal. Pinapasok na nila ang mundo
na tinuturing na para sa mga kalalakihan. Tinatawag sila ngayon na mga working mom. Sila
yaong mga ina na nagsisilbi nang buong husay sa bayan at sa kanilang pamilya. Sila ay isa sa
mga bagong mukha ng mga Pilipinong ina.
Isa pang umuusbong ngayon na bagong imahe ng mga Pilipinong ina ay ang mga single-
mother. Kabilang ang populasyon ng mga single-mother sa lumalaking populasyon ng mga
single-parent families sa bansa na noong 2000 ay 4% pa lamang ng populasyon (Dacanay, 1) ay
naging 14% na noong 2012 (TUCP, n.p.). Hindi kataka-takang tawagin ito ni Patricia Tanner
Nelson na fastest growing family lifestyle (Castillo, 16) sa mundo.
Ano nga ba ang single-parent families? Binigyang kahulugan ito ni Carmela D. Ortigas.
Ito ang depinisyon na kanyang ibinigay batay sa orihinal na pagkakasulat:
“...an individual who is raising a child or children independetly of a spouse for an extended period of time. The children are raised in single-parent families or in one-parent homes, without having to deal with the stigma attached to having come from a broken family...The term 'one-parent family' or 'single/solo-parent home' is in fact the more accurate and positive description of a lifestyle and status (Creative Solo Parenting, 12).”
Marami sa mga single-mother ay dulot ng paghihiwalay na mag-asawa. Maliit na porsyento
lamang ang dulot ng pagkamatay ng kabiyak at mga asawa ng OFW. Sang-ayon din sa 'Solo-
Parent's Welfare Act of 2002, matututring ding single-mother ang mga asawa ng mga bilanggo at
mga nag-ampon (NSO, n.p.).
Kabilang din sa mga kategoryang kapuwa ibinigay ni Oritigas at ng 'Solo-Parent's
Welfare Act of 2002 ang mga magulang, partikular na dito ay ang mga ina na pinili lamang
magkaroon ng anak. Hindi pang-karaniwan ang ganitong kaso sa ating lipunan. Ang pagiging
magulang ay mahirap at hihigit pa kung ikaw lamang mag-isa. Hindi maiiwasang magkaroon ng
interes ang mananaliksik hinggil sa buhay ng mga ina na ito na mas piniling itaguyod nang mag-
isa ang anak sa kabila ng labis na hirap.
Isa pang uri ng single-mother ay dulot ng teenage-pregnancy (Castillo, 18). Pangunahing
sanhi nito ay ang tumataas na bilang ng mga kabataang matuturing na 'liberated' pagdating sa
usapin ng seks (Bautista, 22). At dahil sa ang populasyon ng bansa ay karamihang
Katoliko,lubhang ipinagbabawal ang aborsyon dito. Upang hindi maging pabigat sa ibang kasapi
ng pamilya, may 66% ng mga batang ina ang pinipili na lamang na maging single-mother sa
halip na panagutin ang ama ng kanyang anak (Castillo 18).
Ang buhay, partikular na ang mga suliranin ng dalawang klase ng single-mother na ito
ang siyang paksa na pinili ng mananaliksik. Tulad ng nasabi na, ang pagiging magulang ay
lubhang mahirap, lalo na kung nag-iisa na lamang. Sa kabila ng katotohanang ito, anu-ano nga ba
ang mga kondisyong nagtulak sa kanila para tahakin o masadlak sa ganitong sitwasyon? Anu-ano
ang mga problema na kanilang kinahaharap, lalo na sa usapin ng pagpapalaki ng bata at
pinansyal at paano nila ito nasosoluyunan? Ito ang mga katanungang sinubukang sagutin ng
mananaliksik sa ginawa niyang pag-aaral sa buhay ng dalawang single-mother: isang pinili o
intensyunal at isang aksidente lamang o hindi intensyunal. Susubukan ding tignan ng
mananaliksik ang epekto ng traditional na istruktura na pamilyang Pilipino sa kalagayan ng mga
single-mother sa bansa.
INTENSYUNAL NA SINGLE-MOTHERFe Delos Santos
37 taong gulang na si Fe nang magkaroon ng kinakasama na higit pang bata sa kanya.
