1

Khotbah Minggu 05 April 2020.

Bahan Kotbah : Markus 11 : 1-11

Tema : Ngikutken Yesus.

Shalom, Mejuah-juah Perpulungen Sinikelengi Tuhanta Yesus Kristus,

Ibas Kitab Ende-Endenta no. 299 ayat 1 ikataken,

“Ngikut Tuhan kin atendu, persan silang.

Ola sangsi, ola mbiar, ikutkenlah “

Erpalasken lagu enda, perlu sisungkun lebe dirinta sekalak-sekalak, ibas paksa genduari enda, kiniseran kai nge

sierbahanca kita sangsi ras mbiar ngikutken TuhanYesus ?

Mungkin erbage-bage jababenna, misalna :

1. Kita sangsi kerna ulihna. Banci jadi lit si nungkun nina, lit kin nge pagi ulihna ngikutken Tuhan e ? Kai dage

ulihna, entah kualoken nge pagi ulihna e adi perbahanenku pe bagenda ?

2. Kita mbiar kerna resikona.

a. Kai nge resikona secara fisik adi kita ngikutken Tuhan Yesus? Lit nge kiniserannta bagi sinialami

perpulungen ibas 1 Petrus 4: 14, nina, “ Ketuahen kam adi igombang-gombangi kalak kam erkiteken kam

ajar-ajar Kristus” ? entah pe bagi persinget ibas Kitab Ketangkasen 2:10, nina, “ Ola kam mbiar kerna

kiniseran si nandangi inanamindu. Nehenlah ! Iuji iblis me kam. Piga-piga kam ibuangkenna ku penjara”.

Lit nge kiniseran si dat kita adi kita beribadah bagi pengalamen Daniel sinitamaken ku gua singa erkiteken

ia nembah man Dibata ( Daneil 6), entahpe pengalamen kalak Kristen siniayak-ayak Saulus ibas

Perbahanen Rasul-Rasul 8:3 ? Payo tuhu ibas piga-piga ingan, kalak Kristen ndatken kesuliten ibas

majekken rumah pertoton dingen njadiken rumahna ingan pulung perpulungen. Kita genduari enda

beribadah i rumahta masing-masing guna mencegah penyebaran covid-19.

b. Kai nge resikona ibas pendahinnta adi kita kalak Kristen ? Susah nge siakap ndarami pendahin, susah nge

siakap naik karier pendahinnta ? Entah lit nge si susah akapna ndarami teman nggeluh erkiteken ia kalak

Kristen ? Lit nge si kesuliten ndarami ingan tading erkiteken tek man Tuhan Yesus ? Ibas piga-piga kejadin

ras ingan lit temannta si ngenanami kiniseran erkiteken si enda ndai

Perpulungen kerina,

Payo tuhu, adi kita ngerana kerna ngikutken sada-sada hal, biasana penungkunennta kerna kai nge ulihna ras kai

resikona adi aku ngikutken ia. Misalna, adi lit kalak ngatakenca, mari ikutken aku, penungkunennta biasana, kai kari ku

dat ulihna ras kai nge resikona adi kuikutken ia. Banci jadi, jarang nge kita nungkun kai nge siharus kulakoken entah

kai nge si harus ku pesikap lebe gelah metunggung aku ngikutken ia. Ibas minggu enda, sue ras temanta, ibas kita

ngikutken Tuhan Yesus e, kai nge si ban palasna ?

Perpulungen sinikelengi Tuhan,

Bahan kotbahta nuduhken 2 tipe kelompok si ngalo-ngalo kerehen Yesus mengketi Yerusalem. Tipe si pemena eme

kelompok si mada kelede ras sipeduaken eme tipe kelompok singkimbangken erbage-bage barang ibas ngalo-ngalo

Yesus.

Ibas tipe si pemena enda, ersuruh ukurna guna ngikutken kai sinikataken ajar-ajar e erkiteken ikataken ajar-ajar e,

“Perlu Tuhan, minter ka kari iulihkenNa ku jenda”. Ibas ogenta, si mada kelede e mpelepas keledena man ajar-ajar alu

la lit isingetken terdauhen kerna jababen si mada kelede e. Kai nge palasna si mada kelede e mpelepas keledena ?

Siman pergermettenta emekap kata “Tuhan”. Si mada kelede erpenandai nandangi “Tuhan”. Kata “Tuhan” enggo jadi

jaminen man bana guna mpelepas keledena man ajar-ajar e.

