søknad om støtte til nettleksikon - wikimedia · store norske leksikon as oslo 14. mai 2014...
TRANSCRIPT
papir → Næringsliv og teknologi → Industri → Papirindustri
stoff fremstilt av fibrer i trevirke og andre råstoffer som
frigjøres ved mekaniske og kjemiske prosesser og forenes
ved papirfabrikasjonen til et sammenhengende ark.
Store norske leksikon AS Oslo 14. mai 2014
Søknad om støtte til nettleksikon
Store norske leksikon er eit norskspråkleg ålmennleksikon som dekkjer innhald
det finst kunnskap om i Noreg. Artiklane byggjer på det første leksikonet som kom
ut i den nye nasjonen Noreg i 1906, og innhaldet er kontinuerleg oppdatert i over
hundre år. Alle kan skrive i Store norske leksikon, men fagansvarlege har ansvaret
for om det blir publisert. Vi får 450 fagfolk til å kommunisere på nett og å
oppdatere i et omfang nettet verdig. Store norske leksikon er gratis tilgjengeleg for
alle på www.snl.no. Nettsida har 143 000 daglege brukarar (mai 2014). Leksikonet
blir publisert av SNL AS, som er eit ideelt aksjeselskap. SNL AS søkjer med dette
om fem millionar kronar frå tilskotsordninga for nettleksikon for 2014. Utan eit
tilskot i dette omfanget kan vi ikkje halde fram med å publisere Store norske som
eit oppdatert nettleksikon.
UTGIVAR: STORE NORSKE LEKSIKON AS
Store norske leksikon AS er eit ideelt aksjeselskap med denne føremålsparagrafen:
“Selskapets formål er å publisere norsk fagkunnskap på internett, blant annet
gjennom et nært samarbeid med universiteter og høyskoler. Selskapet driver en
digital kunnskapsbase som publiserer signert innhold redigert av fagfolk. Det
publiserte innholdet skal være kvalitetssikret med hensyn til faglig etterrettelighet,
kildekritikk, samt pedagogisk og språklig presentasjon.
Opprettelsen av Store norske leksikon AS er basert på at Selskapet eier og publiserer
Store norske leksikon (SNL).
Selskapet skal være en premissleverandør for digital danning og kunnskapsspredning i
norsk nettoffentlighet. Selskapet kan publisere innhold på alle offisielle norske språk.
Selskapet tilbyr en redaksjonell og teknisk plattform til alle eiere som ønsker å utgi
redigerte leksikalske verk på nett. Utgivelsene må være i tråd med formålet til Store
norske leksikon AS.
2
Selskapet drives på ikke-kommersiell basis og Selskapets formål er ikke å generere
økonomisk utbytte til aksjonærer. Eventuelle overskudd som genereres fra salg av
eiendom, eiendeler eller salg av aksjer skal utelukkende gå til drift og vedlikehold av
SNLs plattform og innhold.”
SNL AS er eigd av Fritt Ord (40 %), Sparebankstiftelsen DNB (40 %) og Det Norske
Videnskaps-Akademi (20 %), og i styret sit:
Trond Andreassen (styreleiar) – generalsekretær i Norsk faglitterær forfatter-
og oversetterforening
Inger Lise Larsen – økonomidirektør i Sparebankstiftelsen DNB
Francis Sejersted – professor emeritus, tidlegare styreleiar i Fritt Ord
Nils Christian Stenseth – preses i Det Norske Videnskaps-Akademi
Torgeir Waterhouse – direktør for internett og sosiale medier i IKT Norge
Sjefredaktør er Anne Marit Godal. Sjefredaktøren har utgivaransvar etter ein
vedtektsfesta redaktørplakat som mellom anna seier:
Sjefredaktøren skal gjennom sitt medium fremme en saklig og fri
kunnskapsformidling.
Sjefredaktøren har det personlige og fulle ansvar for mediets innhold.
Innenfor rammene av formålsparagrafen skal sjefredaktøren ha en fri og
uavhengig ledelse av redaksjonen og full frihet til å forme mediets innhold, selv
om det i enkelte spørsmål ikke deles av utgiveren eller styret.
SNL AS er utgivar av fire verk: Ålmennleksikonet Store norske leksikon (SNL),
samt dei tre fagleksikona Store medisinske leksikon, Norsk biografisk leksikon og
Norsk kunsterleksikon.
Store medisinske leksikon (SML) blei publisert på papir i 2006, og har 12 000
artiklar om medisin. I 2013 opna vi SML for vidare oppdatering, etter same
redaksjonsmodell som i SNL. Med dette er eit nytt norsk leksikon gitt vidare liv.
Samtidig vil medisinstoffet i SNL bli fasa ut. Innhaldet i dei to verka har vori
overlappande, men SML er eit grundig og omfattande verk som gir det medisinske
innhaldet meir tyngde.
SNL eig og publiserer også Norsk biografisk leksikon (NBL) slik det kom ut på
papir frå 1999 til 2005. NBL har 6 000 artiklar og er ei viktig kjelde om sentrale
menneske i norsk historie, men vil ikkje bli opna for oppdatering.
3
Godal er ansvarleg redaktør for dei tre verka i eige av SNL AS. Frå 2013 tilbyr SNL
AS andre leksikoneigarar å nettpublisere og oppdatere leksikon på vår tekniske
plattform. Vi har så langt publisert Norsk kunstnerleksikon (NKL), eigd av
Nasjonalmuseet for kunst. Museet har redaktøransvaret for NKL, medan SNL er
ansvarssubjekt som nettvert. NKL er publisert slik det kom ut på papir frå 1982 til
1986. Museet planlegg å ferdigdigitalisere dei to siste banda i løpet av 2014.
INNHALDSPROFIL
Artiklane i SNL er delt inn etter fag i ein taksonomi som er open for lesarane
gjennom forsida www.snl.no. Her kan ein bla seg gjennom dei femten hovudemna,
som igjen er delt inn i om lag 2500 underemne totalt. Noko forenkla kan vi seie at
SNL skal dekkje fag det i Noreg er mogleg å ta utdanning innanfor – det seg vere
politikk og kjerneenergi, idrett eller limnologi, og vi skal særleg formidle og
forvalte kunnskap om norske forhold eller forhold som er relevante i norsk
samanheng. SNL ser det som vår jobb å ta vare på den norske kunnskapsarven,
også den som ikkje er så kjend eller aktuell i dag. Det betyr at vi skal vere
oppdaterte på bjørnedyr, der norske forskarar har internasjonal ekspertise, så vel
som på norsk oljehistorie og 1814.