May ilang taon na rin sila nagsasama nang mapagtanto niyang ang pagbuo ng pamilya ay isang
bagay na hindi niya ninanais pa. Ayaw niyang magkaasawa at ang gusto niya lamang ay
magkaroon ng sex life at maranasang manganak bago siya tumanda. Nakadagdag pa sa mga
dahilan niya ng hindi pag-aasawa ay ang masasakit na karanasan niya sa tuwing sila ay
magtatalik ng kanyang partner. Ang pagkaroon ng anak na lamang ang kanyang inaasam.
May katagalan din bago sila makabuo. Bagaman nakahanda ang kanyang kapareha na
siya'y pakasalan, buo na ang kanyang isip na iiwan ang bata sa ama nito at bumalik sa buhay
dalaga pagkatapos manganak. Noong araw ng kanyang panganganak, una silang nagpunta sa
isang ospital sa Malati kung saan ninais ng mga doctor na isailalim siya sa isang caesarian na
operasyon. Hindi siya sumang-ayon dito at lumipat sila ng osiptal ng Boni kung saan pumayag
sila sa hiling niya.
Ang kanyang determinasyon na iwan ang anak ay naglahong bigla nang masulyapan niya
ang supling. Ika nga niya, natural pa lang lumalabas ang 'motherly instinct' ng babae sa oras na
makita niya ang kanyang anak. Biglang nagbago ang kanyang isip at nagdesisyong kunin ang
bata. Dali-dali niyang inasikaso ang sertipiko ng kapanganakan nito at literal na itinakas mula sa
ospital. At doon nagsimula ang buhay nila bilang isang single-mother.
Pinansyal na mga problema at solusyon
Dahil hindi alam ng pamilya niya na siya'y nagdalang-tao, nagulat na lamang ang mga ito
nang bumalik siya sa kanilang tahanan na dala ang anak. Pinapili siya ng mga magulang: kung
makikipag-usap sa ama ng bata ay hindi siya tutulungan o susubukang kalimutan ang kapareha at
siya'y tutulungan ng pamilya. Pinili niya ang huli. Tinulungan nga siya ng mga kapatid, lalo na
ang mga lalaki. Subalit, kalaunan nagkaroon sila ng hindi pagkakaunawaan kaya't umalis siya sa
tahanan nito.
Nagtungo siya sa kung saan siya ngayon nakatira nang wala anumang papeles na dala na
maaari niyang magamit upang makapasok. Naging mahirap ang buhay nilang mag-ina. Tumira
sila pansamantala sa isang bakanteng bahay hanggang sa may isang empleyado ng DILG ang
naawa at pinatuloy sila sa tahanan nito. Dahil sa kawalan ng sapat na papeles para sa isang
trabahong may sapat na kita, napilitan siyang mamasukan bilang katu-katulong ng kung sinu-
sino hanggang sa mapadpad siya sa puder ng isang may-ari ng panaderya.
Nang isang araw, bilang siya ay may pinag-aralan, kinausap niya sa wikang Ingles ang
anak ng may-ari. Laking gulat ng ina ng bata nang sumagot ito kay Fe sa parehong wika. Inalok
siyang maging tyutor ng bata. Noong una ay ayaw niya sapagkat hindi niya talga pinangarap na
maging isang guro. Ngunit dahil kailangan niyang kumita para sa anak, tinanggap niya ito. Sa
ngayon, kilala siyang magaling na tyutor sa lugar na iyon.
Kalaunan, kinuha siya ng baranggay bilang hukom. Maraming taon rin siyang nanilbihan
sa baranggay, kasabay ng pagiging tyutor niya. Nang siya'y bumitiw dahil sa dami ng trabaho
bilang isang hukom, inalok sa kanya ng kapitan ang posisyon na mamahala sa Women's Desk.
Tinanggap niya rin ito. Sa ganitong pamamaraan niya binuhay at tinutusan ang pangangailangan
nilang mag-ina bukod pa sa mga tulong na ibinibigay ng ilan sa kanyang mga kapatid na
nangibang-bansa.
Mag-isang Pagpapalaki ng Anak
Nasa ikalawang taon na sa sekondarya ang anak na lalaki ni Fe. Sa loob ng maraming
taon, naging katuwang niya ang kanyang mga kapatid na lalaki sa pagpapalaki ng anak. Ang
kanyang mga kapatid na lalaki, lalo na iyong empleyado ng Kagawaran ng Edukasyon ang
siyang tumatayong ama sa kanyang anak.
