Ergaa Daarektara Olaanaa Abbaa Taayitaa Galiiwwan Oromiyaa

Obbo Yohaannis Dinqaayyoo

Mootummaan Karoora Guddinaafi Tiroonisformeeshinii biyya keenya gara boqonnaa haaraatti

ceesisuuf qabatamaan jijjiirama hunda galeessa fidaa jiru hojiirra oolchuu erga jalqabee

waggoota shan xumuruuf walakkeessa waggaatu nu hafa. Hojiiwwan waggoottan shanan

darban keessatti raawwatamaniin yeroo kamiyyuu caalaa guddinni dinagdee saffisaa,itti fufiinsa

qabuufi ummanni sadarkaan irraa fayyadamu galmaa’uu danda’eera. Ijaarsi sirna dimokiraasiifi

nageenyi amansiisaanis naannicha keessatti mirkanaa’uun abbootiin qabeenyaa biyya keessaafi

alaa haala mijaa’aa uumametti gargaaramuun hojiilee misoomaafi hawaasummaa garaa

garaarratti hirmaachuun ofiis fayyadamaa ummannis akka fayyadamu gahee bakka bu’iinsa hin

qabne taphachaa jiru.

Misoomni haqa qabeessa ta’eefi sadarkaa hundatti naannoofi biyya keenya keessatti

geggeeffamaa jirus ,rakkoolee dinagdee,hawaasummaafi siyaasaa hiikuudhaan ummanni karaa

haqa qabeessa ta’een akka fayyadamu ta’aa jira. Guddina galmaa’aa jiru daran saffisiisuun

fayyadamummaa uummataa caalaatti dhugoomsuufis mootummaan rifoormiiwwan garaa

garaa hojiirra akka oolan godhaa jira. Sektaroota rifoormiin keessatti hojiirra oolaa jiru keessaas

Abbaan Taayitaa Galiiwwan Oromiyaa ,Biiroon Daldalaafi Misooma Gabaa Oromiyaa akkasumas

Ejensiin Geejibaa adda durummaan ni eeramu. Sektaroonni kunneen rifoormiiwwan

galii,daldalaafi geejibaa hojiirra oolchuun kenninsi tajaajilaa fooyya’ee bulchiinsi gaariin akka

mirkanaa’u darbees gumaacha isaan guddina dinagdee keessatti qaban akka dabalu gochuuf

qindoominaan hojjechuu erga jalqabanii bubbuleera.

Keessattuu daldala seeraan alaa to’achuun seera qabeessummaa sirna daldalaa dhugoomsuuf

daldaltoonni mirgaafi dirqamasaanii beekanii sochii daldalaa akka taasisaniif hojiiwwan bal’aan

raawwatamaniiru. Ammas raawwatamaa jiru. Rifoormiin daldalaa hojiirra erga oolee as hojiin

gabaa tasgabbeessuufi mirga fayyadamtootaa kabachiisuu akkasumas miira tajaajiltummaa

ummataa gonfateen tajaajila si’ataafi bu’a qabeessa kennuurratti jijjiiramni bu’uuraa

galmaa’eera. Rakkoowwan bulchiinsa gaarii darbee darbee mul’atus hawaasni fayyadamaan

hubannoo argatee faayidaasaa akka mirkaneeffatu ta’aa jira. Daldala seeraan alaatiin

walqabatee galii mootummaa osoo hin sassaabamin hafaa ture hambisuufis rifoormiin

daldalaa, galiifi geejibaa bahanii qindoominaan bakka hundatti hojiirra akka oolu ta’eera.

Hojiiwwan hojjetamaniinis daldaltootaafi abbootii qabeenyaa misoomawaa hedduu horachuun

danda’ameera.

Gama biraatiin sirna bulchiinsa gibiraafi taaksii ammayyaawaafi misoomawaa taasisuufis

rifoormiiwwan garaa garaa hojiirra ooluun galiin mootummaa dabaluu danda’eera. Keessattuu

sirna bulchiinsa gibiraafi taaksii qindaa’aa akkasumas sirna bulchiinsa ragaa gibiraa hojiirra

oolchuun gibiraafi taaksii ragaarratti hundaa’e karaa haqa qabeessa ta’e murteessuu

,sassaabuufi bulchuun danda’ameera. Kenninsi tajaajilaas sadarkaa olaanaatti fooyya’eera.

Komiin kaffalaa gibiraas xiqqaachuun itti quufinsi tajaajilaa dabalaa dhufeera. Kunis dhugoomuu

kan danda’e hubannoon kaffaltoota gibiraafi hawaasa bal’aa seerota gibiraafi taaksiirratti

qaban dabalaa dhufuun akka ta’e ni amanama. Daldaltoonni ,abbootiin qabeenyaafi hawaasni

bal’aanis rifoormiiwwan kunneen hojiirra erga oolaniin booda gibiraafi taaksii seeraan ,fedhiifi

yeroon kaffaluun yeroo barbaadame keessatti galiin sassaabamu misooma uummataaf akka

oolu ta’aa jira. Hubannoo hawaasni gama kanaan qabus yeroodhaa gara yerootti dabalaa

deemuun kaffaltoota gibiraa seera eeganii dirqamasaanii bahaniifi abbootii qabeenyaa

misoomawaa gibiraafi taaksii yeroofi amanamummaan kaffalan hedduu horachuun

danda’ameera. Raawwii turtii baroota karoora guddinaafi tiraanisfoormeeshinii waggoota

shanan darbanii keessattis galii dinagdeen naannichaa maddisiisu duguugamee akka

sassaabamu taasisuuf sochii godhameen bu’aa ajaa’ibsiisaan galmaa’eera. Haata’u malee

ammas kaffaltoonni gibiraa tokko tokko seerota gibiraafii taaksii cabsanii maallaqa mootummaf

galii ta’uu qabu miliqsuun faayidaa dhuunfaatiif yeroon itti gargaaraman ni mul’ata. Keessattuu

daldaltoonni tokko tokko maashina gurgurtaa guyyaa galmeessutti fayyadamuu dhiisuun

nagahee malee hojii daldalaa seeraan ala geggeessu. Hojjettoonni sektara galii tokko tokkos

imaanaa ummataa dagachuun kaffaltoota gibiraa maxxantoota ta’an waliin hariiroo uummanni

galiin motummaa duguugamee akka hin galle yeroon godhan ni mul’ata. Kanaafis hawaasni

fayyadamaan hojii seeraan alaa saaxiluun galiin mootummaa qisaasamee misoomni akka hin

gufannee gochuuf tumsa irraa eegamu taasisuu qaba. Tajaajila argatu hundaafis nagahee

fudhachuun olaantummaan seeraa akka kabajamu gumaachuu qaba. Akkasumas daldaltoota

seeraan alaa saaxiluun kanneen karaa seera qabeessa daldaluun mootummaaf gibiraafi taaksii

