18 ივლისი, 2011 წელი

რეგისტრაცია ქალაქიდან გაუსვლელად

ზაფხულის თვეებში, აჭარაში უძრავი ქონების რეგისტრაციის რაოდენობა განსაკუთრებით მატულობს. ამ პერიოდში ტურისტები დასვენებასთან ერთად უძრავი ქონების შერჩევას და შეძენასაც ახერხებენ. ამისათვის მათ შესაძლოა იპოთეკური სესხის აღებაც მოუწიოთ, რისთვისაც საჯარო რეესტრიდან ამონაწერი აუცილებლად დასჭირდებათ. რეგიონებში ვებპროგრამის ამოქმედების შემდეგ მოქალაქეებს საშუალება მიეცათ ქალაქებსა და რაიონებში ჩაუსვლელად მიიღონ უძრავ ქონებაზე ამონაწერი.

მაგ: მოქალაქეს ესაჭიროება ამონაწერი საჯარო რეესტრიდან იმ უძრავი ქონების შესახებ, რომელიც მდებარეობს თბილისში. ის კი ამ დროისათვის იმყოფება ბათუმში. მოქალაქეს შეუძლია მიმართოს ბათუმის იუსტიციის სახლს და 1 სამუშაო დღეში, ქალაქიდან გაუსვლელად მიიღოს მისთვის საჭირო დოკუმენტი.... აღნიშნული სერვისი მნიშვნელოვნად ზოგავს მოქალაქის დროს , ენერგიას და ფინანსებს.

ახლო მომავალში იუსტიციის სახლები საქართველოს სხვა ქალაქებსა და რაიონებშიც გაიხსნება და მსგავს მომსახურებას მოქალაქეები ამ ქალაქებში ჩაუსვლელადაც მიიღებენ.

სტატისტიკა და ანალიტიკა

2011 წლის იანვარ-ივნისში აჭარის ა.რ.-ში უძრავი ქონების გაყიდვის 2384 ტრანზაქცია დარეგისტრირდა, რომელშიც ქალაქ ბათუმის წილი შეადგენს 61.4%-ს (1464 უძრავი ქონების გაყიდვის ტრანზაქცია).

ამავე პერიოდში აჭარის ა.რ.-ში უძრავი ქონების გაყიდვების რაოდენობა 2010 წელთან შედარებით გაიზარდა 16.8%-ით, ხოლო 2009 წელთან შედარებით - 1.7-ჯერ. ქალაქ ბათუმში კი მდგომარეობა შემდეგია: უძრავი ქონების გაყიდვების რაოდენობა 2010 წელთან შედარებით გაიზარდა 11.0%-ით, ხოლო 2009 წელთან შედარებით - თითქმის გაორმაგდა (ზრდა 1.9-ჯერ).

ა.წ. ივნისში წინა წლის იმავე თვესთან შედარებით უძრავი ქონების გაყიდვების რაოდენობა აჭარის ა.რ.-ში 28.6%-ით გაიზარდა და შეადგინა 468 ერთეული. ზრდა დაფიქსირდა ქალაქ ბათუმშიც (31.0%-ით; 296 ერთეული).

2011 წელს როგორც აჭარის ა.რ.-ში, ისე ქალაქ ბათუმში გაყიდვებით ლიდერი თვეა მაისი (შესაბამისად 510 და 336 უძრავი ქონების გაყიდვის ტრანზაქცია).

ტერიტორიული ერთეულების მიხედვით გაყიდვების სტრუქტურაში ლიდერია ქალაქი ბათუმი (61.4%). მეორე და მესამე პოზიციებს ინაწილებენ ხელვაჩაურის და ქობულეთის მუნიციპალიტეტები (შესაბამისად 23.6% და 12.5%). ქედას, შუახევის და ხულოს მუნიციპალიტეტების წილი ამ სტრუქტურაში უმნიშვნელოა და ჯამურად 2.6%-ს შეადგენს (ა.წ. 6 თვის მაჩვენებელი).

ა.წ. ივნისის თვეში ქალაქ ბათუმში პირველადი და მეორადი რეგისტრაციების თანაფარდობის კოეფიციენტი შეადგენს 0.135-ს. ამ თვეში განხორციელებულ 2737 სარეგისტრაციო ტრანზაქციაში 11.9%-ს (ანუ 326 ერთეული ტრანზაქცია) შეადგენენ

პირველადი რეგისტრაციები, ხოლო 88.1%-ს (ანუ 2411 ერთეული ტრანზაქცია) - მეორადი რეგისტრაციები.

2011 წლის იანვარ-ივნისში აჭარის ა.რ.-ში უძრავ ქონებაზე იპოთეკის 5817 ტრანზაქცია დარეგისტრირდა, რომელშიც ქალაქ ბათუმის წილი შეადგენს 76.1%-ს (4427 იპოთეკის ტრანზაქცია).

ამავე პერიოდში აჭარის ა.რ.-ში უძრავ ქონებაზე იპოთეკების რაოდენობა 2010 წელთან შედარებით გაიზარდა 65.5%-ით, ხოლო 2009 წელთან შედარებით - 3.7-ჯერ. ქალაქ ბათუმში კი მდგომარეობა შემდეგია: უძრავ ქონებაზე იპოთეკების რაოდენობა 2010 წელთან შედარებით გაიზარდა 58.9%-ით, ხოლო 2009 წელთან შედარებით - 3.5-ჯერ).

ა.წ. ივნისში წინა წლის იმავე თვესთან შედარებით უძრავ ქონებაზე იპოთეკების რაოდენობა აჭარის ა.რ.-ში 54.6%-ით გაიზარდა და შეადგინა 1248 ერთეული. ზრდა დაფიქსირდა ქალაქ ბათუმშიც (50.9%-ით; 969 ერთეული).