SNL har i dag 170 000 artiklar. Innan kvart fagfelt skal vi omtale sentrale omgrep,
hendingar, fenomen, stader, organisasjonar og personar. SNL skal vere ein guide til
kva som er viktig i ulike emne. Ved å sjå under Russlands litteratur skal lesarane få
eit overblikk over kva som er dei mest sentrale forfattarskapa. Derfor har vi ikkje
eit uavgrensa mål om fleire artiklar. Vi har kriterium som set rammar for kva som
er leksikonrelevant i ulike fagfelt.
SNL vil gi kunnskapen ein stemme i samfunnet. I sentrale samfunnsdebattar som
om FrP er høgrepopulistiske skal SNL formidle kor forskinga står. Om det er fagleg
strid, skal SNL formidle kor den faglege striden står. Og når vi omtaler
populærkultur som house-musikk, skal det vere med ein musikkfagleg vinkel.
Skuleelevar og studentar er den største og tydelegaste lesargruppa vår. Jødedom,
den kalde krigen, 1814, Henrik Ibsen og fotosyntese er “kioskveltane” på snl.no.
Helsestoffet er også mellom det mest leste. I 2013 opna vi Store medisinske
leksikon (SML) for oppdatering. Fordi SML har fleire oppslagsord og lengre
artiklar enn medisinstoffet i SNL, har vi vald å byggje vidare på SML når vi no
oppdaterer medisinsk innhald. Den tredje kategorien innhald som blir mest lest, er
saker i nyhendebiletet. Folk les SNL for å få forklaringar på omgrep dei ikkje
forstår og bakgrunnsinformasjon om det som til ei kvar tid blir omtalt i media.
4
EI KJELDE TIL KUNNSKAP
SNL ser det som vårt ansvar å byggje ein infrastruktur for kunnskapsformidling i
det norske nettsamfunnet. Nettet er blitt den offentlegheita vi lærer, les og
debatterer i. Google styrer kva kunnskap folk finn. Men Internett skriv seg ikkje
“sjølv”. Innhaldet kjem an på kva aktørarar som deltar i å skape det. SNL AS vil som
utgivar publisere leksikalske tekstar som kan vere truverdige kjelder til
basiskunnskap. På same vis som norsk nett treng truverdige kjelder til nyhende,
trengst kjelder til basisen og breidda i kunnskapen. Folk må kunne finne fagleg
gyldige framstillingar av islam, så vel som av makt og vaksine. Den offentlege
debatten treng kjeldetekstar signert av fagfolk – fordi gyldig kunnskap er ein
føresetnad for å argumentere, forstå og skrive alt frå nyhende til skuleoppgåver.
Skulen skal lære elevane å vere kritiske i val av kjelder. Treffa elevar får når dei
søkjer på Google varierer i kvalitet, slik kunnskapsminister Røe Isaksen har
formulert det: ”Du kan ikkje rekne med at ei kvar kjelde du finn på nett er truverdig.
Det er ikkje som eit godt, gamaldags leksikon, om du ikkje då går inn på Store
norske”. Der klasseskilja tidlegare var synleg i kor mange bøker elevane hadde
heime, er skilja iferd med å dreie seg om kompetanse til å velje gode kjelder i
nettmylderet. Det betyr at gode norske kjelder bør vere lette å finne. Derfor
arbeider SNL spesielt med å tilpasse innhaldet vårt til behova skuleelevar har på
ulike trinn.
Når kjelder manglar blir nettet eit ekkokammer der ingen står ansvarleg for at
orda falt. Kjeldetørke gjer informasjonen folk finn dårlegare. For norsk og engelsk
Wikipedia er SNL mellom dei mest brukte kjeldene om norske tilhøve, ved sia av
presse og (mindre objektive) heimesider for firma og institusjonar.
Dersom norske fagfolk skal skrive analytiske framstillingar på norsk, er dei
avhengige av arenaer for formidling. SNL sørgjer for at basisen i norsk
kunnskapsunivers blir formidla på norsk. Sjølv om nettet er fullt av informasjon,
skaper ikkje dette automatisk funderte analysar. Det er skilnad på å samle
faktaopplysningar og å definere omgrep eller skrive analytiske framstillingar, til
dømes av kva rolle ein person som Jens Stoltenberg har spelt i samfunnet. Gamle
omgrep, personar og hendingar er definerte og analyserte i gamle leksikon, men
stadig nye omgrep treng omtale – og perspektiv og kunnskap om det gamle
utviklar seg, som ein t.d. kan sjå av dei ulike variantane av Camilla Collett i SNL.
Ved å be ekspertar definere og redefinere omgrepi SNL, sikrar vi også produksjon
av kunnskap. Som da vi arbeidde forbi synsing og bad fagfolk produsere ein
5
analyse med fagleg hald kring eit omgrep som med eitt var svært viktig for det
norske samfunnet: kulturmarxisme.
FAGLEG KVALITET OG HØVE TIL KJELDEKRITIKK
Fagleg kvalitet er sjølve eksistensgrunnlaget for SNL. Føremålet vårt er å publisere
signert innhald redigert av fagfolk. Artiklane skal vere kvalitetssikra med omsyn til
fagleg etterrettelegheit og kjeldekritikk. Dette inneber at innhald skal vere fagleg
gyldig i det vi publiserer det. Derfor blir alt innhald på snl.no godkjend av fagfolk i
emnet før det blir publisert.
Autoriteten til eit papirleksikon kvilte på tillita til sjølve verket og til at utgivaren
valde ekspertar til å skrive. Nettsamfunnet stiller andre krav til truverd enn
papirsamfunnet. Alle bør kunne føreslå, spørje og peike dersom keisaren er utan
klede. Kunnskapsproduksjonen bør skje i dialog, ikkje i autoritær monolog.
Nettpublikasjonar har høve til å gje lesarane eit godt grunnlag for sjølv å vurdere
truverdet til kvar einskild artikkel. Det er mogleg fordi digital produksjon gjer det
lett å bli kvitt anonym autoritet. Som nettleksikon vil SNL gjere
kunnskapsproduksjon mest mogleg gjennomsiktig. I SNL skal ingen namnlaus
storleik tale. Avsendar skal vere kjend slik at direkte kjeldekritikk er mogleg.