Hindi maikakaila ni Fe na malaki ang kinalaman ng pera sa maayos na pagpapalaki ng
anak kaya't di kataka-takang ganoon na lamang ang kanyang pagsisikap upang matugunan ang
mga pangangailangang materyal nilang mag-ina. Bukod sa suliranin ng salapi, minsan na rin
naging problema ni Fe ay ang pakikibarkada na anak. Nabarkada ang anak niya sa ilang mga
kabataang humaling na humaling sa paglalaro ng kompyuter. Umabot din sa punto na kung saan
ay nangungupit na ang bata mula sa kanya at hindi na rin pumasok sa loob ng isang buwan.
Upang matigil ang pagloloko na ito ng anak, tuluyang isinantabi ni Fe ang pamamalo at
sa halip ay masinsinang kinausap ito. Ayon kay Fe, hindi na epektibo ang pamamalo ng kabataan
ng kasalukuyan sapagkat higit silang magrerebelde kung sa ganoong paraan sila didisiplinahin.
Hinikayat niya ang anak na maging bukas sa usapan. Kinausap niya ito kung gusto na ba nitong
tumigil sa pag-aaral at ipatitigil niya ito. Nabigla ang anak at nagsabing nais pang mag-aral.
Nagsimulang magtino ang anak. Ikinatuwa na lamang ni Fe na hindi nalulong sa iba pang bisyo
ang anak tulad ng sigarilyo at alak.
HINDI INTENSYUNAL NA SINGLE-MOTHERJennifer Matias
Halimbawa ng isang batang ina si Jennifer. 18 taong gulang siya nang mabuntis.
Nakulong ang kanilang ama halos isang dekada na ang nakalilipas kaya ang ina na lamang nila
ang kanilang tanging magulang. May pagkapamapangaral ito at mahigpit ngunit, ayon kay
Jennifer, hindi naging mahusay na modelo ng sarili niyang mga pangaral ang ina. Ninais niyang
lumaya mula dito. Ito ang ang nakikita niyang pangunahing dahilan kung bakit siya napunta sa
ganoong sitwasyon. Pakiramdam niya ay tila wala siyang masasandalan.
Nahanap niya ang sandigan na iyon nang sumali siya sa isang text clan. Nang minsan ay
nagdesisyong magkita-kita ang mga kasapi niyon ay hindi naiwasang nagkainuman sila. Doon
nangyari ang hindi inaasahan. Noon una ay hindi niya alam na nagbunga pala ang ginawa nila
noong gabing iyon. Sa loob ng tatlong buwan ay hindi siya nagduda dahil iregular naman ang
kanyang buwanang dalaw. Inakala niya na lamang na bilbil ito ngunit nang maramdaman niyang
may gumagalaw sa loob ng kanyang tiyan, alam niya nang buntis siya. Sa kasamaang palad,
hindi pa handa ang ama ng bata sa bagong responsibilidad na ito.
Dahil sa takot lumayas siya sa kanilang tahanan at nagpalipat-lipat siya nang tahanan
hanggang sa patuluyin siya ng dating kasintahan at ng pamilya nito. Doon ay inalagaan siya nang
buong husay hanggang siya'y manganak. Binalak niya pang ipalaglag ito ngunit dahil may
tatlong buwan na ay delikado nang gawin ito. Naisip niya ring ipaampon ang kanyang anak
ngunit nang masilayan niya ang kanyang sanggol at nakitang maganda ang bata ay naawa siya
rito at hindi na lamang itinuloy ang kanyang binalak.
Nang mabalitaan ng ina at mga kapatid ang kanyang kinaroroonan, agad siyang
pinuntahan doon at iniuwi sa kanila.Magkahalong galit at awa ang natanggap niya mula sa
sariling pamilya. Tinangka pang hanapin ng kanyang kuya ang lalaking nakabuntis sa kanya
ngunit si Jennifer na rin ang pumigil sa kanya. 'Para saan pa?,' ika niya. Bagaman nakatatanggap
ng mga panunumbat, lalo na mula ina, nanatili na lamang siyang tahimik dahil alam niya sa
sariling na kasalanan niya ang nangyari. Liban na lamang kung nadadamay na ang anak ay
nagsasabi siya huwag nang idamay pa ito.