kaffalan karaa hin malle dorgommii gabaa keessaa akka hin baaneef eeruu kennuun dirqama

lammummaa bahuutu irra jiraata. Kaffaltoonni gibiraafi taaksiis ragaa barbaachisu haqummaan

qabatanii galmee herregaa sirrii ta’e qaama galii sassaabuuf dhiyeessuu akkasumas maashina

gurgurtaa guyyaa karaa itti fufiinsa qabuun fayyadamuun sirna bulchiinsa gibiraafi taaksii

ammayyeessuu keessatti murteessaa waan ta’eef gaheesaanii taphachuu qabu. Torbeen

gibiraafi taaksii,daldalaafi nageenya tiraafikaa kabajamus hawaasni bal’aan mirga

fayyadamummaasaa karaa ijaarameen mirkaneeffatee daldala seeraan alaa to’achuu keessatti

gahee olaanaa akka taphatu, hubannoo tajaajila geejibaa irratti qabu akka guddifatu

akkasumas kaffaltoonni gibiraafi taaksii sadarkaa hundatti argaman seerota gibiraafi

taaksiirratti hubannoo bal’aa argatanii dirqamasaanii bahaa kiraasassaabdummaa galii

mootummaarratti raawwatamu ammoo kutannoon irratti qabsaa’uuf sosochii qaamolee

hawaasaa hunda uumuun haaromsa biyya keenyaa saffisiisuuf yaadameeti.

Waan ta’eefis Abbootiin qabeenyaa, daldaltoonniifi hawaasni bal’aan akkasumas humnoonni

misoomaa sadan jijjiirama gama hundaan galmaa’aa jiruufi jireenya uummata keenyaa sadarkaa

olaanaatti fooyyessaa jiru itti fufsiisuuf bulchiinsa gaarii mirkaneessuu akkasumas hojii seeraan

alaa saaxiluurratti sochii godhamaa jiru tumsuu qabu.

ERGAMA (MISSION) FI MUL’ATA (VISION) ABBAA TAAYITAA GALIIWWAN

OROMIYAA

ERGAMA (MISSION)

Bulchiinsa gibiraa fi Taaksii ammayyaa’aa ta’e diriirsuu, aadaa fedhiin gibira kaffaluu gabbisuu

fi ogeessa seera kabachiisuuf gahumsaa fi kaka’umsa qabutti fayyadamuun galii dinagdeen

Naannichaa maddisiisu sassaabuudhaan misooma hawaas-dinagdee naannichaaf akka oolu

gochuu.

MUL’ATA (VISION)

Bara 2012 tti sirna bulchiinsa gibiraa fi taaksii ammayyaa’aa fi haqa qabeessa ta’e diriirsuun galii

dinagdeen naannichaa maddisiisu gahumsaan sassaabuu.

DUDHAALEE (VALUES)

Itti gaafatamummaa

Iftoomina

Tajaajila maamila giddu galeessa godhate kennuu

Seera gibiraa fi taaksii kabajuu

Ogummaa fi dandeettii bu’aa qabatamaaf oolchuu

Jijjiiramaaf qophaa’uu

Maalummaa (Hiikaa) Gibiraa fi Taaksii

Gibiraa fi taaksii jechuun galii mootummaan aangoo qabatee biyya tokko bulchu seera itti

baasee namoota ykn jaarmiyaalee hojjetanii galii argatan irraa sassaabuu dha. Kaffalaan gibiraa

battalumatti faayidaa walqixa hamma gibira kaffalee kan argatu osoo hin ta’in lammiilee

biyyattii waliin wal qixa fayyadama. Gibirri kaffalamu kan nama ykn jaarmiyaa hojjetee galii

argatee akkaataa seera gibiraa mootummaan baaseen murtaa’ee beeksisni murtii gibiraa fi

taaksii kaffalaa gibiraa gahee dirqaamaan akka kaffalu ta’a.

Gibiraa fi taaksiin mootummaan baasii hojiiwwan guddina dinagdee fi dhaabbilee tajaajila

uummataa babal’isu ittiin deggeruuf kan sassaabamuu dha. Kanaaf mootummaan akka

namootni dhuunfaa ykn dhabbileen daldaalani ykn hojeettoonni bu’aa argatan irraa taaksii akka

kaffalan barbaada.

Gibirrii fi taaksiin , taaksii kallattii fi taaksii kallattii hin taane jedhamee bakka lamatti qoodama.

Taaksii kallatti jechuun gibira namni ykn jaarmiyaan hojjetee galii argatu irraa baasii galii kana

argachuuf baase irraa hir’ifamee bu’aa qulqulluu argatee akkaatuma namni galii xiqqaa argate

taarifa xiqqaadhaanii fi akkuma galiin guddachaa deemuun taarifa ittiin kaffalu guddachaa

deemuun herregamee kallattiidhaan namumti ykn jaarmiyumti galii argatee kan kaffaluu dha.

Taaksiin kuni abbuma galii argate irratti bu’a.

Taaksiin kallatti hin taane immoo fayyadamtoota meeshaa ykn tajaajila daldaaltootaan

dhiyaatu irraa sassaabamee mootummadhaaf mallaqa galii ta’uu dha. Daldaaltonni yeroo

meeshaa ykn tajaajila isaanii hawaasatti gurguran gatii isaan itti gurguranitti dabalanii

daldaaltota taaksii dabalata qabeenyaatiif (VATf) galmaa’an 15% fi warri hin galmoofne immoo

meeshaa irratti 2% ykn tajaajila irratti 10% fayyadamtoota irraa sassaabanii mootummaaf kan

galii godhanii dha. Taaksii kallatti hin taane daldaalaan ykn kaffalaan gibiraa mootummaa bakka

bu’ee hawaasa meeshaalee ykn tajaajila bitatu irraa warra sassaaban malee ofii isaaniitii kan

kaffalan miti. Kanaafuu taaksii kana kan kaffalu nama meeshaa ykn tajaajila bitatee fayyadamu

dha.

Walumaa galatti gibiraa fi taaksii jechuun galii mootummaan aangoo qabatee biyya tokko

bulchu seera itti baasee dirqamaan namoota ykn jaarmiyaalee hojjetanii galii argatan irraa

sassaabuu dha.

Amaloonni Bu’uraa Gibiraa fi taaksii maal fa’i?

Gibirrii fi taaksiin amaloota armaan gadii qabu. Isaanis:-

Taaksiin kaffaltii dirqama kaffalamuu dha:- Haala seera gibiraa fi taaksiin nama ykn

dhaabbata taaksii kaffaluu qabu irratti gibiraa fi taaksii bu’uu dha. Namni ykn

dhaabbanni seeraan akka gibiraa fi taaksii kaffaluuf dirqama qabu tokko kaffaluu irraa

kan hafe mala biraa hin qabaatu. Kaffaluu baannaan seera gibiraa fi taaksiin ni adabama.