2

Tipe si peduaken, emekap kalak siengkimbangkan uisna ras ngamparken lambe. Ersurak-surak kal kalak enda muji

Dibata. Nina, “Pujilah Dibata ! Ipasu-pasu Dibata gelah Ia si reh ibas gelar Tuhan. Dibatalah si masu-masu Kinirajaan

si mulihi ipanteki, e me Kinirajaan bapanta Daud; Pujilah Dibata ibas ingan Simeganjangna!” Arah pujin siendeken

jelma si enterem e tangkas maka lit sura-sura kalak enda emekap pantekna mulihi kinirajaan Daud. Payo tuhu, kerehen

Yesus alu ngersak kelede e encidahken pengarapen bangsa Israel kerna kerehen simbebasken bangsa Israel bagi

sinisuratken ibas Sakaria 9:9, nina, “ Ersuraklah, ersuraklah o anak kuta Sion ! Ersuraklah meriah, o kalak Jerusalem !

Nehenlah, rajandu reh ndahi kam ! Ia dem kemulian, dem kemenangen. Tapi meteruk ukurna, Ia reh ngersak kelede,

kelede si nguda denga e me anak indung kelede”.

Salah kin ersura-sura ? Tentu lang. Sura-sura penting guna nggerakken kita. Saja perlu kita meteh kelanjutan sura-sura

kalak e. Anak kuta Jerusalem ersurak-ersurak ngalo-ngalo Yesus. Tapi tupung Yesus ibaba kuadep-adepen Pilatus,

kalak si enterem ngatakenca “Pakukenlah Ia ku kayu persilang” (Matius 27:22). Ija nge kalak si ermeriah ukur ndai? La

nge lit kalak si pang ngatakenca bebasken Ia. Ia raja penampat. Kepeken, keriahen ukur banci salih jadi segat ate adi si

jadi e la bagi sinisuraken kita. Bagem kepe adi kita ngikut-ngikut kalak adi erpalasken sura-sura entah kepentingen

dirinta saja, la kenca seh bagi sinisuraken mis kita sakit hati,kecewa, mbenceng, medu ngikutkenca.

Emaka perpulungen sinikelengi Tuhan, ibas kita ngikutken Tuhan, kita banci erlajar kubas kelompok si pemena.

Penandaina “Tuhan” erbahanca ia mpelepas keledena ibuat ajar-ajar. Penandaita kerna Tuhan me si erbahanca kita

ngikutken kai sinikataken Tuhan e. Yesus me Kristus, Tuhan, Juru Selamatta. Ia mate guna nebusi dosa-dosanta.

Bagem, erkiteken penandaita diri Yesus e me maka kita mpelimbarui dirinta. Bali bagi ikataken ibas KEE GBKP no.

41, nina, “

Kuga perbahan kami, metunggung ngadap Kam,

O Raja Surga doni, Si Mada Kerajaan

Yesus me Raja Surga doni, emaka sisungkunlah pusuhta, kuga nge perbahanenku gelah aku metunggung ngikutken

Yesus, Raja Surga ras doni e ?

Rasul Paulus ngajarken perpulungen Roma gelah ola mpelepas dirina jadi seri ras doni enda, tapi ngendesken

kegeluhenna e gelah ipelimbarui Dibata (Roma12:2) Bagem adi ikataken kita ngikutken Tuhan, teridahlah pelimbarun

ibas kegeluhenta. Misalna, bagi isingetken Rasul Paulus ibas Kolose 3:12-13, nina, “Kam anak-anak Dibata, kam

ikelengi dingen ipilih Dibata jadi sikerajangenNa. E maka pakekenlah paken ate perkuah, mehuli, rukur meteruk,

lemah lembut dingen saber. Ola kam pergelut dingen sialem-alemen salah adi kitik ukurndu ibahan kalak. Kam arus

sialem-alemen salah bagi Tuhan enggo ngalemi salahndu”.

Ertina, kita lanai nungkun-nungkun kerna ulihna kita erkiniteken ibas situasi pandemi covid-19 enda. Engkai maka

ipediatNa doni enda ngenanami pinakit si mberat enda? Ija dage kuasa Dibata e ? Kita la nungkun kerna pendahin

Dibata. Kita tidak lagi mencari mujijat untuk percaya kepada Allah. Kita nandai Dibata si mada kuasa nandangi kerina

tinepaNa. Dibata si tetap erkeleng ate man banta. Emaka ibas situasi enda si penting emekap kuga perbahanenta

nandangi kalak si deban sebagai bukti kita ngikutken Tuhan Yesus Kristus. Asa bancina, sibuatlah baginnta ibas

nampati kalak si ngenanami kiniseran erkiteken dampak penyebaran covid-19 enda.

Perpulungen sinikelengi Tuhan,

Jadi, ibas kita ngikutken Yesus, si pemena lebe, labo kita nungkun kai nge ulihna ras kai nge resikona adi aku

ngikutken Yesus, tapi si pemena lebe eme penandaita Tuhan Yesus Kristus e, jenari erpalasken penandaita e kita

mpelimbarui dirinta gelah metunggung ngikutken Yesus.

Selamat Minggu, Tuhan Dibata si masu-masu kita kerina.

Pdt. Tanda Pinem

GBKP Rg. Jl. Sei Batang Serangan Medan