Pinansyal na mga problema at solusyon
Dahil bata pa nang siya ay magkaanak, natural lamang para kay Jennifer ang walang
trabaho. Hindi pa niya natatapos ang Sekondarya nang siya ay mabuntis. Kaya't upang sabay na
mabigyang oras ang kanyang anak at pag-aaral, pumasok siya sa isang Open High School
program nang sa gayon ay tuwing Sabado lamang niya kailangang pumasok. Kapag makatapos,
binabalak niyang magkolehiyo at kumuha ng kursong may kinalaman sa kompyuter upang
makangibang bansa.
Tumutulong na rin ang kanyang ina sa pag-aalaga ng apo sa tuwing aalis at papasok sa
eskwelahan si Jennifer. Malaking bahagi ng salaping ipinantutustos niya sa mga pangangailangan
ng anak ay mula sa kapatid niyang naghahanap buhay sa ibang bansa. Palibahasa ay walang
anak, inalok siya ng kapatid na aalagaan ang anak sa oras na kinailangan niya nang maghanap-
buhay. Ito ang isang bagay na hindi niya tinanggihan.
At dahil nga unang pamangkin, giliw na giliw ang kanyang mga kapatid na lalaki sa anak
ni Jennifer. Maging ang kuya niya na may trabaho sa Sucat ay tumutulong din. Ito pa ang punong
abala sa paghahansa sa unang kaarawan ng pamangkin. Ang suporta mula sa ama ng bata ay
hindi niya kailanman hinanap pa.
Mag-isang Pagpapalaki ng Anak
Nasa isang taon pa lamang ang anak na babae ngayon ni Jennifer. Sa ngayon ay hindi pa
ito magtatanong ng tungkol sa ama. Isa pa, ang mga tiyuhin naman nito ang siyang tumatayong
ama para sa sanggol. Para kay Jennifer, kung darating ang panahon na hanapin ng anak ang ama,
sasabihin niya ritong iniwan na silang mag-ina nito. Kung magpumilit ay dadalhin niya ang anak
sa tahanan ng ama.
Aminado si Jennifer na tulad ng ibang ina, ayaw niyang maranasan ng anak ang mga
naranasan niya. Hindi niya nanaising gayahin ang paraan ng pagdidisiplina ng sariling ina. Sa
halip ay bibigyan niya ang anak ng higit na kalayaan na matagal na ipinagkait sa kanya. Ang
kalayaang iyon, nang hindi mamihasa ang anak, ay bibigyan rin niya ng limitasyon. Maaaring sa
ngayon ay mahirap itong isipin at isakatuparan, lalo na sa katulad ni Jennifer na maagang
namulat sa pagiging ina. Ganoon pa man, ang paghahangad niya na magkaroon ng maayos na
buhay ang anak ang siyang nagpapatibay ng loob niya.
Maraming napagtanto si Jennifer mula nang maging ina. Tuluyan siyang nawalan ng
kalayaang gawin ang anumang naisin niya at higit pang inuuna ang kaligayahan ng anak kaysa sa
sarili niya. Ngunit mababakas kay Jennifer ang kaligayahang dala ng anak sa kanya. Oo nga't
maraming nagbago sa kanya ngunit tila higit pa niyong pinagtibay ay kanyang pagkatao.
PAGSUSURI
Ang dalawang maikling salaysay na ito ay ukol buhay ng dalawa sa mga klase ng single-
mother: yaong intensyunal o pinili lamang magkaroon ng anak ngunit hindi ng asawa at hindi
intensyunal, samakatwid ay hindi sinsadyang napasok sa ganoong estado ng buhay. Bahagi rin
nito ang dahilan kung bakit sila nahantong sa ganoong sitwasyon. Sinuri rin kung paano
binibigyang solusyon ng isang single-mother ang mga problemang pampinansyal at pagpapalaki
ng bata. Naipakita rin dito ang naging kontribusyon ng pamilya upang matulungan ang single-
mother.
Kahit na sa magkaibang pamamaraan nag-ugat ang dahilan ng kasalukuyan nilang
sitwasyon, may mga bagay na parehas sa buhay nina Fe at Jennifer. Pinakauna at
pinakamahalaga na rito ay nang piliin nilang akuin ang responsibilidad ng pagiging magulang.