Osoo gibiraa fi taaksiin kaffaltii dirqamaa miti ta’ee tarii namnii ykn dhaabbileen kaffalan

baayyee muraasa ta’u ture.

Gibiraa fi Taaksiin Mootummaan qofa sassaabama:-sirna gibiraa fi taaksii ammayyaa’aa

keessatti mootummaa federalaa fi Naannoolee (federal & regional gov’t) irraa kan hafe

eenyullee gibiraa fi taaksii murteessuu akkasumas sassaabuuf mirga hin qabaatu.

Gibiraa fi taaksiin haala irratti hin hundaa’u. Kana jechuun kaffaltoonni gibiraa yoo

mootummaa irraa bu’aa argatan kan kaffalan yoo mootumma irraa bu’aa dhaban kan

dhiisan miti. Mootummaa fi kaffaltii kaffalame gidduu wal-quunnamtiin kallaattiin

kennuu fi bu’aa argachuu irratti hunda’ee hin jiru. Kaffalaan gibiraa kan gibiraa fi taaksii

kaffalu waan kallaattiin mootummaa irraa bu’aa madaalawaa ta’e argatuuf osoo hin

taane kaayyolee mootummaan baase galmaan gahuufi dha.

Gibiraa fi taaksiin seeraan sassaabama. Mootummaan hojiilee seera qabeessa ta’an

irraa akkaataa seera gibiraa fi taaksiitiin gibiraa fi taaksii sassaaba. Hojiilee seeraan alaa

ta’an kanneen akka kadhaa, hannaa, kotiroobaandii fi kkf irraa mootummaan gibiraa fi

taaksii hin sassaabuu.

Gibiraa fi taaksiin dirqama dhuunfaati. Namnii kaffaltiin gibiraa fi taaksii irraa

barbaadamu tokko dirqama gibiraa fi taaksii kaffaluu qaba ; karaa kamiiniyyuu jalaa

ba’uun (baqachuun) hin danda’amu .

Gibiraa fi taaksiin bu’aa waliiniitiif. Mootummaan galii sassaabee itti fayyadama

lammiilee hundaaf oolcha. (kanneen gibira kaffalanii fi hin kaffalle hundaaf).

Gibiraa fi taaksiin kan hundaa’u gosa kaffalaa gibiraa taaksii kaffaluu, galii isaa, bifaa fi

gosa hojii irrattidha. Hammuma fedhe gibiraa fi taaksiin kaffaltii dirqamaa ta’ullee

namni ykn dhaabbanni kamiyyuu galiin isaa akkaataa qajeelfama gibiraa fi taaksiitiin kan

hin kaffalchiifne yoo ta’e taaksii itti murtaa’e kaffaluuf dirqama hin qabu. Fakkeenyaaf:-

namni hin qacaramne tokko gibira miindaa kaffaluuf dirqama hin qabu; sababni isaa

qaxaramee galii waan hin arganneef.

Gibiraa fi taaksiin tokko tokko kaayyolee murtaa’an qabu. Kaayyoon gibiraa fi taaksii

inni guddaan galii mootummaan baasii isaa deggaruuf gargaaramu maddisiisuuf yoo

ta’ellee , taaksoleen tokkoo tokko kaayyoolee murtaa’an galmaan gahuuf buufamu.

Isaanis oomisha hawaasa miidhan hir’isuuf (hambisuuf), dinagdee tasgabbeessuuf,

walcaalmaa galii fi qabeenyaa hir’isuu fi kkf.

Gibiraa fi taaksiin loogii hin uumu. Namni gibira kan kaffalu haala seera gibiraa fi

taaksiin malee karaa biraan akka kaffalu hin dirqisifamu. Seerri gibiraa fi taaksii

amantiin, sanyiin, bifaan fi siyaasaan hin qoodu.

Gibiraa fi Taaksiin Kaayyoo maaliitiif Sassaaba?

Sababni mootummaan gibiraa fi taaksii sassaabuuf kaayyolee armaan gadii of keessaa qaba.

Baasii/baajeta mootummaa deggeruuf/uwwisuuf:- kaayyoo gibiraa fi taaksii keessaa

tokko baasii /baajataa Mootummaan fedhii hawaasnii/ uummaatnii isaa barbaaduu

guutuuf fayyadamu deegaruuf sassaabama . Galii sassaabamu fayyadamuun

mootumman bu’uraalee misoomaa kan ta’an kanneen akka daandii (karaa),Mana

barumsaa, mana yaalaa, bishaan dhugaatti, nageenyaa fi kkf babal’isuuf gargaarama.

Daandii saffinaa Finfinnee - Adaamaa

Misooma manneen jireenyaa waliinii

Walcaalmaa galii fi qabeenyaa hir’isuuf:- garaagarummaa namoota sooressa ta’anii fi

hiyyeessa ta’an gidduu jiru hir’isuuf mootummoonni hedduun sirna taaksii galiin namni

dhuunfaan ykn dhaabbanni tokko galii guddaa qabu gibiraa fi taaksii guddaa akka

kaffalu akkasumaas namni dhuunfaan ykn dhaabbanni tokko galii xiqqaa argatu gibiraa

fi taaksii xiqqaa akka kaffalu hordofa. Walcaalmaa namoota sooressaa fi hiyyeessa ta’an

gidduu jiru hir’isuuf meeshaa mootummaan itti fayyadamu keessaa tokko taaksii dha.

Sirna kana keessatti namoonni galii guddaa argatan gibiraa fi taaksii guddaa akka

kaffalan, kanneen galii xiqqaa argatan gibiraa fi taaksii xiqqaa akka kaffalan taasifama.

Akkasumas, galii isaanii duukaa kan wal simu akka kaffalan taasifama-kaneen galiin

isaanii baay’ee xiqqaa irraa bilisa gochuun akka deggeraman godha.

Dinagdee Tasgabbeessuuf:- Mootummaan lammiilee hiyyeessota ta’an gibiraa fi taaksii

yeroo qaala’iinsa jireenyaa fi kufinsa jireenyaa ittiin to’achuuf akka meeshaatti

gargaarama. Kunis yeroo humni bittaa gabaa keessatti humnaa ol ta’e yoo uumamu

fedhii waa bituu dabaluun gatiin meeshaalee akka ol ka’u godha. Kanaafis falli inni

jalqabaa taarifa taaksii ol guddisuu fi taaksii biraa dabalataan uummata irratti buusuun

humna bittaa isaanii hir’isuun fedhii waa bituu humna gabaatii ol ta’e hir’iisuudha. Fallii

kun fedhii uummataa humnaa ol ta’e yeroo isaa osoo hin eegin uumamu gabaa irraa

hir’isee dinagdeen akka tasgabbaa’u ni godha. Falli inni biraa deggersa adda addaa

gochuun oomisha taaksii irraa bilisa gochuun oomishtummaan akka jajjabaatu yoo ta’e

humni dhiyeessuu dabalee dinagdeen akka tasgabbaa’uu ta’a.