Namngitte menneske skal kunne bli stilt til ansvar for å ha skrivi og publisert
innhaldet. For å få til dette er det på snl.no eit avgjerande prinsipp at anonymitet
ikkje skal vere mogleg. Derfor er vilkåret for å bidra på snl.no at ein registrerer seg
som brukar med fullt namn.
I SNL går fagfolk ved sine namn gode for kvaliteten på to vis: Gjennom fagansvar
og forfattarsignatur. For å gje lesarane høve til direkte kjeldekritikk har SNL i
tillegg tre sentrale virkemiddel: signert endringshistorikk, brukarprofilar og
kommentarfelt med direkte publisering:
Signert endringshistorikk
Alle endringar på snl.no kan bli spora og er synlege for lesarane. Alle
tekstendringar blir knytt til signaturar. Sjølv små endringar og språkvask skjer
under fullt namn. I historikken for kvar artikkel kan ein sjå alle redigeringar, både
kven som har føreslått kva i artiklane og like viktig: kven som har godkjend
endringa. (Denne historikken svarer til Wikipedias lister over bidragsytarar til
artiklane.) Slik er det gjennomsiktig kven som skriv leksikonet. Dette gjør det
mogleg å drive direkte og detaljert kjeldekritikk. Som Kulturkomiteen på
6
Stortinget formulerte det i sin merknad til støtteordninga for nettleksikon:
“Komiteen vil påpeke at åpenhet om hvem som skriver er vesentlig for å kunne utøve
direkte kildekritikk, og derved kvalitetssikre og forbedre levende leksikalske
oppslagsverk ”. I SNL-historikken kan alle t.d. sjå kven som har vori med på å
definere kva parlamentarisme er. Høva til slik historikk var naturlegvis ikkje til
stades før den digitale produksjonen. Den nye digitale historikken i SNL vil over tid
– for kvar artikkel – bli forteljinga om kven som har definert den norske
kunnskapsarva.
Fagansvarlege med fullt namn
Framlegg til endringar i SNL blir godkjend av
namngitte fagansvarlege før det blir publisert
som innhald i SNL.
Ein fagansvarleg er ein handplukka fagperson
som forvaltar ein liten bit av leksikonet. Her er
ei oversikt over fagansvarlege i SNL (fordelt på
fag). Dei fagansvarlege må ha solid
fagbakgrunn frå området dei har ansvar for.
180 av dei fagansvarlege er tilsette ved
universiteta. Andre arbeider ved høgskular og institutt eller har anna arbeid og /
eller utdanning som inneber ekspertise på området. SNL har etablert gode
samarbeid med alle dei åtte universiteta. Vi har eit felles definert mål om å auke
talet fagansvarlege frå universiteta og slik sikre at dei blir synlege formidlarar i
nettoffentlegheita.
Vi har no 450 fagansvarlege som til saman dekkjer 1 609 fagområde. 24 % av dei
er kvinner, 74 % er menn og 2 % er institutt, museum eller organisasjonar.
Redaksjonen aukar kvinnedelen stadig når vi erstattar eldre fagansvarlege.
Det er berre ein fagansvarleg per kategori, men ein fagansvarleg kan ha fleire fag.
Kvar fagansvarleg står ved sitt namn til ansvar for alt innhald i sin kategori. Dei skal
sørgje for at alle artiklar i kategorien formidlar oppdatert og gyldig kunnskap,
anten dei skriv og oppdaterer sjølv, godkjenner framlegg frå andre eller
republiserer innhald frå papirleksikonet. Ofte føreslår fagansvarlege endringar på
andres fagfelt. Dette styrkar formidling på tvers av ulike faglege perspektiv.
Dei fagansvarlege signerer for det faglege innhaldet i SNL, medan dei tilsette
redaktørane ikkje har i oppgåve å lage innhald sjølv. Oppgåva deira er å organisere
Talet fagansvarlege i SNL. Ny
redaksjon overtok i april 2011.
7
arbeidet ved å finne fagansvarlege og å hjelpe dei med språk, sjanger og med å
handle riktig på nett og oppdatere der lesarane er.
Det er sjefredaktøren som er ansvarleg utgivar for SNL og som står til ansvar for
valet av kvar einskild fagansvarleg. Lesarar kan kritisere dei fagansvarlege, t.d.
opent under artiklane i snl.no, og sjefredaktør kan seie opp fagansvarlege som
syner seg å bryte med krava SNL stiller, både til å forvalte oppdatert og fagleg
gyldig innhald, og til åtferd og aktivitet på snl.no.
Brukarprofilar I tillegg til fullt namn har alle brukarar i SNL ei profilside med oversikt over alle
endringar den einskilde har stått bak, som t.d. fagansvarleg Kjetil Lysne Voie.
Profilen inneheld også høve til ein tekstbiografi og foto. For dei fagansvarlege står
det om dei arbeider ved eit universitet, høgskule eller forskingsinstitutt. Slik kan
lesarane ha gode høve til å vurdere truverdet deira, både den faglege posisjonen og
produksjonen deira i SNL.
Forfattarnamn
Artiklane i SNL står med forfattarnamn. Å stå som forfattarar tyder at ein har
ideelle rettar til sine bitar av teksten. Leksikon er eit samskrivingsprosjekt. Berre
dei som har skrivi minst 30 % av det substansielle innhaldet skal stå som
medforfattar under artikkelen. Oversikta over alle som har skapt teksten, er det
likevel historikken som syner.
Alt innhald som blir digitalt produsert i SNL står med namngitte forfattarar. SNL
pleidde å vere eit papirleksikon. I papirversjonen var plassen avgrensa, og
forfattarnamn blei inkludert om artikkelen var lengre enn 50 linjer. Derfor står ein
del korte artiklar frå papirtida med forfattar “Store norske leksikon (2005 – 2007)”.
Storparten av desse blei skrivi av eksterne fagfolk, resten av fagredaktørar som var
tilsett i Kunnskapsforlaget for å produsere leksikonstoff. Ettersom innhaldet blir
skrivi digitalt vil denne resten av papirproduksjon forsvinne – på same vis som vi
på andre vis utviklar SNL til eit heilstøypt digitalt produkt med t.d. internlenking,
fotografi, utvald litteratur og eksterne lenker.