Matatandaan na nakapagpasya na si Fe na iiwan ang anak sa ama nito at babalik sa buhay dalaga
samantalang si Jennifer naman ay binalak pa itong ipalaglag at tinangkang ipaampon. Ngunit ang
kanilang mga desisyon ay nagbagong bigla nang masilayan nila ang kanilang mga anak.
Napatunayan dito na ang pagmamahal ng isang ina sa kanyang anak ay tila natural nang
nakatanim sa katauhan ng bawat babae. Walang desisyon ang makapipigil sa isang ina na
pangalagaan ang supling.
Ikalawang pagkakatulad ng dalawang ina ay pareho silang tinanggap ng pamilya. Kahit
na noong una ay pagkabigla ang kanilang nakuhang reaksyon mula sa ito ay bukas palad pa rin
silang tinggap. Ayon sa isa pang akda ni Carmela D. Ortigas, mahalaga para sa isang single-
parent ang suporta ng pamilya lalo na sa pagpapalaki ng anak (Solo-Parent Experience, 25) dahil
sa kanila huhugot ng lakas ng loob at suporta ang isang single-mother. Patunay dito ay ang
malaking tulong na nagawa ng pamilya nina Fe at Jennifer sa kanila. Mula sa mga
pangangailangang pampinansyal hanggang sa mahusay na pagpapalaki ng bata ay nariyan ang
kanilang pamilya na handa umalalay.
Isa pang mahalagang tulong naiibibigay ng pamilya sa katulad nina Fe at Jennifer na mga
single-mother ay ang pagkakaroon ng mga taong tatayo bilang ama sa kanilang mga anak, sa
katauhan ng kanilang ama at mga kapatid na lalaki. Ito ay sa kabila ng tumataas ng bilang ng
pamilyang Pilipinong nukleyar na umabot na sa halos 80%. (Castillo, 13). Bagaman nukleyar sa
istruktura, ayon kay Castillo, nanatiling ekstended ang fanksyon ng pamilyang Pilipino.
Samakatwid, kahit na hindi nakatira sa isang bubong, nanatili ang pagsuporta ng bawat kasapi ng
pamilya sa isa't-isa. Makikita natin ito sa naging kapalaran nina Fe at Jennifer kung saan bukal sa
loob na tumayong ama ang kanilang mga kapatid na lalaki sa kanilang mga anak.
Pareho din silang hindi humingi ng tulong sa ama ng kanilang anak. Kahit na alam nilang
may nag-aabang sa kanilang labis na paghihirap dahil sa pinili nilang istruktura ng pamilya, buo
ang loob nilang hinarap iyon para sa anak. Hindi na inalam pa ng mananaliksik ang dahilan kung
bakit nila ginawa iyon bilang pagrespeto sa kanilang pribado at personal na buhay ngunit kung
ibabatay sa takbo na kanilang buhay matapos na magkaroon ng anak ay masasabing isa iyong
mekanismo ng single-mother nang sa gayon ay hindi na siya makulong pa sa nakaraan at tuloy-
tuloy na makasulong sa hinaharap upang higit na mabigyan ng magandang buhay ang anak.
Bilang bunga ng hindi nila paghingi ng tulong mula sa ama ng kanii-kanilang mga anak,
hindi na rin ginawang tungkulin nina Fe at Jennifer ang sabihin ang katotohanan sa kanilang mga
anak. Sa kasalukuyan ay hindi naman gaanong nangungulit ang anak ni Fe hinggil sa katauhan
ng kanyang ama. Marahil ay dulot na rin ito ng presensiya ng mga tiyo na tumatayong ama at
maging ng positibong pananaw sa buhay ng ina ang tumutugon sa kawalan ng ama (Ortigas, sa
Solo-Parent Experience, 26).