Oomisha namoota (hawaasa) miidhan hir’isuuf:-oomishaalee nageenya uummataa

miidhan kanneen akka tamboo, alkoolii fi kkf irratti taaksii guddaa buusuun akka isaan

hin babal’anne taasiisa. Fakkeenyaaf, Itoophiiyaa keessatti taaksiin eksaayiizii tamboo

irratti bu’u %20-%75 yoo ta’u kan alkoolii irratti bu’u immoo %50-%100 dha. Kuni

immoo fayyadamtoonni akka isaan hin bayyanne hir’isa.

Investimentii Dhuunfaa jajjabeessuuf:- Mootummaan namoota qabeenya isaanii biyya

keessatti invest godhanif taaksii irraa billisa taasiisuun, taaksii hir’isuun, guyyaa ayyaana

taaksii gochuunii fi meeshaalee investimentiif barbaachisan qaraxaan malee biyya

alaatii akka galchan gochuun investimentiin akka biyya keessatti babal’atu ni

jajjabeessa. Fakkeenyaaf, Itiyoophiyaan namoota investimentii warshaalee adda addaa

fi qonna irratti bobba’aniif baay’ina oomishaa isaan biyya alaatti erganii fi bakka isaan

investimentii itti geggeessan irratti hundaa’uun waggoota 2-8tti taaksii bu’aa daldalaa fi

qaraxa irraa bilisa ni taasisa.

Kuufama Kaappitaalaa guddisuuf:- Mootummaan dhiifama ykn hir’ifama taaksii galii

qusannaa, investimantii, pirovidant fandii, inshuuraansii (wabii) lubbuu fi fedhiiwwan

qusannaa hawaasaa yeroo taasisuu irratti kuufamni kaappitaalaa akka cimu godha.

Kunis guddinni induustirii biyyaa gara fuula duraatti akka jajjabaatu gochuuf baay’ee

murteessaa fi barbaachisaa dha .

Guddina Naannolee gidduu jiru wal-madaalsisuuf:- Biyya tokko keessatti kutaan

(naannoon) biyyattii tokko akkaataa gaariin kan guddate yoo ta’e, kutaaleen biyyattii

kan biroo immoo duubatti kan hafan yoo ta’e, guddina naannolee kana wal-

madaalsisuuf mootummaan taaksiidhaan tarkaanfii ni fudhata. Kallattiiwwan adda

addaatiin naannoowwan duubatti hafaniif taaksii dhabamsiisuu fi dhiifama

gochuudhaan sochiin dinagdee naannichaa akka saffisu gochuun ni danda’ama.

Daldala biyya alaa (oomisha biyya alaatti erguu) jajjabeessuu :- Mootummaan

oomishaalee biyya alaatti ergaman tokko tokko irratti taaksii irraa bilisa ykn hir’isuunii fi

biyoota alaa duukaa walii galtee taaksii gochuun kaffaltii taaksii yeroo lama akka hin

uumamne gochuun daldala biyya alaatti ta’u ni jajjabeessa. Fakkeenyaaf, akkaataa labsii

fi dambii investimantii Itiyoophiyaatti namni tokko yoo warshaa haaraa ykn induustirii

qonnaa irratti bobba’ee oomisha isaa irraa %50 biyya alaatti kan ergu ta’e,

mootummaan kaffaltii gibira bu’aa daldalaa irraa waggaa shaniif bilisa ni taasisa. Amma

mootummaan Itoophiyaa oomishaalee fi tajaajilawwan biyya alaatti ergaman hundaa

sharafa biyya alaa guddisuu fi daldala biyya alaa jajjabeessuuf jecha qaraxaa fi taaksii

irraa bilisa godhee jira.

Hojii dhabdummaa xiqqeessuuf (carraa hojii uumuf):- Carraan hojii uumamuu kan

danda’u yeroo mootummaan intarpiraayizii xixiqqaa fi induustiriiwwan humna namaa

irratti xiyyeeffatee taaksii irraa bilisaa gochuun ykn dhiifama taaksii gochuun

jajjabeessuu dha. Haaluma kanaan mootummaan hojii dhabdummaa xiiqqeessuu ni

danda’a.

Sadarkaa haala jireenya uummataa fooyyesuuf:- kallatti garaagaraan meeshaalee

jireenya uummataaf barbachisoo ta’an kanneen akka meeshaalee fayyaa

mootummaan taaksii irraa bilisa gochuun sadarkaa jireenya uummataa ni fooyyessa.

Gibira biyya alaa tti kaffalame wal dandeesisuu; Namni Itiyoophiyaa keessa jiraata

ta'e bara gibiraa tokko keessatti maddi galii isaa biyya alaa irraa kan argame yoo ta'e

galii kana irraa biyya alaatti gibira hanga kaffalamuu qabu Oromiyaa keessatti gibira

kaffaluu qabu irraa ni hir'ifamaaf. Gibirri biyya alaatti kaffalame akka beeksisa murtii

gibiraa herregamee kaffalame irraa gibirri hir'ifamuu isaa kan mirkaneessu waraqaan

ragaa ykn Abbaa Taayitaa Gibiraa biratti fudhatama kan qabu ragaa seera qabeessatiin

mirkanaa'uu qaba.

Miragaa fi Dirqama Kaffalaan Gibiraa fi Hawaasni Marti Gibiraa fi Taaksii Irratti Qabu

Mirgoota

o Kaffalaan gibiraa tokko furmaata bulchiinsaa argachuuf guyyaa beeksisni murtii gibiraa

isa gahee komii yoo qabaate, guyyoota 30 (soddoma) keessatti abbaa taayitaa gibiraatti

iyyata barreeffamaan dhiyeeffate gaaffiin isaa tuuta komiin akka ilaalamuu akka danda’u

labsiidhaan taa’eera.

o Murtii tuuta komiitti yoo quufuu baate immoo gibiraa fi taaksii komii irratti qabu 50%

kaffaluun gumii ol-iyyannoo gibiraaf dhiyeeffachuu danada’a.