Brukardeltaking
For SNL er det ein kjerneverdi å vere opne og ta innspel og kritikk alvorleg. Folk
har høge forventingar og tiltru til innhaldet i SNL. Derfor er det desto viktigare å ha
låge tersklar for at folk kan stille spørsmål, engasjere seg og delta. På snl.no kan
alle delta på tre vis, ved å:
8
1. føreslå endringar,
2. skrive nye artiklar,
3. delta i kommentarfelt med direkte publisering.
I SNL skal lesarane intuitivt kunne forstå korleis dei kan bidra. Vi legg stor vekt på
å gjere det teknisk enkelt å føreslå endringar, og vi ser at det fungerer: Aktiviteten
frå lesarane aukar. I 2013 bidrog 1000 menneske med tekst i SNL. Mellom desse
var 25 % kvinner. Endringsframlegg til artiklane blir ikkje publisert direkte, men
blir vurdert av den fagansvarlege for området. Dei fagansvarlege har tre dagar på
seg til å gje tilbakemelding.
I tillegg har kvar artikkel eit kommentarfelt som folk kan bruke til å kommentere,
kritisere og spørje dei fagansvarlege. SNL skal vere gjennomsiktig: Derfor ligg alle
kommentarar like under artikkelen. I kommentarfeltet kan ein publisere utan at
fagansvarleg eller redaktør godkjenner. Det betyr at det er lett å kome med synleg
kritikk, og å sjå om SNL svarer.
Dei fagansvarlege eller redaktørane svarer i kommentarfeltet. I praksis blir feltet
mest brukt til å føreslå endringar, men også til å stille spørsmål. I tida omkring
eksamen bruker elevar og studentar feltet til å spørje fagfolk om ting dei ikkje finn
eller ikkje forstår.
Ein kan ikkje kommentere utan fullt namn, og redaksjonen moderer usakleg åtferd
både frå lesarar og fagansvarlege. Slik har vi utvikla eit kommentarfelt der tonen i
ordskifta er respektfull, seriøs og legg til rette for at alle skal ha ytringsfridom.
SNL lærer fagfolk å delta på internett. Vi vil setje ein ny standard for digital
danning, der tradisjonelle danningskrav (gyldig argumentasjon, truverdige
kjelder) blir kombinert med krava til å bli tatt alvorleg på nett, så som rask respons
og deltaking når debatten skjer. Derfor forventar vi at dei fagansvarlege ikkje berre
skriv, men at dei er aktive og gir tilbakemelding. SNL vil ikkje ha fagansvarlege som
ikkje svarer lesarane, same kor flinke dei er i faget sitt.
SNL skal vere tilgjengelege og lette å kome i dialog med. Derfor deltar vi på
Facebook og Twitter. Her tar vi imot kritikk og skryt, og bruker det til å gjere
leksikonet betre. Vi tar også sosiale media i bruk for å hjelpe folk, som då snl.no ein
kveld i eksamensvekene hadde nedetid og vi gav elevar tilgang på artiklar dei
spurte etter via Facebook så lenge nedetida varte. Kvelden lærte oss at vi leverer ei
teneste folk er avhengige av og at vi har plikt til å vere der når lesarane treng oss.
9
OPPDATERING
SNL er mellom dei norske nettsidene med mest innhald, og det er ein omfattande
jobb å halde det oppdatert. Då vi som ny redaksjon overtok etter
Kunnskapsforlaget i 2011 var oppgåva å finne ut om det var mogleg å lage eit
leksikon som er oppdatert, der alle endringar blei kvalitetssikra av fagfolk.
Oppdateringsaktiviteten er tredobla frå 2011 til 2013, til 21 millionar teikn siste
år. Auka siste år er på 75 %. Auka syner at modellen med fagfolk som oppdaterer
nettleksikon er levedyktig.
Redigeringsmodellen vår inneber at vi gjennomgår heile artikkelen sjølv når det
kjem ei lita endring. Det betyr at ein artikkel er republisert som kvalitetssikra så
snart ei endring er godkjend. Dei siste to åra er 32 % av artiklane republisert og
såleis godkjend på nytt. Med både nye teikn og republiserte teikn blei til saman
omlag 38 millionar teikn publisert i løpet av 2013. Målt i talet på teikn blei over ein
fjerdedel av innhaldet republisert i 2013.
SNL overtok for tre år sia ein enorm tekstbase, der mykje innhald ikkje var
oppdatert sia det stod på papir. Det tvingar fram prioriteringar i kor vi oppdaterer
først. Vi har ein lang hale av innhald som blir svært lite lest, medan andre artiklar
har mange tusen lesarar i månaden. Vi prioriterer systematisk oppdatering slik:
- Artiklar som blir ofte lest, som jødedomen.
- Område der samfunnsutviklinga går raskt, som i Syria.
- Fagområde der forskinga utviklar seg mykje, som på Det gamle Egypt.
Etter nokre års røynsle ser vi også systematikk i når på året lesarane er interessert
i ulike emne, slik at vi oppdaterer artikkelen om brennmanetar før sommaren
kjem. Vi lager også ei “spåkule” for hendingar vi trur blir viktige kvart år, som
jubileum, val eller idrettsarrangement, og oppdaterer relevante artiklar i forkant.
LESARANE
Om SNL skal gje folk tilgang til kunnskap er det ein føresetnad at folk finn SNL når
dei søkjer på nett. Etter systematisk arbeid med både innhald og HTML er SNL no
ofte på førstesida ved Google-søk, spesielt på fagomgrep og norske personar og
ord. Eit søk på ”kulturmarxisme” illustrerer effekten godt: Tidlegare trona den
rasistiske Metapedia og Vigrid toppen av Google. No finn folk ein definisjon frå
SNL.
10
Dei siste tre åra har SNL firedobla lesartala frå 35 tusen til 143 tusen daglege
brukarar. Såleis er snl.no mellom dei mest leste norskpubliserte nettsidene.
Lesartala aukar stadig og klart. Det betyr at SNL aldri nokon sinne har vori så
etterspurt som no. Om lag ein tredel av lesarane er elevar og studentar. Når
lærarar ber elevane “søkje på nett”, finn dei SNL mellom førstetreffa. SNL er blitt
den mest leste læringskjelda som er publisert med utgivaransvar i Noreg.