At kung sakaling dumating ang araw na magtanong ang kani-kanilang mga anak tungkol
sa ama, magkaiba ang naging sagot nila. Para kay Fe, hahayaan niya ang anak na hanapin ito
samantalang si Jennifer naman ay nakahandang ituro ang tahanan ng ama sa anak. Ang
pagkakaibang ito ay marahil dulot ng magkaibang sitwasyon na naging dahilan ng kanilang
pagiging single-mother. Si Fe, na kung saan ang relasyon niya sa ama ng bata ay natapos nang
araw na itakas niya ang anak ay wala nang intensyong makipagkita dito. Samantala, dahil
aksidente lamang ang pagkakabuntis ni Jennifer, maaaring pinasan niya ang responsibilidad na
ipaalam ang katotohanan sa anak at sa ama ng bata kaya't gayon na lamang ang pagpayag niya na
ituro sa anak ang kinaroroonan nito. Magkagayunpaman, pareho nilang hindi ipinagkait sa mga
anak na makilala ang tunay nilang ama.
Hindi rin nakaligtas ang dalawang ina na ito sa hirap na dulot na pagiging single-mother.
Dahil magkaiba ng dahilan kung bakit sila naging isang single-mother, magkaibang aspeto ng
kani-kanilang buhay ang nagpahirap sa kanila Fe at Jennifer. Si Jennifer, bilang isang dalagang
ina ay kinaharap ang epekto ng biglang pagbabago sa kanyang buhay. Tulad rin ng iba pang
single-mother dahil nabuntis nang hindi sinasadya, nakatanggap rin siya ng mga panghuhusga
mula sa pamilya at ng konserbatibong lipunan. Kinaharap niya ang takot nang mag-isa sa loob ng
ilang buwan siyang naglayas mula sa kanilang tahanan. Wika nga niya, 'Parang panaginip lang.
Gusto ko nang magising. Kasi hindi ko akalain na may anak na ako eh'. Iba ito kay Fe dahil
intensyunal ay higit siyang naging handa sa pagbabagong ito, kaakibat rin ng edad niyang
maituturing nang matanda para maging bagong ina.
Sa kabilang banda, pawang ekonomikal ang naging problema ni Fe. Dahilan ito upang
tumanggap ng kahit anong marangal na trabaho upang kumita lamang, kahit na nakatuntong soya
ng kolehiyo. Patunay lamang ang buhay niya sa limitadong mga oportunidad at mababang kita
ng kababaihan. Doble ang pasanin ng mga single-mother dahil sa kawalan ng asawang maaaring
mangalaga sa anak kung maghahanap-buhay. Pumapasok din dito ang mabuting naidudulot ng
ekstended na fanskyon ng pamilyang Pilipino dahil maaaring ipagkatiwala ng single-mother ang
anak sa kanyang mga kapatid at magulang.
Sa kabilang banda, si Jennifer naman ay halimbawa ng isang inang nagsisikap na
makatapos ng pag-aaral upang makakuha ng diploma para sa isang matinong trabaho. Ayon nga
kay Ortigas, ang labis na pagnanais na maibigay ang maayos na buhay ang kanyang mga anak
ang nagtutulak sa single-mother upang maghanap-buhay (The Solo-Parent Experience, 92).
Kasabay nito, higit na nailalabas ng isang babae ang kanyang natatagong potensyal kaysa kung
nakatago lamang siya sa loob ng tahanan. Marami sa mga single-mother ang pumapasok sa mga
negosyo upang kumita. May iba naman, katulad ni Jennifer na itinutuloy ang kanilang pag-aaral
at ginagamit ang pinag-aralan upang maging ganap na mga propesyunal. Kung iisipin, ang
pagiging isang single-mother ay hindi lamang negatibo kundi may positibo ring naidudulot sa
isang babae. Higit siyang nabibigyan ng laya na paunlarin pa ang kanyang sarili, liban pa ang
maging isang ulirang ina.
May pagkakaiba o pagkakatulad man sa mga karanasan nina Fe at Jennifer, hindi pa rin
nito mababago ang katotohanang sila ay bahagi ng lumalaking populasyon ng mga single-mother
sa Pilipinas. Sila na kumakatawan sa mga bagong mukha ng pagiging isang Pilipinang ina ay
nagpapamalas ng katatagan ng loob higit kanino man. Higit pang marami suliranin silang
dinaranas bukod sa mga nabanggit na, ngunit dahil sa suporta ng pamilya at pagmamahal sa anak
ay nalalampasan nila ang mga iyon. Ang mga kwento ng mga single-mother na sina Fe at
Jennifer ang nagpapatunay na ang tapang, tibay, lakas ng loob, pagmamahal at dignidad ng isang
Pilipina kailanman ay hindi natinag.