o Mirga odeeffannoo dhimma gibiraa fi taaksii, itti himamuu, gargaaramuu fi dhaga’uu

qaba

o Mirga kaffaltii seeraan alaa kaffaluu diduu

o Mirga ragaa qulqulleeffachuu iccitiin qabamu ni qaba

Dirqamoota

o Dirqama amanamaa ta’u

o Dirqama qaama gibira sassaabu waliin wal-ta’ee hojjechuu

o Dirqama odeeffannoo sirii ta’ee fi ragaa yeroon dhiyeessuu

o Dirqama ragaa qabachuu fi gibira yeroon kaffaluu

o Kaffalaan gibiraa haala labsii lakk. 74/1995n sadarkaa “A” fi “B”keessatti argaman

galmee herregaa qabachuu fi haala qajeelfama to’aannoo, itti-fayyadamaa fi eegumsa

nagahee baheen galii argame to’achuuf kan fayyadu dirqama nagahee galii

maxxansiifachuu fi nagayicha qaama gibira kaffalchiisu biratti galmeessisuu qaba.

o Kaffalaan gibiraa kamiyyuu bu’ura labsii lakk. 75/1995 fi taaksii kallatti hin taane

sassaabuuf dirqamni waan itti kennameef gibira yeroon sassaabee ibsa herregaa sirrii

ta’e dhiyeessuudhaan yeroo labsiidhaan heyyamame keessatti qaama gibira sassaabutti

galii gochuutu irraa eegama.

o Yeroo labsiidhaan tumame keessatti kaffalaan gibiraa kamiyyuu galii argate beeksisee

gibiraa fi taaksii kaffalu qaba.

o Haala labsii lakk. 285/1994tiin kaffalaan gibiraa “VAT”iif galmaa’e galmee herregaa

qabachuu fi lakkoofsa herrega baankii banachuu qaba.

o Akkaataa labsii lakk. 74/1995 keewwata 43tiin namni dirqama gibiraa kaffaluu qabu

kamiyyuu dirqama lakkoofsa eenyummaa kaffalaa gibiraa qabaachuu qaba.

o Akkaataa labsii gibiraa lakk.74/1995 keewwata 48tiin kaffalaan gibiraa tessoo daldaala

isaa yoo jijjiire ykn hojii daldaalaa yoo dhaabu guyyoota 30 keessatti qaama gibira

sassaabu beeksisuu qaba.

o Haala labsii gibiraa galii 74/1995 keewwata 47tiin kaffaltoota gibiraa sadarkaa “C”malee

hojii daldalaa irratti bobba’an ykn gamoowwan guutummaatti ykn gar-tokkeen

kireeffamaniif abbootii qabeenyaa kan ta’an galmee herregaa fi sanadoota qabachuu

qabu.

o Kaffaltoonni gibiraa galmee herregaa qabaachuuf dirqama qaban nagaheewwan itti

fayyadaman utuu hin maxxnsiisin dura gosa nagahee fi baayyina isaani abbaa aangoo

gibiraa biratti galmeessisuu qabu.

o Walumaa galatti mirgootaa fi dirqamoota kanniin kaffalaan gibiraa adda baasee

beekuun hojiirra hin olchine taanaan sirni bulchiinsa gibiraa fi taaksii ammayyaa’aa,

haqa qabeessaa fi bu’a qabeessa ta’uu hin danda’u. Kanaafuu kaffalaan gibiraa fi

hawaasni marti kana beekee xiyyeeffannoo addaatiin mirgaa fi dirqama kanniin beekee

hojiirra oolmaa isaaniitiif hojjechuu qaba. Abbaan Taayitaa Galiiwwan Oromiyaas

kaffaltoota gibiraa adda duree seeraan ,haqummaafi yeroon gibiraafi taaksii kaffalan

jajjabeessuuf waggaa waggaatti ni badhaasa.

Kaffaltoonni gibiraa adda dureen wayita badhaafaman

Rakkoolee Sassaabbii Galii irratti mul’atan

Rakkooleen sassaabbii galii irratti uumaman karaa sadiin ifuu danda’a. Isaanis:-

1) Rakkoolee kafflatoota gibiraa ykn tajaajilamtootaan uumaman:-

Kaffalaan gibiraa, gibiraa fi taaksii kaffaluun fedhiin dirqama lammummaa isaa bahachuu akka

ta’ee fi akka dirqamaan raawwatamu kan seeraan kenname ta’uu isaa fi kaayyolee gibiraafi

taaksii galmaan gahuuf akka ta’e irraanfachuun mootummaan gibiraa fi taaksii kan kaffalchiisu

baasii baasu uwwifachuu qofaaf fi meeshaa siyaasaa sirna isaa ittiin qajeelchuu jedhee

fudhachuun rakkoolee raawwachaa jirachuu isaa qorannoon Abbaa Taayitaa Galiiwwan

Oromiyaa yeroo adda addaa geggeessee ni mul’isa.

Kaffaltoonni gibiraa galii mootummaa hanbisuun, gibiraa fi taaksii dhoksanii

seeraan ala dhamaatee malee qaxxaamuraan abbaa qabeenyaa ta’uuf

dhama’an hedduu ta’uu.

Ilaalchi gibiraa fi taaksiin itti fayyadama uummataaf oola jedhu kaffaltoota

gibiraa fi taaksii hedduu biratti mul’acuu dhabuu. Gibiraa fi taaksii kaffalan akka

adabaatti kan ilaalanis jiraachuu.

Kaffalaan gibiraa karaa seera qabeessa ta’e tajaajila barbaadu argachuu utuu

danda’uu karaa qaxxaamuraatiin argachuuf jecha ykn murtee gibiraa fi taaksii

irratti murtaa’u gadi xiqqeeffachuuf jecha raawwattoota ykn ooggantoota

bulchiinsa gibiraa fi taaksiitiin walii-galuudhaan faayidaalee raawwattoota ykn

ooggantoota kanaaf hin malle siif-kenna jechuudhaan yakka galii mootummaa

irratti raawwachuu.

Kaffaltoonni gibiraa ragaa daldaala isaanii ibsu dhoksu.

- Kaffaltoonni gibiraa naannoo keenyaa baayyeen isaanii sadarkaa “C” waan ta’aniif gibira

muramaa kaffalu. Gibirri muramaan immoo tilmaama galii guyyaa isaan argataniin kan

murtaa’uu fi tilmaamni kun koreen sababa raawwatamuuf karaa kaffaltoota gibiraa rakkoolee

hedduun ni umamu. kaffaltootni gibiraa kunneen miseensota koree tilmaama raawwatu firaan,

hiriyaafi maallaqaan gowwoomsuun korichi akka galii guyyaa isaanii gadi hiqsee tilmaamu

taasisuu fi icitii miseensota koree irraa saammachuun guyyaa koreen iddoo hojii isaa dhaqee

tilmaamicha geggeessu mana daldalaa ykn mana meeshaa isaanii cufanii deemu. Akkasumas,

ragaa kennuu diduu fi ragaa sobaa koree tilmaamuuf kennuudhaan gibira kaffaluu baqatu.

- Kaffaltoonni galmee herreegaa qabatan illee ragaa bittaa isaanii hin fudhatan. Darbees, yeroo

gurgurtaa raawwatan nagahee malee waan ta’eef galmee herregaa isaan dhiyeeffatan kan

ragaa irratti hundaa’ee qophaa’e miti. Kanaafis galiin mootummaa harca’ee hafa.