FAGKUNNSKAP PÅ NORSK Stortingsmeldinga «Mål og Meining» slår fast at leksikon er ein viktig del av den
norske skriftkulturen: «Alle former for ordbøker og leksikalske oppslagsverk utgjer
ein viktig del av den totale skriftkulturelle infrastrukturen i eit språksamfunn … Det
går heller ikkje an å trekkja noko skarpt skilje mellom leksikonet og ordboka ... Eit
livskraftig nasjonalleksikon, som i dag må finnast i digital grunnform, er ein
nødvendig del av ein språkleg infrastruktur for framtida.»
For SNL er språkarbeidet viktig. Vi er avhengige av at folk finn oss under dei
søkeorda dei bruker, og av at dei forstår det vi skriv. Vedtektene slår fast at “Det
publiserte innholdet skal være kvalitetssikret med hensyn til faglig etterrettelighet,
kildekritikk, samt pedagogisk og språklig presentasjon.”
Stadig færre fag blir formidla i norske bøker. Om norsk fagspråk skal vere levande
trengst ein arena der fagfolk kan formidle på norsk. Det er eit demokratisk
problem dersom ekspertar berre skriv på engelsk. Utvikling av norske fagtermar
vil stoppe opp og vi etablerer eit gap mellom fagspråk og språket folk flest kan.
SNL er den einaste nettsida der ekspertar må skrive om dei viktigaste omgrepa i
alle fag. Såleis er SNL ein garantist for å vidareutvikle eit gjeldande norsk fagspråk.
I SNL skal elevar og studentar finne dei fagomgrepa dei kan bruke når dei tar
eksamen. I 2011 blei Språkrådet bedne om å finne strategiar for å sikre norsk som
fagspråk. Då peika dei på SNL som kanalen for bruk og formidling av norske
fagtermar.
Norskspråkleg kunnskap er viktig for lesarane. Om termar ikkje finst på norsk
hindrar det folks høve til å forstå. Derfor arbeider SNL med å finne dei beste
norske termane til dømes i Store medisinske leksikon, slik at lesarane ikkje berre
finn framandgjerande engelske og latinske omgrep på det dei er redde for er galt.
SNL analyserer kven som søkjer etter ulikt innhald, for så å tilpasse språket etter
dette. Vi undersøker systematisk kva artiklar elevar på ulike trinn treng og legg
lesenivået slik at elevane kan forstå innhaldet. Når IKT i utdanninga utviklar den
11
offentlege elevressursen minstemme.no er SNL den einaste nettkjelda som kan
levere fagleg solide og leselege definisjonar på norsk for det elevane skal lære om,
som stemmerett og ytringsfridom.
Basen vi overtok etter Kunnskapsforlaget er på bokmål. Dei nye eigarane har eit
uttalt mål om at lesarane skal finne leksikoninnhald på nynorsk. Vedtektene slår
fast at vi kan publisere innhald på alle offisielle norske språk.
Vi har vurdert å omsetje basen til nynorsk, og slik operere med to verk, men har
landa på at det beste er å skrive i båe målformar i SNL. Slik vil også
bokmålslesarane møte nynorsk, og vi unngår ein nynorskvariant med B-stempel,
der nynorskbrukarar møter eit mindre oppdatert leksikon og ender med å bruke
bokmålsutgåva i staden. I staden lar vi forfattarar i SNL velje om dei vil skrive på
bokmål eller nynorsk. Vi har som definert mål å auke nynorskdelen, og derfor tar
vi kontakt med nynorskskrivande og oppmodar dei til å bruke nynorsk når dei
skriv i SNL. For mange er det overraskande at utgivarar gir dei lov til dette.
Nynorskdelen aukar stadig, og målet vårt er at alle nynorskskrivande
fagansvarlege skal bruke nynorsk i SNL.
SNL arbeider med tekniske løysingar for å overkomme vanskane ved å finne
nynorsk innhald i SNL ved søk på Google. Vi har også tilbydd nynorskleksikonet
Allkunne bruk av plattforma vår slik at innhaldet deira kjem høgare i
søkjemotorane og dei kan auke lesartala.
For dei samiske språka er det ikkje mogleg å språkblande. Derfor er SNL opne for å
publisere eigne verk på nordsamisk og gjerne også mindre delar på dei to andre
samiske språka. Vi ønskjer å stille innhaldet vårt opent for omsetting til samiske
språk og publisere det på linje med dei fire andre verka på plattforma vår – slik at
snl.no også får leksikon på samisk. Det finst ingen innhaldsmessige eller tekniske
hindre for dette. Vi kjem til å kontakte Sametinget for å få til dette så snart og
dersom vi får ei grunnfinansiering av SNL på plass. IKT-LØYSING
SNL publiserer med eit eigeprodusert publiseringssystem bygd med Ruby, Rails og
PostgreSQL. Nettsida er innkapsla i handlaga HTML5 som er overflatebehandla
med CSS, JavaScript og vektorgrafikk. Datasenteret som driftar snl.no står i Oslo.
I 2011 overtok vi koden som var utvikla i Kunnskapsforlaget. I 2012 lanserte vi
nytt grensesnitt, og vi vidareutviklar stadig koden for å sikre ei brukarvenleg og
12
oppdatert teknisk løysing som ikkje berre følgjer relevante standardar, men som
er i front av utviklinga på nett, til dømes ved responsivt design og universell
utforming.
Vi har med oss nokre av dei klokaste netthovuda i landet, og utviklar leksikonet
med nettet for auge: Redaksjonen samarbeider med Netlife Resarch om design og
utvikling av nettsidene. Utviklarfirmaet WJA er teknisk ansvarleg for utvikling og
drift, og arbeider tett med dei teknisk ansvarlege i redaksjonen.
SNL bruker ulike element med open kjeldekode utvikla av andre, og all kode vi
utviklar sjølv har open kjeldekode. Vi har eit ope API for å gjere det lett å
gjenbruke data frå SNL. Vi legg stor vekt på å bidra til deling av innhald og
utvikling av det frie internett, og deltok til dømes i hack4no, der eit SNL-prosjekt
fekk andreplass.