KONKLUSYON
Ang pagiging magulang isang bagay na mahirap gampanan sapagkat dito nakasalalay ang
susunod na salinlahi. Dahil sa bigat ng pasanin na ito, karaniwan na itong tangan ng dalawang
balikat: isang ama at isang ina. Sa paglipas na panahon ay nagbago ang istruktura ng lipunan.
Kaakibat nito ay ang pagbabago rin ng pamilya. Dumarami na ngayon ang bilang ng mga single-
parent at malaking populasyon nila ay mga single-mother. Ang pasanin ng dalawang tao ay
kinakaya na ngayon ng isa.
Maraming problema na dapat solusyunan ng isang single-mother. Dalawa sa mga ito ay
ang pinansyal at ang maayos na pagpapalaki ng bata. Ang mga salaysay ng dalawang klase ng
ina na inaral ng mananaliksik: intensyunal at hindi intensyunal ay kapuwa nagpamalas ng isang
sulyap sa buhay ng isang single-mother. Pareho nilang pinatunayan na ang pagiging isang ina ay
natural at lalong umuusbong nang makita nila ang kani-kanilang mga anak. Kapuwa din silang
nakatanggap ng tulong mula sa pamilya at hindi rin nila ipinaalam sa anak ang katotohanan ukol
sa ama, bagaman handa silang payagan ang anak na hanapin ito.
Magkaibang problema ang hinarap ng dalawang ina. Habang ni Jennifer ay problemang
pang-emossyunal dahil hindi intensyunal ang kanyang pagdadalang tao, si Fe naman ay
pinansyal dahil biglaan ang naging desisyon niyang maging single-mother. Magkaiba man,
pareho parin nila itong hinarap nang buong tapang at tatag ng loob upang makamtam lamang ang
pinaka-aasam na buhay para sa kanilang anak. Patunay lamang sila, sampu ng mga single-mother
sa buong bansa ng tibay ng Pilipinang ina na tunay na kahanga-hanga.
MGA SANGGUNIAN
'14M Filipinos are Single Parents.' Trade Union Congress of the Philippines. TUCP.org., 9 Hunyo 2012. <http://www.tucp.org.ph/news/index.php/2012/06/14m-filipinos-are-single-parents/>. Nakuha noong 28 Pebrero 2013.
Bautista, Paulina. Young Unwed Mothers: Medical, Psychosocial and Demographic Implications. Quezon City: Giraffe Books, 1997.
Castillo, Gelia. Where Food and Population Meet: The Filipino Household Among Other Households. Quezon City : UP-CIDS, c1993.
Dacanay, Athena Maniya. Does It Take Two?: A Comparison of the Academic Performance of Filipino Children from Single-Parent and Dual-Parent Families. Quezon City: College of Home Economics Library Archives, University of the Philippines, October 2006.
'Female Headed Households (% of Household with a Female Head) in the Philippines.' Trading Economics.Tradingeconomics.org., n.d. <http://www.tradingeconomics.com/philippines/female-headed-households-percent-of-households-with-a-female-head-wb-data.html. Nakuha noong 28 Pebrero 2013.
Rojas-Aleta, I., et.al. A Profile of Filipino Woman: Their Status & Role. Manila: Philippine Business for Social Progress, October 1977.
National Statistics Office. 'Q&A: Solo Parent's Welfare Act and Parental Leave. ' Republic of the Philippines: National Statistics Office. Census.gov., 3 Marso 2008. <http://www.census.gov.ph/content/q-solo-parents-welfare-act-and-parental-leave>. Nakuha noong 16 Marso 2013.
Ortigas, Carmela. Creative Solo Parenting: Here's How!. Quezon City : Office of Research and Publications, Loyola Schools, Ateneo de Manila University, 2008.
_____. The Solo- Parent Experience: A Growing Social Phenomenon. Quezon City: Office of Research and Publication, Loyola Schools, Ateneo de Manila University, 1991.
Perez, Linda. 'The Filipino Woman's Role in the Humanization of Social Life.' The Humanization of Social Life: Theory and Challenges. Ed. Wheatley, C., et.al. CVRP.org, 6 Pebrero 2009. <http://www.crvp.org/book/Series07/VII-18/chapter-13.htm>. Nakuha noong 16 Marso 2013.