- Kaffaltoonni gibiraa tokko tokko immoo taaksii jalaa baqachuuf galmee herregaa gosa sadii

qopheeffatu. Galmee herregaa dhugaatti bu’aa inni argate agarsiisu, galmee herregaa gibira

ittiin kaffaluu fi galmee herregaa bu’aa guddaa agarsiisee liqaa baankii irraa argachuuf

qopheeffatu dha.

- Kaffaltoonni gibiraa hedduun yeroo bittaa raawwatan nagahee hin fudhatan yeroo gurguranis

nagahee hin kennani. Kanaaf ragaa gibiraa dhugaa ta’e sassaabanii gibira murteesuun rakkisaa

dha.

- Kaffaltoonni gibiraa VATf (taaksii dabalata qabeenyaaf) gurgurtaan waggaa isaanii gahaa ta’e

galmaa’uu hin barbaadan. Kan galma’an keessaas baayyeen isaanii teessoo sirrii ta’e hin qaban.

Akkasumas, nagahee maxxanfatanii taaksii sassaabuu hin barbaadan. Daldalarratti hirmaatanii

osoo jiranii galmee herregaa sirrii hin taane dhiyeessu. Gurgurtaa yeroo raawwatanis taaksii

sassaabaniif nagahee hin kennani; mootummaafis galii hin taasisan.

2) Rakkoolee raawwattoota ykn ooggantoota bulchiinsa gibiraafi taaksiitiin uumaman

Kaffaltoota gibiraa irratti seera malee dhiibbaa uumuun, murtee gibiraan olkaasa ykn

qabeenya keen gurgursiisa jechuun sodaachisu. Tajaajila seeraan kennuu dhiisanii

deddeebisuu fi dirqisiisuun faayidaa isaaniif hin malle irraa fudhachuun galii

mootummaa hir’isu, kaffalaa gibiraas rakkoof saaxilu.

Mirgaa fi dirqama kaffalaa gibiraa wal bira qabuun barsiisuurra dirqama qofaa irratti

xiyyeeffachuun kaffalaan gibiraa mirga isaa beekee komii akka hin dhiyeeffanne godhu.

Tilmaamni galii guyyaa haqa qabeessaa fi galii kaffalaa gibiraa dhugaa ta’e irratti

hundaa’ee akka hin tilmaamamneef faayidaa argachuun (kiraa sassaabdummaan) ykn

firaan akka galiin mootummaa hir’atu taasisu.

Murtii gibiraa sirrii hin taane ykn beeksisa murtii gibiraa odiitiin argame kaffalaa gibiraa

ittiin doorsisuun faayidaa irraa barbaaduun galii hir’isu. Kaffalaa gibiraas baasii hin

taaneef saaxilu.

Nagahee sobaatiin qarshii sassaabanii dhimma dhuunfaaf oolfatu.

3) Hirmaannaa hawaasa maraa dhabuudhaan yakkoota raawwataman

Hubannoo haawasni maalummaa, barbaachisummaa fi kaayyoo gibiraa fi taaksii irratti qabu

baayyee gadi aanaa waan ta’eef yakka gibiraa fi taaksii irratti raawwatamu ittisuu irratti

baayyee hin dhimmamu. Daldalaan meeshaa ykn tajaajila dhiyeessee kan gurguru hawaasa

maraatiif waan ta’eef osoo hawaasni yakki gibiraafi taaksii akka hin raawwatamneef

dhimmamee ni salphata. Fayyadamtootni meeshaa fi tajaajila yeroo daldalaa irraa bitan qarshii

osoo hin kaffalin dura nagahee qopheessee akka kennuuf gaafachuu qabu.

Nagaheen bu’uura ragaa gibiraa waan ta’eef gibirrii fi taaksiin osoo hin harca’in akka

sassaabamuuf fayyadamtoonni faayidaa hawaasa maraaf kan oolu gibiraa fi taaksiin akka

sassaabamuuf qarshii kaffalaniif nagahee gaafatanii fudhaachuu aadaa godhachuu qabu.

Akkasumas, yakka kaffaltoota gibiraatiin gibiraa fi taaksii irratti taasifamu karaa kana

hirmaatanii ittisuu ni danda’u.

Kana hin ta’u taanaan ragaa gibiraa sirrii ta’e qindeessuun hin danda’amu. Ragaan gibiraa sirrii

ta’e hin jiru taanaan ammo gibiraafi taaksii haqa qabeessa ta’e sassaabuun hin danda’amu.

Rakkooleen armaan olitti tarreeffaman kunniin yoo furamuu baatan miidhaawwan armaan

gadii geessisu.

1 .Mootummaan galii baasii baajataa uwwisuu qabu dhaba:-

- Gargaarsa biyyoota dureeyyii jalaa baanee hiyyummaa seenaa gochuun hin danda’amu.

- Karoorri guddinaa fi tiraanisfoormeeshanii marsaa garaa garaa galma ga’u hin danda’u.

- Bu’uraaleen misoomaa kanneen akka daandiiwwanii, bishaan dhugaatii qulqulluu,

teeknooloojiiwwan garaa garaa fi humni ibsaa hin babal’atan.

- Guddinni harkifachuun waan danda’uuf waggoota muraasa keessatti biyyoota galii

giddugaleessa qaban bira gahuun hin danda’amu.

- Bulchiinsa gaarii fi sirna dimookiraatawaa sadarkaa olaanaatti ceesisuun hin yaadamu.

2. Sirni bulchuiinsa gibiraa fi taaksii haqa qabeessaa fi ammayyaa’aa ta’e akka hin jiraanne

taasisa. Kaffaltoonni gibiraa muraasni amanamummaan dirqama lammummaa kan bahanii fi

kaffaltoonni gibiraa kaan ammoo qabeenya kiraa sassaabdummaan argameen karaa

qaxxaamuraa akka durooman ta’a.

3. Olaantummaan seera gibiraa fi taaksii balaa irra ni bu’a . Kaffaltoonni gibiraa dhimmoota

gibiraa fi taaksiin walqabatee furmaata argachuuf filaannoo seera qabeessummaan

fayyadamuurra karaa seera qabeessa hin taanee ni filatu. Gochi akkanaa kun hojii guyya

guyyaan raawwatamu yoo ta’e seera qabeessa kan ta’e qancaree seera qabeessa kan hin taane

ammoo guddachaa seerri humna dhabaa deema.

4. Bulchiinsi gaariin akka hin jiranee taasisa. Raawwattoonnii fi ooggantoonni bulchiinsa gibiraa

fi taaksii seera, dambii fi qajeelfama micciiruun akkaataa isaaniif mijaa’u duwwaan

raawwachuun bulchiinsi gaariin akka mirkanoofne godha.