I SNL skjer all produksjon digitalt, inkludert samhandling mellom redaktør og
skribent. Alt innhald blir redigert direkte i løysinga. For SNL er det viktig at det
skal vere enkelt å bidra – både for salskonsulent Shazia Gill og professor Francis
Sejersted. Den tekniske løysinga er tilpassa folk som kanskje først og fremst kan
sitt fag, men ikkje nødvendigvis er nettvande og teknisk kyndige.
Redigeringssystemet gjer det mogleg å endre artiklar anten ein sit med
datamaskinen, ipaden eller mobilen. Løysinga gjer det samstundes enkelt for
lesarar å bidra både med kommentarar og endringsframlegg.
SNL arbeider for å sikre at nettsida er universelt utforma, og vi brukartestar og
vidareutviklar med dette for auge. Her er t.d. liste frå januar 2014 over kva som
blir retta opp for at sida skal følgje standarden for universell utforming. Det finst
ingen mobilversjon eller nettbrettversjon av SNL. Nettsidene er responsive og
endrar storleik og oppsett etter kva skjerm lesaren bruker. 30 % av besøka kjem
frå mobil og nettbrett, ei nidobling frå 2011 til 2013.
Snl.no har fått tre prisar for nettsidene: Rosingprisen – ein brukarvennlegheitspris
frå Den norske dataforening (2012), Merket for god design og Design for alle
(2014). Merket for god design er designbransjens utmerking for vellukka bruk av
design for å skape innovative produkt og løysingar. Design for alle-prisen blir delt
ut av Delta-senteret, Statens kompetansesenter for deltagelse og tilgjengelighet, og
går til nokon som har utvikla eit produkt med særleg fokus på brukarvenlegheit og
god universell utforming. SNL er den første nettsida som har vunni prisen.
13
BUDSJETTBEHOV OG FINANSIERINGSPLAN
Leksikon har alltid hatt stor samfunnsverdi. Tidlegare har sjangeren vori i ei
særstilling der ein ikkje trengte offentleg støtte nettopp fordi leksikon var så viktig
at ein svært stor del av folket kjøpte bøkene. Denne betalingsmodellen duger ikkje
lenger. Det betyr ikkje at folk har slutta å trenge leksikon. SNL er den mest leste
norskpubliserte “boka” – med nettet som trykkeflate er leksikonet meir lest enn
nokon sinne.
Leksikon er framleis ein litterær sjanger, men det er ein sjanger som ikkje lenger
kan bli seld. I internetts tid er det uaktuelt å ta betalt for ålmennleksikon. Leksikon
er ein sentral del av infrastrukturen i nettsamfunnet. I flaumen av informasjon har
folk bruk for å finne komprimert og relevant kunnskap raskt. Vi treng leksikon på
same vis som vi treng kart og ordbøker, fordi leksikon er vegnettet av kunnskap
som trengst for å tolke og forstå annan informasjon.
Grunnkunnskapen må vere ein del av det opne internettet. Det norske
nettsamfunnet må innehalde basiskunnskap som er søkbar, som er gratis og som
fritt kan bli lenka inn i resten av innhaldet på norsk nett. Den kunnskapen som
tidlegare var ein kostbar konfirmasjonsgåve skal og må vere gratis tilgjengeleg på
snl.no.
Det er likevel ikkje gratis å produsere leksikon. Teknisk drift, utvikling og
publisering kostar for alle nettpublikasjonar. Med SNLs produksjonsmodell kostar
det også pengar å skape godt innhald.
Då Fritt Ord og Sparebankstiftelsen DNB overtok leksikonet i 2010 var målet å
finne ut om og korleis ein best kunne drive nettleksikon i internetts tid. Vi har sia
då lagt vekt på lage eit oppdatert leksikon som blir lest, men som samtidig har så
låge kostnader som mogleg. Vi har gjennomført ei storstilt omlegging av drifta og
utvikla gode digitale løysingar, både for publisering og organisatorisk
oppgåvestyring.
Samla kostar det 13 millionar kroner i året å oppdatere innhaldet og å publisere
SNL (og dei tre andre leksikona på plattforma). Kostnadene fordeler seg slik:
Oppdatering av innhald
7,8 millionar kroner går til dei fagansvarlege og til redaksjonen som arbeider med
å få oppdatert innhaldet i SNL (inkludert SML for medisindelen av SNL). Å vere
fagansvarleg er eit tillitsverv der ein får betalt etter arbeidsinnsats (per teikn). Vi
14
bruker 4 millionar til saman for å betale dei fagansvarlege, inkludert forfattarar av
einskildartiklar, samt litt foto. For kvar fagansvarleg er løna låg – 43 øre per teikn. I
snitt får dei under åtte tusen kroner i året.
I tillegg kostar det 3,8 millionar per år å ha redaktørar som rekrutterer og følgjer
opp og hjelper dei fagansvarlege med språk, sjanger og prioriteringar. I dag har
kvar heile redaktørstilling i snitt 90 fagansvarlege å følgje opp. Det inneber eit
stort arbeidspress. I 2013 publiserte vi innhald svarande til om lag 70 vanlege
bøker. Samanlikna med andre utgivarar har vi om lag halvparten av utgiftene til
tilsette. Nedbemanning av staben og talet fagansvarlege er ikkje eit alternativ
dersom SNL skal kunne vere eit oppdatert leksikon.
Drift og publisering
SNL bruker 5 millionar kroner per år til drift og publisering. Dette er kostnader til
organisatorisk og teknisk infrastruktur. Ein relativt liten del på 1,2 millionar (nær
10 % av totale kostnader) går til organisatorisk drift og økonomistyring. Vi har
billege lokale i Det Norske Videnskaps-Akademi. Gode verktøy og lite
arbeidskapasitet held administrativ orden på dei om lag 500 som skaper SNL
(fagansvarlege, redaktørar, leverandørar, styre) og samarbeidspartnarane.
Størsteparten av driftsmidlane går direkte til den tekniske infrastrukturen.
Pengane vi bruker til publisering er ein heilt avgjerande premiss for at SNL skal
vere eit oppdatert leksikon der lesarane finn innhaldet dei søkjer etter.
Det som kostar mest er å vidareutvikle ei teknisk plattform som er enkel å skrive i
og lett å lese på. Dette er sjølve nøkkelen til å vere eit godt og oppdatert leksikon.
For SNL har det synt seg at vi må ha eit enkelt brukargrensesnitt for dei som skal
skrive. Fagfolka er gjerne ikkje teknisk kompetente, og klarer rett og slett ikkje å
bidra dersom dei møter mange tekniske hindringar. På same vis treng lesarane
våre, særleg dei yngste, dei eldste, dei med funksjonshindringar og dei som les på
mobil, ei inkluderande nettside som er enkel å navigere i. (Sjå avsnitt om IKT-
løysing.)
Slik andre utgivarar har kostnader til trykk og distribusjon, fordrar effektiv
nettpublisering det same: Digitale leksikon må “trykkast” og bli distribuert på nett.
Det må bli integrert med resten av innhaldet i nettoffentlegheita, noko som fordrar
både strukturelt, analytisk og teknisk arbeid. Resultata er t.d. høg Google-
plassering, samarbeid med andre nettstader og dialog i sosiale media. Utan denne
15
delen av arbeidet vil SNL bli eit lukka leksikon lesarane ikkje finn og som ikkje er i
dialog med omverda.
På plattforma vår publiserer vi SNL, men også SNL, NBL og NKL. Gjennom
vedtektene er SNL AS forplikta til å tilby denne plattforma også til eigarar av andre
nisjeleksikon som ønskjer å formidle på nett. I dag gjeld dette Nasjonalmuseet med
NKL, men plattforma er open for alle fagredigerte leksikon – så lenge dei anten har
finansiert innhaldsoppdatering frå anna hald (som t.d. Allkunne) eller ikkje
oppdaterer innhaldet sitt (som NKL).
Budsjett
I ein prosjektperiode frå 2011 til 2013 har SNL avklart aktuelle vis å finansiere
SNL på. Gjennom dialog med politiske myndigheitar har vi funni fram til ein modell
der både universiteta og kultursektoren bidrar:
SNL har avtalt samarbeid med alle dei åtte norske universiteta. Formidling er
mellom kjerneoppgåvene deira, og dei ønskjer å formidle på nett. I 2013 blei
universitetsrektorane samde om å bruke SNL som kanal for formidling.
Universiteta kan betale SNL for tenesta vi gjer ved å sørgje for at dei
universitetstilsette formidlar i norsk nettoffentlegheit. Dei har sett av pengar til å
betale for innhaldsproduksjonen i SNL med til saman 7,8 millionar kroner i 2014. I
samarbeid sett vi mål for kor mange fagansvarlege som skal bidra frå kvart
universitet. Slik kan universiteta ta sin del av ansvaret – ansvaret for at
offentlegheita får tilgang til kunnskapen dei forvaltar og har plikt til å formidle.
Universiteta har derimot ikkje lov til å finansiere sjølve drifta av SNL fordi det i
mandatet deira står at dei ikkje kan overføre pengar som dekkjer drift av andre
organisasjonar. Leksikondrift er ikkje ein naturleg del av universitetas
samfunnsansvar. Dermed manglar SNL finansiering av kostnader til drift og
publisering.
SNL har med andre ord mogleg finansiering for den delen av verksemda som
produserer sjølve innhaldet i SNL. Universitetas vilje til medansvar er likevel utan
verdi dersom SNL ikkje har pengar til publiseringa.
På denne bakgrunnen søkjer SNL AS om å få dekt kostnadene til å publisere og
distribuere leksikon. Dersom vi får denne støtta er eit viktig spleiselag mellom
kunnskaps- og kultursektoren etablert, eit spleiselag for at nasjonen også etter
2014 har oppdaterte leksikon redigert og signert av fagfolk.
16
Dermed søkjer vi om fem millionar kroner i støtte for 2014, etter dette budsjettet:
INNTEKTER
Universiteta
7 800 000
Kulturdepartementet 5 000 000
Andre (Nasjonalmuseet, Forsvarsdepartementet) 226 000
SUM INNTEKTER TOTALT 13 026 000
UTGIFTER
UTGIFTER TIL INNHALDSPRODUKSJON (SNL, SML)
Innhald (betaling til fagansvarlege, foto) 4 000 000
Innhald forsvarsprosjekt
150 000
Redaktørar
3 800 000
SUM UTGIFTER TIL INNHALDSPRODUKSJON 7 950 000
DRIFT OG PUBLISERING (SNL, SML, NBL, NKL)
Organisatorisk drift
1 200 000
Teknisk drift, utvikling og publisering 3 900 000
SUM DRIFTSUTGIFTER 5 100 000
SUM UTGIFTER TOTALT 13 050 000
BALANSE -24 000
Inngåande balanse 1 771 913
ÅRSRESULTAT 1 747 913
Etter tre års prøveprosjekt for å avklare drifts- og finansieringsmodell, er dette
planen vi har også for vidare drift og finansiering etter 2014. Vi planlegg ikkje for
utvikling av andre varige finansieringskjelder eller driftsendringar. Dersom denne
grunnfinansieringa kjem på plass, er det likevel både mogleg og ønskjeleg å utvide
innhaldet ved hjelp av ulike prosjektmiddel, til dømes til samiske leksikon.
17
Behov for finansiering
Støtteordninga for nettleksikon skal bidra til formidling av norskspråkleg,
oppdatert og kvalitetssikra kunnskap over digitale IKT-plattformer for å styrke
tilbodet av gratis leksikalske tenester som grunnlag for den ålmenne
kunnskapsutviklinga og meiningsdanninga i samfunnet.
SNL søkjer om fem millionar kroner fordi vi treng heile denne summen for å klare
å produsere eit oppdatert norsk ålmennleksikon på nett. Alternativa er følgjande:
1. nedlegging av Store norske leksikon, eller
2. eit leksikon der vesentlege delar av innhaldet ikkje blir oppdatert.
Båe desse alternativa vil påverke mange: Eit uoppdatert SNL vil raskt tape truverd
og verdi for lesarane. Nedlegging eller manglande oppdatering vil ta frå den norske
ålmenningen tilgang til kvalitetssikra kunnskap. For dei 143 tusen lesarane som
12. mai 2014 kunne gå til snl.no, finst ikkje andre signerte og fagredigerte kjelder
som formidlar basiskunnskap på alle område. Skuleverket vil miste den mest
brukte læringskjelda på nett. 45 tusen elevar vil mangle oppslagsverket dei bruker
dagleg.