5. Idaan dhaloota boruuf akka darbu taasisa. Mootummaan karoora misoomaa fi nageenyaa

bafatee hojjechuuf baasii waan barbaachisuuf galii sochii dinagdeetiin maddisiifame duguugee

hin sassaabu taanaan hanqinni baajetaa ni quunnama. Hanqina baajetaa kana guuttachuuf

mootummaan madda baajetaa liqaa fudhachuu keessa waan galuuf dinagdeen gargaarsaafi

liqaarratti hundaa’e akka jiraatu ta’a. Dhaloonni fuulduraas rakkoo hin malle akka dhaalu

dirqama.

6. Uummanni mootummaa irraa amantaa akka dhabu taasisa. Seeronni, dambiileenii fi

qajeelfamoonni gibiraa fi taaksii hin kabajaman taanaan seeronni hundumtuu cabuudhaaf

sababa akka ta’etti hubatama. Akkasumas, hawaasni kaffalaa gibiraa gibira kaffalee tajaajila

mootummaa irraa eeggatu sirriitti yoo hin arganne mootummaa irraa amantaa dhaba.

7. Sirni dinagdee gabaa bilisaa ni jeeqama. Abbootiin qabeenyaa misoomaaf bu’aa buusaniiru

kan jedhaman dorgommii gabaa cimaa keessa galanii mo’atanii gibira irraa barbaadamu yoo

kaffalanii dha. Itti dabalees, abbaan qabeenyaa maxxanaan dadhabaa yoo deemee dha. Abbaan

qabeenyaa dorgommiin gabaa hin moonee fi gibira hin kaffalle abbaa qabeenyaa maxxanaan

akka babal’atu, abbaan qabeenyaa misoomaa ammoo akka dadhabu taasisuun sirna gabaa

bilisaatiif gufuu ta’a.

Rakkoowwan walxaxaa sektara galii mootummaa sassaabu ,kaffaltoota gibiraa ,daldaltootaafi

hawaasa bal’aa biratti mul’atan hundeedhaa maqsuun galiin mootummaa dabalee hojiiwwan

misoomaa ,dimokiraasiif nageenyaa karaa amansiisaa ta’een akka itti fufu gochuuf Abbaan

Taayitaa Galiiwwan Oromiyaa toorawwan xiyyeeffannoo shan adda baasee ittiin hojjechaa

jira.Isaanis

A) BARUMSA KAFFALTOOTA GIBIRAA (TAX PAYERS EDUCATION)

Faayidaa gibiraafi taaksiin kaffalamuuf beekuu dhabuurraa kan ka’e ilaalchi dogoggoraa kaffalaa

gibraafi hawaasa bal’aa biratti ni mul’ata. Kanarraa ka’uunis sirna bulchiinsa gibiraafi taaksii

ammayyaawaa haalaan dirirsuurratti rakkooleen mudachaa turaniiru. Kana malees aadaan

gibiraa fi taaksii amanamanii fedhiin kaffaluu kan hin guddane fi inumaayyuu gibiraa fi taaksii

dhooksuu akka hojii gaariitti ilaaluun bal’inaan jiraachuun isaa rakkoon hubaannoo fi ilaalchaa

hangam akka guddatee jiru agarsiisa.

Kanaafuu, rakkoolee kana hiikuuf dursa hojii hubaannoo uumuu fi ilaalchaa isaanii jijjiruu

danda’u irratti xiyyeeffatanii hojjechuudhaan mirgaa fi dirqama isaanii akka bahan gochuun

barbaachisaa dha. Kun immoo bulchiinsa mootummaa naannoo keenyaa qofa kan fayyadu osoo

hin tanee qaamolee gibiraa fi taaksii walitti qaban hunda kan gargaruu dha. Haaluma kanaan,

kaffaltootni gibiraa fi hawaasni bal’aan seeraa gibiraa akkasumas maalummaa fi faayidaa gibirrii

fi taaksiin misooma keessatti qabu hubataniii feedhii isaaniitiin galii sirrii ta’e beeksisanii gibiraa

fi taaksii haqa qabeessa akka kaffalan taasisuun dhimma yeroon itti hin kennamne waan ta’eef

hubannoo kaffaltoota gibiraa,hawaasa bal’aafi daldaltootaa jijjiiruurratti si’aayinaan hojjetamaa

jira.

B. SIRNA BULCHIINSA RAGAA GIBIRAA (TAX DATA ADMINISTRATION SYSTEM)

Sirni bulchinsa gibiraa fi taaksii biyya keenyaa baroota dheeraaf jijjiirama hunde-qabeessa ta’e

osoo hin fidin burqaa kiraasassabdumaa ta’uu irraa darbee baasii misoomni barbaaduu

uwwisuu hin dandeenye. Sababni isaas rakkoolee gurguudoo ta’aan keessaa inni tokko ragaa

guutuu, qulqulluu fi waayitawaa gibiraa fi taksii murteessuuf gargaaru jiraachuu dhabuu isaati.

kaffalaan gibiraa ,gibiraa fi taaksii kaffaluu qabu ragaa sirrii ta’e irraatti hundaa’uu akka qabu

seerri gibiraa fi taaksii ni dirqisiisa . Kana dhugoomsuufis sirna bulchiinsa ragaa gibiraaf

xiyyeeffannaan kennamee daldaltoonni heddumminaan maashina gurgurtaa guyyaa

galmeessutti akka fayyadaman godhamaa jira. Keessattuu sektarri Abbaa Taayitaa Galiiwwan

Oromiyaa sirna bulchiinsa gibiraafi taaksii mootummaa qindaa’aatti gargaaramuun sassaabbii

,murtii gibiraa, galmee odiitii gochuufi daldaltootaafi gosa daldalaa isaan irratti bobb’an

beekuuf akkasumas tajaajilawwan biroo karaa qindaa’aa ta’een akka kennaman ta’aa jira.

Kanaafis haqa qabeessuummaan murtii gibiraa dabalaa galiin mootummaas daran guddachaa

dhufeera.

Sirna bulchiinsa gibiraafi taaksii mootummaa qindaa’aa(SIGTAS)

Maashina gurgurtaa guyyaa galmeessu

C) SEERA GALIIWWANII (TAX ENFORCEMENT)

Kaffaltoota gibiraa seera gibiraa fi taaksii kabajanii dirqama lammummaa isaanii bahan

jajjabbeessuun abbootiii qabeenyaa misoomawaa akka ta’aaniif Abbaan Taayitaa Galiiwwan

Oromiyaa hojii wal irraa hin citne hojjachaa tureera. Ammas hojjechaa jira.