Dersom SNL ikkje kan få finansiert drifta vil det også vere eit uheldig signal til
universitetsmiljøa. Universitetsleiingane har no synt vilje til medansvar så langt
det lar seg gjere innanfor grensene av sitt samfunnsmandat. Mange hundre tilsette
har engasjert seg i ein dugnad for å bidra til ei betre norsk nettoffentlegheit.
Nedlegging av SNL vil demotivere dei norske kunnskapsprodusentane.
For SNL finst ikkje alternative finansieringskjelder til offentleg støtte og betaling
frå universiteta. Dei to einaste store aktuelle private stiftingane, Fritt Ord og
Sparebankstiftelsen DNB, har allereie tatt heile den økonomiske risikoen med å
avklare om og korleis den nasjonale leksikonarven kunne få verdi i eit digitalt
samfunn. Dei har dei siste åra brukt 35 millionar på dette. Det er uaktuelt for dei to
stiftingane å ta eit vidare økonomisk driftsansvar når det no er avklart at SNL kan
vere eit oppdatert, mykje lest leksikon med betydeleg samfunnsverdi, noko som
bør vere innanfor kjerneområdet av offentleg finansiering.
Stiftingane forpliktar seg derimot langvarig ved å ta ansvar for å gje SNL ein
eigarskap som både er ikkje-kommersiell og ikkje offentleg: Saman med Det
Norske Videnskaps-Akademi har dei gått saman om eigarskapen for å sikre ein
ideell utgivar.
18
Ei støtte til SNL AS vil ikkje berre bety støtte til ålmennleksikonet SNL. Det vil bety
støtte til leksikonsjangeren fordi det gjer det mogleg for andre å publisere leksikon
i ei digital tid: SNL AS er aleine om å ha ei effektiv plattform for å publisere og
distribuere fagredigert kunnskap. Publiseringsplattforma er laga slik at vi kan tilby
nytt liv til fagredigerte leksikalske verk med andre eigarar enn SNL. Det finst enno
fleire små fagleksikon som sitt på innhald som anten ikkje blir oppdatert eller ikkje
når fram. SNL er t.d. i samtale med fleire fylkesleksikon som treng ein ny plass å
publisere. Ved tilgang til SNLs fungerande plattform kan dei som sit på slike
leksikon, utan for store kostnader, dele innhaldet sitt med lesarane.
Alternativet til eit slikt mangfald, der både SNL og andre mindre leksikon finst, er
ein nettoffentlegheit der Wikipedia-modellen får monopol på korleis leksikalsk
innhald kan bli formidla. Sjølv om SNL AS er glade i Wikipedia, meiner vi at eit
Wikipedia-monopol er uheldig.
Publiseringsmodellen til Wikipedia er ikkje tilpassa fagredigerte leksikon. Den
prinsipielle og tekniske plattforma deira kan ikkje dekkje behovet for å publisere
kvalitetssikra kunnskap, signert og redigert av fagfolk. Wikipedia er eigd av
Wikimedia foundation i USA, som dekkjer kostnadene til drift og teknisk utvikling.
Modellen fungerer utan redaksjon, utan fagansvarlege og utan ein nasjonal
ansvarleg utgivar. (Interesseorganisasjonen Wikimedia Norge består av ca. 53
frivillige medlemar (2013) og er ikkje utgivar av norske Wikipedia.)
Det norske nettsamfunnet har bruk for både Wikipedia, SNL – og gjerne ein flora
av mindre fagleksika. Pressekontakt for Wikipedia, Harald Haugland, seier det slik:
“Selv mener jeg at når Wikipedia-samfunnet har klart å etablere et leksikon på norsk
med over 417.000 artikler, vil man nok klare seg også i fremtiden uten støtte fra det
offentlige til artikkelproduksjon. Serverne står i USA og drives av donasjoner fra
brukere over hele verden. Samtidig er det bra at man får en ordning som kan sikre
Store Norske Leksikon videre drift, for det er bedre for publikum å ha flere
nettleksikon å velge mellom.”
SNL er ikkje og skal ikkje vere det same som Wikipedia. SNL er eit leksikon som
har klart å få fagekspertar til å bidra til internett med signerte og vitskapleg
funderte kjelder. Vi driv samfunnsbygging ved å byggje ei bru mellom
nettsamfunnet og dei som sit på kunnskapen. Det er farleg for demokratiet om det
ikkje finst bruer mellom debatt i den lærde eliten og nettdebatt der folk flest
deltar. Ved å flytte ekspertane ut som synlege aktørar kan SNL bidra til læring, til
19
ein opplyst offentlegheit og ein kunnskapsbasert debatt. Slik vil vi vere med på å
styrke den demokratiske infrastrukturen og meiningsdanninga i det norske
nettsamfunnet, også i framtida.
Finansmarknadsmeldinga frå Finansdepartementet i 2012 omtaler målet vårt slik:
“Internett har skapt nye moglegheiter for samfunnsbygging gjennom deltaking,
ordskifte og samhandling”. SNL meiner “den demokratiske ålmenta er avhengig av å
verta styrkt på Internett, som er den nyaste og minst utvikla av kanalane for
demokratisk deltaking. SNL har som mål å skapa ein tydeleg arena for
kunnskapsbasert ordskifte og å syna korleis valid kunnskap ikkje er det same som
nøytralitet. SNL ynskjer at lesarane skal finna signert informasjon og ei opplyst
offentlegheit å delta i. Leksikonet ynskjer å spreia kunnskap gjennom internett slik at
fagfolk vert ein ressurs for folk flest.”
SNL er i løpet av få år med nye eigarar blitt ein suksess bygd i ein unik koalisjon
mellom IKT-miljø, kunnskapssektoren og kulturbransjen. Om SNL får den
finansielle støtta vi treng, vil eit nytenkjande spleiselag for formidling av
kvalitetssikra kunnskap på norsk internett vere etablert.
Søknaden er dokumentert ved lenker i teksten, samt tre vedlegg. Ta kontakt om de har
spørsmål eller bruk for meir dokumentasjon.
Venleg helsing
Store norske leksikon AS
Anne Marit Godal
sjefredaktør
Vedlegg:
1. Oversikt over fagansvarlege per fagområde (dynamisk nettside) 2. Vedtekter for SNL AS (lagt ved) 3. Årsmelding 2013 (lagt ved)