Haata’u malee, Yakkii gibiraa fi taaksii irratti raawwatamu baay’ee kan babal’atee fi hundee kan

fageeffate akkasumas bifasaa jijjiirrachaa waan dhufeef bulchiinsaa gibiraa fi taaksii

naannichaa irratti qofa osoo hin taane akkuma biyyaatitti gibiraa fi taaksii namoota

amanamummaan kaffalan irratti dhiibbaan geessisaa jiru guddaa dha. kaffaltootni gibiraa

baay’een gibiraa kaffaluu osoo qabanii sabaabiin hin kaffaleef inni guddaan faayidaa gibiri

misooma naanichaaf (biyyaaf) qabuu beekuu dhabuu qofa osoo hin tanee hojimaatni seeraa

galii kabaachiisuu dadhaabaa ta’u fi rakkoon ilaalchaa jiraachuu isaati. Seerri gibiraa fi taaksii

dirqama isaanii kanneen hin baane irraatti taarkaanfiwwaan fudhatamu qabu ifaatti kan kaa’e

ta’ullee, hojiirra waan hin oolchineef yakkamtootni ittigaafatamumaan seeraa akka isaan irraa

hin jireeti akka yaadaan godheera. karaa biraa immoo kaffalaa gibiraa seeraa qaabeessaa fi

ammanamaan dahoo seeraa waan hin argaanneef gabaa keessatti dorgoomaa fi bu’aa

madalawwaa akka hin arganee sababa ta’eera.

Haalli kun yoo itti fufee abbaan qabeenyaa misoomaa kan miidhamu fi kiraasassaabdummaa

kan babal’isu waan ta’eef bulchinsa garii mirkaneessuu irraati dhibbaa gudda qaba. Kanaafuu

Abbaan Taayitaa Galiiwwan Oromiyaa seera gibiraafi taaksii kabachiisuuf dirqama gibiraa fi

taksii kanneen hin baane adda baasuun, tarkaanfii seeraa barsiisaa ta’e fuudhachuun

hojimaatni gibiraa kiraasassabdootaaf osoo hin taane kafaalaa gibiraa seera qabeessa ta’eef

mija’aa akka ta’u gochaa jira. Kaffalaan gibiraas yeroo dha gara yerootti seerota gibraafi

taaksiirratti hubannoo gahaa argachaa dhufuurran kan ka’e gibiraafi taaksii fedhiin ,yeroofi

amanamummaan kaffaluu eegaleera.

D) SASSAABBII GALII (TAX COLLECTION)

Abbaan Taayitaa Galiiwwan Oromiyaa galii heera mootummaa Federaaalaa keewwata 97’n

naannoo keenyaaf qoodamee kenname murteessee sassaabaa kan jiru yoo tahe illee fedhii

misooma bal’aa naannichi qabu waliin yommuu ilaaalamu sadarkaa barbaadamu irra gahuu hin

dandeenye. Karoorri Misoomaa haga feedhe hawwataa ta’ullee galiin kan hin deeggaramne

yoo ta’e dheebuu misoomaa mootummaa fi hawaasni qabu baasuu hin danda’u. Akka Abbaa

Taayitaa Galiiwwan Oromiyaatti galii gahumsaan sassaabuudhaaf sochiin wal irraa hin citne

godhamullee ragaa qaama sadaffaa irraa argamuu irratti hundaa’uun gibira fi taaksii

murteessanii kaffalaa gibiraa biraan gahuun, yeroon hordafanii sassaabuu dhabuun, tilmaama

galii guyyaa galii kaffalaa gibiraa wajjin wal simu dhiyeessuu dhabuun dabalataanis, VAT, TOT,

gibira galii Albuuda adda addaa, gibira Miindaa dhaabbilee dhuunfaa, galii mana qopheessaa

haalaan hordafanii sassaabuu dhabuu, kaffaltoota gibiraa VAT’f galmaa’uu qaban adda baasanii

galmeessuu fi erga galma’aanii booddee yeroo seeraan daangeffame keessatti beeksisanii akka

kaffalan gochuu dadhabuun rakkoowwan gurguddaa sassaabbii galii irratti mul’atani dha.

Kaffaltoonni gibiraa tokko tokkos gibiraafi taaksii isaanirraa eegamu yeroon,fedhiifi

amanamummaan hin kaffalan .Darbees galii mootummaaf galchuu qaban xiqqeessanii faayidaa

dhuunfaaf yeroon oolchan ni mul’ata. kanaafuu, raakkoowwan armaan oliitti ibsaman maqsuun

galii dinagdeen naannichaa maddisiisu gahuumsaan sassaabuun misooma hawaas dinagdee

naannichaaf akka oolu gochuuf xiiqiin hojjetamaa jira.

E) Misooma humna namaa

Abbaan Taayitaa Galiiwwan Oromiyaa sirna bulchiinsa gibiraafi taaksii ammayyaawaa hojiirra

oolchuun gahumsa dandeettii olaanaa sektarri galii sassaabu gaafatu guutuuf hojjettoota

caasaa sektara galii sadarkaa hundatti argaman beekumsaan,naamusaafi gahumsa olaanaa

hidhatanii dirqamsaanii akka bahaniif yeroodhaa gara yerootti leenjiiwwan wal irraa hin citne ni

kenna. Keessattuu sirni bulchiinsa gibiraafi taaksii qindaa’aa bakka hundatti hojiirra akka oolu

gochuuf qaawwa ogummaa raawwattoota biratti mul’atu guutuuf leenjiiwwan shaakalliin

deeggaraman kennamaa turaniiru. Fuula durattis ni kennama.

Abbaan Taayitaa Galiiwwan Oromiyaa toorawwan xiyyeeffannoo shanan armaan olitti

tuqaman giddugaleessa godhatee sochii bal’aa taasiseen baroota karoora guddinaafi

tiraanisfoormeeshinii keessatti galii idileefi mana qoheessaa sassaabuuf galmoota

kaa’aman dursee milkeessuu danda’eera. Sababiinsaas humna raawwachiisummaa caasaa

sektara galii sadarkaa hundatti argaman gahoomsuun sirna bulchiinsa ragaa

ammayyaawaa ta’e akkasumas sirna bulchiinsa gibiraafi taaksii mootummaa qindaa’aa

diriirsuun hojii sassaabbii ,murtiifi hordoffii galii akkasumas odiitii karaa si’aayinaafi

haqummaa qabuun raawwachuun waan danda’ameefidha.

Guddina galii idlee fi mana qopheessaa bara KGT birrii biliyoonaan.

Gibiraa fi taaksii yeroon, seeraan, fedhiinii fi amanamummaan

kaffaluun Oromiyaa jaallannu haa misoomsinu!!!

0

1

2

3

4

5

6

7

8

9

2003 2004 2005 2006

2.339

3.596

4.961

7.153

0.782 0.977 1.158 1.643

3.121

4.573

6.119

8.796 Galii idlee

Galii Mana qopheessaa

Ida'amaa